သျှမ်းပြည်အတွင်းရှိ စစ်ကောင်စီတို့သည် ဖမ်းဆီးခံရသည့် လူငယ်များ၏ လက်ကိုင်ဖုန်းများကို အသုံးပြုကာ တခြားသော လူငယ်များကို ထောင်ချောက်ဆင် ဖမ်းဆီးနေကြောင်း သတင်းသိရသည်။
ယမန်နေ့ စက်တင်ဘာလ ၂၄ ရက် မနက်ပိုင်းတွင် သျှမ်းပြည် အရှေ့ပိုင်း တာချီလိတ်မြို့နေ လူငယ် တချို့ကို အာဏာသိမ်း စစ်ကောင်စီကို ဆန့်ကျင်သည်ဟုဆိုသည့် အကြောင်းပြချက်ဖြင့် ၎င်းတို့ နေအိမ် အသီးသီးအထိ စစ်ကောင်စီက အင်အားသုံးကာ လာရောက်ဖမ်းဆီးပြီး ၎င်းတို့၏ ဖုန်းများကိုလည်း သိမ်းယူ သွားကြောင်း သတင်းသိရသည်။
“မနေ့က မနက်ပိုင်းမှာပါ၊ ဆန်ဆိုင်းဈေးအနီးမှာနေတဲ့ လူငယ်ကိုအရင်လာဖမ်းတယ်၊ စစ်ကောင်စီကို ဆန့် ကျင်တဲ့သူမလို့ လာဖမ်းတာတဲ့၊ ပြီးတော့ ရပ်ကွက်ထဲဝင်ပြီး နောက်ထပ်လူငယ် သုံးယောက်ကိုလည်း ဖမ်း ခေါ် သွားတယ်၊ မိန်းကလေး တစ်ယောက်ကိုလည်း ဖမ်းခေါ်သွားတာ တွေ့ရတယ်၊ သူတို့ဖုန်းတွေလည်း အကုန်လုံးယူသွားတယ်တဲ့”ဟု တာချီလိတ်မြို့နေ အမျိုးသားတစ်ဦးက သျှမ်းသံတော်ဆင့်ကို ပြောသည်။
ဖမ်းဆီးခံရသည့် လူငယ်များသည် တာချီလိတ်မြို့၊ ဆန်ဆိုင်း(ခ)ရပ်ကွက် ဝမ်မိုင်ရွာအတွင်းနေထိုင်သူ သီဟစိုး၊ အငယ်လေး နှင့် အိပြုံးဆိုသည့် အမျိုးတစ်ဦးအပြင် ဆန်ဆိုင်း(က)ရပ်ကွက်မှ ဆန်ဆိုင်း ဈေးအနီး ကျော်စွာဦး (ခ)ကျော်ကြီး(ခ)တင်မိုးလင်းတို့ဖြစ်ကြောင်းနှင့် ၎င်းတို့အားလုံးသည် သာမာန်အရပ်သား လူငယ်များဖြစ်ကြောင်းလည်း ၎င်းကပြောသည်။
လက်ရှိတွင် အဆိုပါ ဖမ်းဆီးခံထားရသည့် လူငယ်(၄)ဦး၏ ဖုန်းများကို စစ်ကောင်စီတို့က ယူဆောင်စစ်ဆေး နေလျက်ရှိ ပြီး Facebook အကောင့်များမှ Group chat များတွင် ဝင်ရောက်စကားပြောခြင်း၊ အပြင်တွင် တွေ့ ဆုံစကားပြောရန် ပြောဆိုခြင်းများ ပြုလုပ်နေကြောင်းနှင့် တချို့သော လူငယ်များကိုလည်း နောက်ယောင်ခံ ဖမ်းဆီးမှုများ ဆက်လက်ပြုလုပ်နေသောကြောင့် ထပ်မံဖမ်းဆီးခံရသည့် လူငယ်များလည်း ရှိနေကြောင်း သတင်းသိရသည်။
“လိပ်စာ အတိအကျနဲ့ လာဖမ်းတော့ ဘာမှ ပြင်ဆင်ချိန်မရှိဘူးလေ၊ ဖုန်းတွေလည်း ပါသွားရတယ်၊ အခု စကစ တွေက ဖုန်းကနေတစ်ဆင့် သူတို့ရဲ့ သူငယ်ချင်းတွေကို သံသယနဲ့ စွပ်စွဲချက်တွေတင်ပြီး လိုက်ဖမ်း နေတယ်လို့ကြားတယ်၊ မနက်က ၄ ယောက်နဲ့၊ ညနေပိုင်း နဲ့ ညပိုင်းလည်း ဝင်ဖမ်းသေးတယ်တဲ့ ဘယ်နှစ် ယောက်ထပ်ပါသွားမှန်းတော့ မသိရဘူး၊ မြို့ကလည်း လန့်နေပြီ” ဟု တာချီလိတ်မြို့နေ အသက် ၄၅ အရွယ် အမျိုးသားတစ်ဦး က သျှမ်းသံတော်ဆင့်ကို ပြောသည်။
စစ်ကောင်စီတို့သည်နိုင်ငံတော် အာဏာကို သိမ်းယူပြီးနောက် တာချီလိတ်မြို့ အပါအဝင်တခြားသော မြို့နယ် များတွင်လည်း အာဏာရှင် ပြုတ်ချရေး ဆန္ဒပြတောင်းဆိုသူများနှင့် နိုင်ငံရေးနှင့် ပက်သက်ဆက်နွယ်မှုမရှိ သည့် သျှမ်းပြည်အတွင်းမှလူငယ်လူရွယ်များစုစုပေါင်း ၅၀၀ နီးပါးတို့ကို အကြောင်းပြချက်မရှိဘဲ မတရား ဖမ်းဆီး ထိန်းသိမ်းထားနေကြောင်းသိရသည်။
