သျှမ်းတောင် ညောင်ရွှေမြို့နယ် အင်းလေးဒေသခံများ အစားအသောက်နှင့် ဆေးဝါးခက်ခဲမှု ရှိနေကြောင်း သတင်းရရှိသည်။
Stay at home သတ်မှတ်ခံထားရသည့် ညောင်ရွှေမြို့နယ် အင်းလေးဒေသတွင် ကိုဗစ်ကူးစက်မှုကြောင့် ခရီးသွားလုပ်ငန်းရပ်နားထားပြီး နောက်ပိုင်း အလုပ်အကိုင်ခက်ခဲမှုကြောင့် အစားအသာက်နှင့်ဆေးဝါး အခက်ခဲတွေ ကြုံတွေ့လာရတာဖြစ်ကြောင်း ဒေသခံများထံမှ သိရသည်။
“ကျေးရွာအများစုမှာ အခက်ခဲတွေဖြစ်နေကြတယ်၊ ဟဲယာရွာမရွာဆိုရင် သီးနှံ မစိုက်ပျိုးကြဘူး၊ ပန်းထိမ်လုပ်ငန်းပဲ လုပ်ကိုင်တာ၊ ကိုဗစ်ဖြစ်တော့ ပန်းထိမ်လုပ်ငန်းလည်း မလုပ်ရတော့ဘူး၊ ဝင်ငွေလည်း မရှိကြတော့ဘူး၊ စက်လှေမောင်းတဲ့သူတွေလည်း အခက်ခဲဖြစ်နေကြတာ” ဟု အင်းလေးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုဒေသတွင် အစားအသောက် ခက်ခဲမှုအပြင် ဆေးဝါးခက်ခဲမှုများလည်း ရှိနေကြောင်း ဒေသခံများထံမှ သိရှိရသည်။
“သွေးတိုး၊ ဆီးချိုဆေးတွေလို ဆေးကို ရေရှည်စွဲပြီး သောက်နေရတဲ့သူတွေအတွက် ခက်ခဲသွားတာပါ၊ ကုန်ဈေးနှုန်းက တက်၊ အလုပ်အကိုင်က မရှိ၊ ဝင်ငွေက မရှိ တော့ ဆေးတွေ မဝယ်သောက်နိုင်တော့ဘူး၊” ဟု အင်းလေးဒေသမှ ပရဟိတ အသင်းဝင်တစ်ဦးက ပြောသည်။
အင်းလေးဒေသတွင် ကိုဗစ်ကူးစက်မှု လျော့ကျသွားခြင်းမရှိသေးဘဲ ယခုရက်ပိုင်းအတွင်း အင်းလေး တောင်ဘက်ပိုင်းရှိ စံကားဒေသတွင် ကူးစက်မှုမြင့်တက်လာကြောင်း စုံစမ်းသိရသည်။
ထိုအပြင် ကာကွယ်ဆေးထိုးပေးသည့် ဟဲယာရွာမတွင်လည်း လူစုလူဝေးဖြစ်ပေါ်နေသည့်အတွက် ကိုဗစ်ပိုမိုကူးစက်မှာကို ဒေသခံများ စိုးရိမ်နေကြကြောင်း သိရသည်။
ညောင်ရွှေမြို့နယ်တွင် စက်တင်ဘာ (၂၂)ရက် ယမန်နေ့အထိ ကိုဗစ် − ၁၉ ကူးစက်ခံရသူ (၃၀၂၃)ဦးရှိပြီး သေဆုံးသူ (၁၀၁)ဦးနှင့် ဆေးရုံဆင်းခွင့်ရသူ (၂၁၅၃)ဦးရှိနေကြောင်း သိရှိရသည်။
