သျှမ်းပြည်မြောက်ပိုင်း မူဆယ်ခရိုင် ပန်ဆိုင်းမြို့အတွင်းရှိ တိုင်းရင်းသားလက်နက်ကိုင် လှုပ်ရှားသည့် နေရာများကို စစ်ကောင်စီမှ လက်နက်ကြီးဖြင့် ရမ်းသမ်းပစ်ခတ်မှု ပြုလုပ်နေကြောင်း သတင်းသိရသည်။

ပန်ဆိုင်းမြို့အတွင်း KIA နှင့် ကိုးကန့်တပ်မတော်တို့၏ သွားလာလှုပ်ရှားရာနေရာများ ဖြစ်ကြသည့် လွိုင်ဖာခမ်း၊ လွိုင်ဖာဖိတ် နှင့် လွိုင်ကောင်းတို့ဖက်ကို လက်နက်ကြီးများဖြင့် ရမ်းသမ်းပစ်ခတ်နေကြောင်း ဖောင်းဆိုင်ဒေသခံများမှ သိရသည်။

“တိုက်ပွဲက ရှိလားမရှိဘူးလားတော့ မသိဘူး၊ စစ်ကောင်စီတွေကတော့ လက်နက်ကြီးတွေနဲ့ ရမ်းပြီး ပစ်နေ ကြတယ်၊ အဲ့နေရာတွေက အရင်တုန်းက KIA လှုပ်ရှားတတ်တဲ့ နယ်မြေတွေပေါ့၊ KIA က MNDAA နဲ့ မဟာမိတ်ဖြစ်ထား လို့စစ်ကောင်စီက လိုက်ပစ်နေတယ်လို့ ထင်ပါတယ်၊ ဒါပေမဲ့ အဲ့နေရာတွေမှာ KIA တွေ ရှိသေးလား မသိပါဘူး” ဟု ဖောင်းဆိုင်းဒေသခံ တစ်ဦးက သျှမ်းသံတော်ဆင့်ကို ပြောသည်။

ပန်ဆိုင်းမြို့ အတွင်း တိုင်းရင်းသားလက်နက်ကိုင်များဖြင့် တိုက်ပွဲဖြစ်ပွားခြင်းများ မရှိသော်လည်း စစ်ကောင်စီတို့ဖက်မှ လက်နက်ကြီးများဖြင့် အကြောင်းမဲ့ ပစ်ခတ်နေခြင်းဖြစ်ကြောင်းလည်း ဒေသခံ တစ်ဦး ကပြောသည်။

“ကျနော်တို့ ပန်ဆိုင်းဒေသအတွင်းမှာ စစ်ကောင်စီတွေက လက်နက်ကြီးတွေနဲ့ရော၊ သေနတ်တွေနဲ့ရော အကြောင်းမဲ့ ပစ်နေကြတာ၊ လွယ်ဖာခမ်း နဲ့ လွယ်ဖာဖိတ် ဖက်ကို ပစ်တာ၊ အသံက နေ့တိုင်းလိုလို ကြားနေရတယ်၊ တိုက်ပွဲဖြစ်နေတာလည်း မဟုတ်ဘူး၊ အကြောင်းမဲ့ ပစ်နေကြတာ” ဟု ၎င်းက ပြောသည်။

ယင်းကဲ့သို့ လက်နက်ကြီးများဖြင့် အကြောင်းမဲ့ ရမ်းသမ်းပစ်ခတ်နေခြင်းများကြောင့် ဒေသခံများအတွက် အနှောင့်အယှက်များစွာ ဖြစ်ရကြောင်း နှင့် စိတ်ဆင်းရဲမှုများလည်း ကြုံနေရကြောင်း သိရသည်။