သျှမ်းမြောက် ကျောက်မဲမြို့နယ်တွင် တိုင်းရင်းသားလက်နက်ကိုင်တိုက်ပွဲကြောင့် စစ်ရှောင်ထွက်ပြေး နေရသည့် ကလေးများ၏ အနာဂတ်ပညာရေးအတွက် စိုးရိမ်ရသည့်အနေအထားဖြစ်နေကြောင်း သတင်းရရှိသည်။

ကျောက်မဲမြို့နယ်တွင် ပြီးခဲ့သည့် ဖေဖော်ဝါရီလကတည်းက တိုင်းရင်းသားလက်နက်ကိုင်များဖြစ်သည့် RCSS/SSA နှင့် တပ်ပေါင်းစု ဖြစ်သည့် SSPP/SSA၊ TNLA တပ်တို့ တိုက်ပွဲပြင်းထန်မှုကြောင့် စစ်ရှောင်ထွက်ပြေးနေရသူ (၄၀၀၀)ကျော်ထိ ရှိနေကြောင်း၊ အဆိုပါစစ်ရှောင်များထဲမှ စစ်ရှောင် နေရသည့် ကလေးသူငယ်များ၊ ကျောင်းသူ/သား များ၏ အနာဂတ်ပညာရေးအတွက် စိုးရိမ်ရကြောင်း ဒေသခံများက ပြောသည်။

“ကိုဗစ်စဖြစ်ကတည်းက ကျောင်းတွေလည်း ပိတ်ထားရတယ်၊ အဲ့တော့ ကလေးတွေက သူတို့ရဲ့ ပညာရေးပိုင်းကို ဆုံးရှုံးနေရပြီ၊ ခုက စစ်ရှောင်ထွက်ပြေးပြန်ရပြီဆိုတော့ စစ်ရှောင်ကလေးတွေရဲ့ အနာဂတ်ပညာရေးက စိုးရိမ်စရာပါပဲ” ဟု စစ်ရှောင်များကို ကူညီနေသည့် ကျောက်မဲ သျှမ်းစာပေနှင့်ယဉ်ကျေးမှုအသင်းမှ ဥက္ကဌ လုင်းလျန်းဟန် က သျှမ်းသံတော်ဆင့်ကို ပြောသည်။

ကျောင်းသား/သူများသည် ကိုဗစ်ကူးစက်ပျံ့နှံ့နေမှုကြောင့် ပညာရေးနှောင့်နှေးမှုများ ကြုံနေရသည့်အပြင် လက်ရှိတွင် တိုင်းရင်းသားလက်နက်ကိုင်တိုက်ပွဲကြောင့် ထပ်မံထွက်ပြေးတိမ်းရှောင်နေရသည့်အတွက် အဆိုပါ ကျောင်းသား/သူ ကလေးများ၏ ပညာရေးအတွက် ပိုမိုစိုးရိမ်နေရတာ ဖြစ်ကြောင်း စစ်ရှောင် ကူညီသူများက ဆိုသည်။

လက်ရှိတွင် ကျောက်မဲမြို့နယ်အတွင်း စစ်ရှောင်စခန်းများတွင် ရောက်ရှိနေသည့် ကလေးများ၏ ပညာရေးအတွက် စာအုပ်ကူညီထောက်ပံ့မှုများ ရှိသော်လည်း သင်ကြားပေးမည့်သူ မရှိသေးကြောင်း လုင်းလျန်းဟန် က ဆိုသည်။

“စစ်ရှောင်ကလေးတွေရဲ့ ပညာရေးအတွက် Save The Children ရဲ့ ကူညီမှုနဲ့ စာအုပ်တွေ သွားပြီးထောက်ပံ့နေတာရှိတယ်၊ ဒါပေမယ့် သင်ကြားပေးမယ့် သူ မရှိဘူး၊ နောက်ပြီး ရောဂါဖြစ်နေတဲ့ ကာလဆိုတော့ သွားလာဖို့ အခက်ခဲဖြစ်နေတာ” ဟု ၎င်းက ပြောသည်။

ထိုစစ်ရှောင်များထဲတွင် Grade 1 မှ Grade 4 ပညာသင်ကြားနေသူ (၂၀၀)ကျော် ပါဝင်နေကြောင်း၊ ထို့အပြင် ကိုဗစ်ကူးစက်မှုကြောင့် ကျောင်းများပိတ်ထားရသည့်အတွက် ကျောင်းသား/သူတို့၏ အနာဂတ်ပညာရေးအတွက် စိုးရိမ်မိကြောင်း ဒေသခံများက ပြောသည်။

စစ်ကောင်စီက နိုင်ငံတော်အားဏာသိမ်းယူပြီးနောက် ဇွန်လအတွင်း ကျောင်းများကို ပြန်ဖွင့်ရန် ကြိုးစားခဲ့သော်လည်း ကိုဗစ်တတိယလှိုင်း ထပ်မံဖြစ်ပွားခဲ့သည့်အတွက် ကျောင်းများကို ပြန်လည်ပိတ်ထားခဲ့ရတာဖြစ်ကြောင်း သိရှိရသည်။