သျှမ်းပြည် မြောက်ပိုင်းရှိ လားရှိုး-သိန္နီကြားတွင် အာဏာသိမ်း စစ်ကောင်စီတပ်ဖွဲ့နှင့် တိုင်းရင်းသားလက်နက် ကိုင်တပ်ဖွဲ့တို့ ဖြစ်ပွားသည့်အတွက် ပြည်ထောင်စု ကားလမ်းမကြီးကို ယာယီပိတ်ဆို့ခဲ့ကြောင်း သတင်းသိရသည်။
ယမန်နေ့ စက်တင်ဘာ ၂၆ ရက် မနက် ၉ နာရီခွဲဝန်းကျင်မှစတင်ပြီး စစ်ကောင်စီတပ် ဖွဲ့ နှင့် တိုင်းရင်းသား လက်နက်ကိုင်အဖွဲ့တို့သည် လားရှိုး – သိန္နီကြားရှိ နမ့်တွန်းကျေးရွာအုပ်စု နမ့်ဟူးကျေးရွာနှင့် မန်ဒေါင်ကျေးရွာ ကြားမှာထိတွေ့တိုက်ပွဲ ဖြစ်ပွားခဲ့ပြီးနောက် ကားလမ်းအသုံးပြုမှုကို ယာယီပိတ်ခံလိုက်ရကြောင်း အဆိုပါ လမ်းကြောင်းတွင်ကားမောင်းသူတစ်ဦးက သျှမ်းသံတော်ဆင့်ကို ပြောသည်၊၊
“မနေ့ မနက်ပိုင်းမှာ တိုက်ပွဲသံတွေ စကြားခဲ့တာ၊ ညနေ ၄နာရီ ၂၀ မိနစ် ဝန်းကျင်မှာ သိန္နီနဲ့ လားရှိုးကြားမှာ ရှိတဲ့ S ကွေ့နားမှာ တိုက်ပွဲသံ ကြားခဲ့ရပါတယ်၊ လားရှိုး ဘက်ခြမ်းနဲ့ နီးတယ်၊ မနေ့မှာ တိုက်ပွဲသံတွေ ကြားရပြီးတော့ နမ့်တွန်းရွာက S ကွေ့နားကမိန်းလမ်းမ ပိတ်ထားလိုက် တာ ဒီနေ့ မနက်ရောက်တော့ ပြန်ဖွင့်ပေးလို့ သွားနိုင်ပြီ” ဟု အထက်ပါ ပုဂ္ဂိုလ်က ပြောသည်။
အဆိုပါ စစ်ကြောင်းချီတက်လာသည့် စစ်ကောင်စီတပ်ဖွဲ့ကို ကိုးကန့်တပ်မတော် (MNDAA) တပ်တို့ကကြားဖြတ် တိုက်ခိုက်သည့်အတွက် တိုက်ပွဲဖြစ်ပွားခဲ့ကြောင်း ဒေသခံများက ပြောဆိုနေကြသည်။
“တိုက်ပွဲက မနက် ၉ နာရီဝန်းကျင်ကနေ ၁၀ နာရီနီးနီးထိ ကြားရတယ်၊ နေ့ခင်းပိုင်းမှာလည်းသေနတ်သံတွေ တစ်ချက်တစ်ချက် ကြားရတယ်၊ ညနေပိုင်းမှာတော့ အသံမကြားရတော့ဘူး၊ ဒါပေမဲ့ လမ်းကိုတော့ ပိတ်ထား လိုက်တယ်၊ ဒီနေ့ မနက်ပိုင်းမှာ ပြန်ဖွင့်ပေးတာ” ဟု အဆိုပါ လမ်းကြောင်းတွင် ခရီးသွားခဲ့သူ ပြည်သူတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် စက်တင်ဘာ ၂၀ ရက်နေ့ ကလည်း စစ်ကောင်စီတပ်ဖွဲ့နှင့် တိုင်းရင်းသား လက်နက်ကိုင်တို့သည် နမ့်တွန်းရွာအနီး တိုက်ပွဲ ဖြစ်ပွားကာ အဆိုပါ ယာဉ်ကြောင်းလမ်းမှ အတက်၊ အဆင်း ယာဉ်ကြီး၊ ယာဉ်ငယ် များကို သွားလာခွင့် မပြုပဲ နာရီပိုင်းကြာ လမ်းပိတ်ခဲ့ခြင်းမျိုးလည်း ရှိခဲ့သည်။
လက်ရှိ ရက်ပိုင်းကာလအတွင်း လားရှိုးနဲ့ သိန္နီကြားရှိ ကားလမ်းမပေါ်တွင် မကြာခဏ စစ်ကောင်စီတပ်ဖွဲ့နှင့် တိုင်းရင်းသားလက်နက်ကိုင်တိပ်ဖွဲ့တို့အကြား ထိတွေ့တိုက်ပွဲဖြစ်ပွားမှု မကြာခဏ ဖြစ်ပေါ်တတ်သော ကြောင့် အဆိုပါ ကားလမ်းကို အမှီပြု အလုပ်လုပ်ကိုင်နေကြသည့် ပြည်သူများက ဝမ်းရေးအတွက်နှင့် လုံခြုံရေးအတွက် စိုးရိမ်နေကြကြောင်းလည်း သိရသည်။
