သျှမ်းပြည်တောင်ပိုင်း မိုင်းကိုင်မြို့နယ် ဟမ်းငိုင်းကျေးရွာအုပ်စုရှိ ကုန်းစုံဘုန်းကြီးကျောင်းတွင် စစ်ရှောင် (၂၆၀)ကျော် ထပ်မံတိုးလာကြောင်း စုံစမ်းသိရှိရသည်။
ယမန်နေ့ စက်တင်ဘာ (၂၆) ရက် နေ့လည် ၂ နာရီခန့်က လက်နက်ကြီးသံ ကြားရသဖြင့် စစ်ရှောင် (၂၆၀)ကျော် ကုန်းစုံဘုန်းကြီးကျောင်းသို့ ထပ်မံရောက်လာကာ လက်ရှိမှာ စစ်ရှောင်သူ (၅၀၀) ခန့်ရှိပြီး ဖြစ်ကြောင်း သိရသည်။
“နမ့်အွတ်ရွာထဲက တိုက်ပွဲဖြစ်တယ်လို့ကြားတယ်။ ကုန်းစုံဘုန်းကြီးကျောင်းမှာ နေရင် အသံတွေ ကောင်းကောင်းကြားနေရတယ်။ မနေ့ညက လေးလုံးထိုးတွေနဲ့ ကျောင်းထဲ အများကြီး ဝင်လာကြတယ်။ (၂၆၀)ကျော်ထပ်ရောက်လာတယ် ” ဟု ဟမ်းငိုင်း ဒေသခံ တစ်ဦး က သျှမ်းသံတော်ဆင့် ကိုပြောသည်။
လက်ရှိ မိုင်းကိုင်မြို့နယ်အတွင်း စက်တင်ဘာ (၁၄) ရက်နေ့က စတင်ပြီး ဟိုခဲကျေးရွာအုပ်စုအတွင်း သျှမ်းတပ် (၂) တပ် တိုက်ပွဲဖြစ်ပွားသောကြောင့် စစ်ရှောင်များ နေရပ်သို့ ထွက်ပြေးတိမ်းရှောင် နေရကြောင်း သိရသည်။
“ဟိုခဲဘက်တော့ ငြိမ်သွားပြီ။ ခုက ဟမ်းငိုင်းဘက် လာဖြစ်နေတယ်။ ဟိုခဲဘက် ငြိမ်သွားပေမယ့် ဒေသခံတွေ မပြန်ရဲသေးဘူး။ စစ်ရေးတင်းမာနေတုန်းမလို့” ဟု ပန်ကေတု ဒေသခံ တစ်ဦး ကပြောသည်။
မိုင်းကိုင်မြို့နယ်အတွင်း တုံလောကျေးရွာအုပ်စုမှာ (၃) နေရာ၊ ဟမ်းငိုင်းကျေးရွာအုပ်စု (၂) နေရာ၊ ပန်ကေတုကျေးရွာအုပ်စု (၄) နေရာ၊ ဟိုနားအုပ်စု (၁) နေရာ၊ မိုင်းကိုင်မြို့ ရပ်ကွက်(၆) ရှိ လွယ်လိုင်ဘုန်းကြီးကျောင်းမှာ (၁) နေရာနှင့် ဟိုနွဲ့ ကျေးရွာတွင် (၁)နေရာ စစ်ရှောင်စခန်း စုစုပေါင်း (၁၂) နေရာရှိပြီး စစ်ရှောင် (၃၀၀၀) ဝန်းကျင်ရှိသွားပြီး စားနပ်ရိက္ခာလိုအပ်နေကြောင်း သိရှိသည်။
သျှမ်းတပ်(၂)တပ် တိုက်ပွဲအမြန်ရပ်တန့်ရန် သျှမ်းပြည်လူထုနှင့် သံဃာတော်များက အကြိမ်ကြိမ် တောင်းဆိုခဲ့သော်လည်း တိုက်ပွဲရပ်တန့်သွားခြင်းမရှိဘဲ ပိုပြင်းထန်လာကြောင်းသိရသည်။
Leave a Comments