သျှမ်းပြည်မြောက်ပိုင်း မူဆယ်ခရိုင် မုံးကိုးမြို့အတွင်းရှိ စစ်ရှောင်များနှင့် ပရဟိတ (၁၀၀ )ကျော် ကိုဗစ်-၁၉ ကူးစက်ခံ နေရကြောင်း သတင်းရရှိသည်။
ယမန်နေ့ (စက်တင်ဘာ ၂၃) ရက် အထိ မုံးကိုးမြို့အတွင်းရှိ စစ်ဘေးရှောင်စခန်းတွင် တည်းခိုနေထိုင် ရသည့် စစ်ရှောင် (၉၇) ဦး နှင့် ပရဟိတ သမား( ၅) ဦးတို့ ကိုဗစ်-၁၉ ကူးစက်မှု ရှိလာကြောင်း မုံးကိုးမြို့နေ စစ်ဘေး ရှောင်များကို ကူညီထောက်ပံ့ပေးနေသူ တစ်ဦးက သျှမ်းသံတော်ဆင့်ကို ပြောသည်။
“မနေ့က စစ်ရှောင်စခန်းက ဖျားတဲ့သူတွေ၊ နေမကောင်းဖြစ်တဲ့သူတွေကို ကိုဗစ် ရှိမရှိ စစ်ဆေးတာ ၁၈ ဦးတွေ့တယ်၊ ဒါက အရမ်းနေမကောင်းဖြစ်နေတဲ့ သူတွေကိုပဲ ရွေးစစ်ထားတာ၊ အခုဆို စစ်ရှောင်စခန်းက လူနာတွေကို ထားဖို့အတွက် နေရာက တော်တော်ခက်ခဲလာပြီ” ဟု စစ်ရှောင်ကူညီနေသည့် အမျိုးသား တစ်ဦးက ဆိုသည်။
မုံးကိုးမြို့ရှိ စစ်ဘေးရှောင်များကို ပထမအကြိမ်တွင် ဆေးစစ်ရာ ၃၇ ဦး၊ ဒုတိယအအကြိမ်တွင် ၄၂ ဦး၊ တတိယအကြိမ်တွင် ၁၈ ဦး နှင့် ယမန်နေ့ စက်တင်ဘာလ ၂၄ ရက်နေ့တွင် စတုတ္ထအကြိမ် စစ်ဆေးရာ ၁၈ ဦးတွေ့ရှိခဲ့ကြောင်း နှင့် လက်ရှိတွင် စစ်ရှောင်စခန်းမှ ကိုဗစ် – ၁၉ အတည်ပြု ပိုးတွေ့လူနာများ တချို့သည် ပြည်သူ့ဆေးရုံတွင် တက်ရောက်ကုသပေးနေလျက်ရှိကြောင်းလည်း ၎င်းကပြောသည်။
“အခုဆို စစ်ရှောင်စခန်းမှာ ကိုဗစ် လူနာတွေကို ထားဖို့တော့တော်တော်ခက်ခဲလာတယ်၊ အဲ့ကြောင့် စစ်ရှောင် စခန်းက ကိုဗစ်အတည်ပြုလူနာ ၄၀ ဦးကို ပြည်သူ့ဆေးရုံကို ပို့ထားရတယ်” ဟု ၎င်းက ပြောသည်။
စစ်ရှောင်စခန်းတွင် ယင်းကဲ့သို့ ကိုဗစ် – ၁၉ ရောဂါကူးစက်မှု များလာသည့် အတွက်ကြောင့် တိုက်ပွဲငြိမ် သက် ခြင်းမရှိသေးသော်လည်း မန်ခွမ် ဇွပ်ရာရွာ၊ နောင်လျန်ရွာ၊ နမ့်ဟာရွာတို့ မှ မိသားစု ၁၇ စုမှာ နေရပ် ပြန်သွားကြကြောင်းလည်း သိရသည်။
မုံးကိုးမြို့ ဒေသအတွင်းတွင် ဩဂုတ်လ ကုန်ပိုင်းမှစတင်ပြီး ယနေ့ချိန်ထိ စစ်ကောင်စီနဲ့ ကိုးကန့် MNDAA တို့အကြား တိုက်ပွဲ ပြင်းထန်ခဲ့သောကြောင့် ဒေသခံ ကျေးရွာနေ ပြည်သူ ၇၀၀ ကျော်ခန့်က မုံးကိုးမြို့ပေါ်ရှိ ဘာသာရေး ဘုရားကျောင်းနှင့် ဘုန်းကြီးကျောင်းများတွင် ထွက်ပြေး တိမ်းရှောင်နေရကြောင်းသိရသည်။
Leave a Comments