သျှမ်းပြည်မြောက်ပိုင်း တန့်ယန်းမြို့ လေယာဉ်ကွင်းဟောင်းတွင် ယာယီ ပျံကျဈေးဆိုင်ခန်းများကို စစ်ကောက်စီ လက်အောက်ခံ စည်ပင်သာယာရေးဌာန က ဆိုင်ခန်းခ ကောက်ခံမှုများပြုလုပ်နေကြောင်း စုံစမ်းသိရသည်။
အဆိုပါ တန့်ယန်းမြို့ လေယာဉ်ကွင်းဟောင်း တွင်ရှိသည် ယာယီပျံကျဈေးဆိုင်တန်းသည် ကိုဗစ်-၁၉ ကူးစက်မှု နှုန်းမြင့်တက်လာမှုကြောင့် တန့်ယန်းမြိုု့မ ဈေးမှ ခွဲထွက်လာရောက်ဖွင့်လှစ်ထားသည့် ယာယီပျံကျဈေးဆိုင်တန်းများ ဖြစ်ပြီး၊ ယခင်တွင် ဆိုင်ခန်းခ ကောက်ခန်မှု မရှိဘဲ ဈေးရောင်းခွင့်ပြုခဲ့ကြောင်းသိရသည်။
လက်ရှိ အာဏာသိမ်းစစ်ကောင်စီ တက်လာပြီးနောက် ထို ယာယီပျံကျဈေးဆိုင်တန်းကို ဖျက်သိမ်းကာ အရင်ပုံစံအတိုင်းပင် အသစ်ပြန်ဆောက်ပြီး တခန်းလျှင် ကျပ်ငွေ (၃၀၀၀၀)ကျပ်ဖြင့် ရောင်းချမည်ဖြစ်ပြီး၊ တရက်လျှင် အခန်းခ (၂၀၀)ကျပ်ပါ ထပ်မံပေးဆောင်ရမည် ဟု တန့်ယန်းဒေသခံများ ပြောပြချက်အရသိရသည်။
“ သူတို့ ဟိုအရင်ကလုပ်ထားတဲ့ဟာကို ပြန်ဖျတ်ပြီးတော့ အခုက အသစ်ပြန်ဆောက်ခိုင်းတာ။ ပုံစံကလည်း ဝါးနဲ့ ပဲ ပြန်ဆောက်ထားတာ။ အဲအသစ်ခန်းကို တခန်း ၃ သောင်းနဲ့ ပြန်ရောင်းမယ်။ တရက်ကိုက အခွန်ခ (၂)ရာကျပ်ပါဆောင်ရမယ်တဲ့။ တစ်ခန်းကို ၈ ပေလောက်ထိအကျယ်သူတို့ပြန်ဆောက်နေတာ” ဟု တန့်ယန်းမြို့ ဈေးတွင် ဆောက်လုပ်ခဲ့သည့် အမျိုးသားတစ်ဦးက ပြောသည်။
ထိုယာယီပျံကျဈေးဆိုင်ခန်းများတွင် တန့်ယန်းမြို့နယ်အတွင်းရှိ ကျေးရွာများမှာ ဟင်းသီးဟင်းရွက်များ လာရောက် ရောင်းချလေ့ရှိသည့် ဈေးဆိုင်များဖြစ်ပြီး၊ လက်ရှိကာလမှာ အခက်အခဲမျိုးစုံကြုံနေရသည့်အချိန်တွင် ဆိုင်းခန်းခ ဈေးနှုန်းကောက်ခံမှုပြုလုပ်မည်ဆိုပါက ဈေးသည်များအတွက် အခက်အခဲဖြစ်ကြောင်း လည်း တန့်ယန့် ယာယီပျံကျဈေးတွင် ဈေးရောင်းသည့် အမျိုးသမီး တစ်ဦးက ပြောသည်။
“ အခုက သူတို့ ဆောက်ပြီး (၃) သောင်းနဲ့ပြန်ရောင်းမယ်ဆိုတော့ မဝယ်နိုင်ဘူး။ အဲဈေးက ရွာတွေဘက်ကလူလည်း လာရောင်းတယ်။ ပြီးတော့ အရင်က အခန်းဆို ၃၀ ပေလောက်ရှိထားတယ်လေ။ အခုက တခန်းကို ၆ ပေလောက်ပဲ ပေးတော့မယ်ဆိုတော့ တချို့ ကုန်သည်ဆိုင်တွေအတွက်တော့ ခက်ခဲတာတွေ အများကြီးရှိတယ်” ဟု အထက်ပါ အမျိုးသမီး ကဆိုသည်။
ထိုပျံကျဈေးနေရာသည် မြန်မာနိုင်ငံ ကိုဗစ် -၁၉ ပထမလှိုင်းတုန်းက ပိုးကူးမှု မပျံပွားစေရန်အတွက် အရပ်သားအစိုးရ NLD လက်ထက်က သွားရောင်းခွင့်ပြုခဲ့နေရာဖြစ်သည်။
Leave a Comments