သျှမ်းသံတော်ဆင့်/နန်းမောက်မိုဟျိုးခမ်း ။                  ။ ရင်ခွင်မဲ့ကလေးလျော့ချရေးနှင့် ကာကွယ်စောင့်ရှောက်ရေး ပြည်နယ်နှင့်တိုင်းဒေသ ကြီးအသင်းများ ဖွဲ့စည်းရေးတွေ့ဆုံဆွေးနွေးပွဲ အခမ်းအနားကို တောင်ကြီးမြို့ မြို့တော်ခန်းမ တွင်ပထမဆုံးအကြိမ် ကျင်းပခဲ့ပါသည်။

အဆိုပါ အခမ်းအနားကိုဂျူလိုင် ၂၄ ရက်၂၀၁၈ တွင်ကျင်းပ ရာ အမျိုးသမီးအသင်း ၊ လွှတ်တော်ဥက္ကဌ များ NLD ကိုယ်စားလှယ်များ၊မြို့မိမြို့ဖများ၊ မိဘမဲ့ဂေဟာမှဦးဆောင်သူများ နှင့်သားဖွားအဖွဲ့များ တက်ရောက် ဆွေးနွေးခဲ့ ပါသည်။

“ရင်ခွင်မဲ့ ကလေးငယ်များ ကိန်းဂဏန်း အတိအကျတော့မရှိဘူး။ ရပ်ကွက်နဲ့ ပုဂ္ဂလိက မှာစွန့်ပစ်တဲ့ကလေးတွေ ကျတော့စာရင်းကောက်ရခက်တယ်။ ဆေးရုံမှာတော့ စွန့်ပစ်ခံရတဲ့ကလေး ကိန်းဂဏန်းတက်လာတယ်” ဟု ရင်ခွင်မဲ့ ကလေးငယ် များလျော့ချရေးနှင့် ကာကွယ်ရေးအသင်း အထွေထွေအတွင်းရေးမှူး ဒေါက်တာမြသီတာ ကပြောသည်။

လက်ရှိတွင် ရင်ခွင်မဲ့ကလေးငယ်များ တနှစ်ထက်တနှစ် ပိုမိုများပြားလာနေရာ ၊ အဓိက မျိုးဆက်ပွားအသိပညာပေးလုပ်ခြင်းအားဖြင့် တဖက်တလမ်းကလျှော့ချနိုင်ကြောင်း ဒေါက်တာမြသီတာကပြောသည်။

သူငယ်တော်ရည်စူးကျောင်း မိဘမဲ့ဂေဟာမှ Sister Natalina Miza ကလည်း ” ကလေးတွေ လ သားအရွယ်ကစပြီး အများအားဖြင့်ရောက်လာတယ်။ သူတို့တွေရဲ့ ကျန်းမာရေး ရယ် အာဟာရ တွေကို ပြည့်ဝဖို့အတွက်ကျွေးမွေးစောင့်ရှောက်ပေးပါတယ်။ သူတို့ကြီးလာရင် ညာဏ်ရည်မမှီမှာစိုးလို့”ဟုသျှမ်းသံတော်ဆင့်ကိုပြောကြားသည်။

တောင်ကြီးမြို့တွင် ပထမဆုံးအကြိမ်အဖြစ်ကျင်းပသောအဆိုပါအခမ်းအနားတွင် တက်ရောက် သူပေါင်း၂၀၀ ကျော် ရှိပါသည်။

အဆိုပါအခမ်းအနားမျိုးကိုယခင်က နေပြည်တော် ကယားပြည် ကရင်ပြည် မွန်ပြည်နယ် တနင်္တာရီ မန္တလေး စစ်ကိုင်း မကွေးတို့တွင်ကျင်းပ ခဲ့ ကြောင်းသိရသည်။