သျှမ်းပြည်မြောက်ပိုင်း တန့်ယန်းမြို့တွင် လမ်းဘေးရှိ သစ်ပင်ကြီး ကျိုးကျမှု ဖြစ်ပွားပြီး ကားတစ်စီး နှင့် ဓါတ်တိုင်များ ပျက်စီးကာ လူတစ်ဦး ထိခိုက်ဒဏ်ရာရသွားကြောင်း သတင်းရရှိသည်။
ယနေ့ စက်တင်ဘာလ ၂၇ ရက် မနက် ၁၀ နာရီ ဝန်းကျင်တွင် မိုးမရွာ လေမတိုက်သော်လည်း တန့်ယန်းမြို့ မြကန်သာပန်းခြံအဝင် တံခါးပေါက်အနီးရှိ ညောင်ပင်ကြီးသည် အဆိုပါအနီးသို့ ဖြတ်မောင်းလာသည့် အနက် ရောင် ကားတစ်စီးပေါ်တွင်ကျိုးကျလာပြီး ယာဉ်မောင်းဘေးတွင် လိုက်ပါလာသူ အမျိုးသား တစ်ဦးလည်း ထိခိုက်ဒဏ်ရာရသွားကြောင်း တန့်ယန်းမြို့နေ ဒေသခံ ပြည်သူတစ်ဦးက သျှမ်းသံတော်ဆင့်ကို ပြောသည်။
“သက်တမ်းကြာလို့ကျိုးကျတယ်လို့ပဲပြောရမှာပါ၊ ဘာဖြစ်လို့လဲဆိုရင် သူကျိုးကျတဲ့အချိန်မှာ လေမတိုက် ဘူး၊ မိုးမရွာဘူးလေ၊ ဓါတ်တိုင်က သုံးလေးတိုင်နဲ့ ကားတစ်စီးပျက်စွားသွားတယ်၊အဲ့ကားက ယာဉ်မောင်း ဘေးမှာ လိုက်ပါလာတဲ့ အမျိုးသားတစ်ဦးလည်း ထိခိုက်ဒဏ်ရာရသွားတယ်” ဟု အထက်ပါ ပုဂ္ဂိုလ်က ပြောသည်။
လက်ရှိတွင် အဆိုပါ ကျိုးကျလာသော သစ်ပင်သစ်ကိုင်းမှ အမှိုက်သရိုက်များကို တန့်ယန်းမြို့ မီးသတ်တပ်ဖွဲ့ ဝင်များနှင့် တာဝန်ရှိသူများ ပြည်သူများပူးပေါင်းကာ ရှင်းလင်းမှုများပြုလုပ်ကြကြောင်းလည်း သတင်းသိ ရ သည်။
ယခုကျိုးကျသည့် အဆိုပါ သစ်ပင်ကြီးသည် ယခင်ကလည်း တစ်ခါကျိုးကျခဲ့ဖူးကြောင်း မြကန်သာ ပန်းခြံအနီးတွင် နေထိုင်သူ တစ်ဦးက ပြောသည်။
Leave a Comments