သျှမ်းပြည်တောင်ပိုင်း ပင်လောင်းမြို့နယ် တီကျစ်ကျေးရွာအုပ်စု ဆည်ခေါင်းကျေးရွာ တောင်ရိုးလူငယ်အထောက်ကူပြု အဖွဲ့ဝင်တစ်ဦးဖြစ်သည့် ကိုအောင်ဆန်းကို စစ်ကောင်စီမှ ဖမ်းဆီးခေါ်ဆောင်သွားကြောင်း စုံစမ်းသိရသည်။
စက်တင်ဘာ ၂၄ရက် ည (၅)နာရီ တွင် တောင်ရိုးလူငယ် အထောက်အပြု အဖွဲ့ဝင် ကိုအောင်ဆန်း ကို စစ်ကောင်စီ အဖွဲ့မှ ၎င်း၏ နေအိမ်ထိ လာရောက်ဖမ်းဆီးခေါ်ဆောင်သွားပြီး၊ ကိုအောင်ဆန်းပိုင်ဆိုင်သည့် ကျပ်သိန်း (၁၅၀)တန် ပစ္စည်းများကိုလည်း ယူဆောင်သွားကြောင်း သတင်းရရှိသည်။
“ ၅ နာရီအချိန်လောက်အိမ်မှာလာစောင့်ပြီးဖမ်းသွားတာ။ သူအိမ်က ကား၊ ကွန်ပျူတာ၊ ဖုန်း ဆိုလည်း (၅) သိန်းတန်တဲ့ ဖုန်း (၅) လုံးယူသွားတယ်။ သူတို့ သိမ်းသွားတဲ့ ပစ္စည်းတန်းဖို က သိန်း (၁၅၀) လောက်ရှိတယ်။ မေးမြန်စရာရှိလို့ဆိုပြီးခေါ်သွားတာ။ ခုထိပြန်မလွတ်လာသေးဘူး” ဟု ကိုအောင်ဆန်း နှင့် ရင်းနှီးသူ တစ်ဦးက သျှမ်းသံတော်ဆင့် ကို ပြောသည်။
ကိုအောင်ဆန်းကို လာရောက်ဖမ်းဆီးသည့် စက်တင်ဘာ (၂၄) ရက် မနက်ပိုင်းတွင် တောင်ရိုးပြည်သူကာကွယ်ရေး တပ်ဖွဲ့ PDF က အဖွဲ့ကို ဖွဲ့စည်းပြီးကြောင်း နှင့် စစ်ကောင်စီနှင့် အလုပ်တွဲလုပ်သူများကို တိုက်ခိုက်သွားမည် ဟု ထုတ်ပြန်ခဲ့သည့်နေရက်ဖြစ်သည်။
ထိုကိစ္စနှင့် ဆက်စပ်သည် ဟု စစ်ကောင်စီက သံသယရှိသောကြောင့် ကိုအောင်ဆန်ကို လာရောက်ဖမ်းဆီးခဲ့ခြင်း ဖြစ်ကြောင်း၊ ကိုအောင်ဆန်းကို လာရောက်ဖမ်းဆီးရာတွင်လည်း စစ်ကောင်စီတပ်ဖွဲ့ အင်အား အလုံရင်းဖြင့် လာရောက်ဖမ်းဆီးသွားကြောင်းသိရသည်။
“ သူတို့ အိမ်ကိုလာတာတော့ ၆ ယောက်လောက်ပဲလာတာ။ ကိုအောင်ဆန်းကို ဖမ်းသွားပြီးတော့ ပြောင်းဖူးခြံထဲကနေ စစ်သားတွေ အများကြီးပဲ ထွက်လာတာ။ သူက ပရဟိတအလုပ်တွေ အများလုပ်တယ်။ သူကို PDF လို့ထင်ပြီးလာ ဖမ်းသွားတာထင်တယ်။ အဲနေ့က တောင်ရိုး PDF တွေက စာထုတ်ပြန်ခဲ့တယ်” ဟု ကိုအောင်ဆန်းနှင့်ရင်းနှီးသူက ပြောသည်။
ကိုအောင်ဆန်းသည် စစ်အာဏာမသိမ်းခင်က လူငယ်များကို စာသင်ပေးခြင်း၊ ကျောင်းမတက်နိုင်သည့် ကလေးများကို အထောက်ပံ့ပြုပေးခြင်း၊ တောင်ရိုးလူငယ်များကို ဖွံ့ဖြိုးတိုးတက်ရန်အတွက် စိတ်ပါဝင်စား ပြုလုပ်ပေးခဲ့ကြောင်းသိရသည်။
ဖေဖော်ဝါရီ ၁ ရက် စစ်အာဏာသိမ်းပြီးနောက်ပိုင်း စစ်ကောင်စီမှ ပြည်သူ့ (၁၁၂၅)ဦး ကိုသတ်ဖြတ်ခဲ့ပြီး (၈၄၅၆) ဦး ဖမ်းဆီးထားကြောင်း နိုင်ငံရေးအကျဉ်းသားကူညီစောင့်ရှောင်ရေး (AAPP) က ယမန့်နေ့စက်တင်ဘာ ၂၅ ရက်နေ့က ထုတ်ပြန်ခဲ့သည်။
Leave a Comments