သျှမ်းပြည်တောင်ပိုင်း၊ ညောင်ရွှေမြို့နယ် အင်းလေးဒေသတွင် စစ်ကော်မရှင်လက်အောက်ခံ သျှမ်းပြည်နယ်အစိုးရ ပေးအပ်သည့် ငလျင်ထောက်ပံ့ကြေးကို ဒေသခံများ အပြည့်အဝ မရရှိကြောင်း သတင်းရရှိသည်။
ပြီးခဲ့သည့် စက်တင်ဘာလ ၈ ရက်တွင် အင်းလေးဒေသသို့ စစ်ကော်မရှင် လက်အောက်ခံ သျှမ်းပြည်နယ် အစိုးရအဖွဲ့မှ ငလျင်ဘေးဒဏ်ခံရသည့် နေအိမ်များအတွက် ငွေကျပ်သန်းပေါင်း ငါးထောင်ကျော် လာရောက်ထောက်ပံ့ခဲ့ကြောင်း သိရသည်။
အဆိုပါ ထောက်ပံ့ငွေများကို သက်ဆိုင်ရာ ကျေးရွာအုပ်ချုပ်ရေးမှူးများက တာဝန်ယူ ခွဲဝေပြီး နှစ်ထပ်အိမ်ဖြစ်လျှင် ငွေကျပ် သိန်း (၁၅၀) ၊ တစ်ထပ်အိမ်နှင့် သစ်သားအိမ်ဖြစ်လျှင် ငွေကျပ် သိန်း (၁၀၀) နှင့် ဝါးအိမ်ဆိုလျှင် ငွေကျပ် သိန်း(၄၀) ထောက်ပံ့မည်ဟု ဆိုသော်လည်း သစ်သားအိမ်နှင့် တိုက်အိမ်များကို ဝါးအိမ်စာရင်းထဲ ထည့်သွင်း၍ ပျှမ်းမျှ ကျပ်ငွေ (၂၅) သိန်းသာ ခွဲဝေပေးကြောင်း အင်းလေးဒေသခံများက ပြောသည်။
“အဲ့တုန်းကတော့ တစ်အိမ်ကို ကျပ် သိန်း ၁၀၀ ကျော်ရမယ်လို့ ကြားလိုက်တာ။ တကယ်ပေးတော့ သစ်အိမ်ရော အုတ်အိမ်ရော အကုန် ဝါးအိမ်စာရင်းထဲ သွင်းပြီး ကျပ် ၂၅ သိန်းလောက်ပဲ ပေးတာ။ ဒါတောင် ငလျင်ဒဏ်ခံရတဲ့အိမ် အကုန်မရကြဘူး။ အုပ်ချုပ်ရေးမှူးအဖွဲ့က ဒီလောက်ရတာတောင် ကံကောင်းနေပြီလို့ ပြောတာ၊ ဘယ်သူမှလည်း အတွန့်မတက်ရဲကြဘူး”ဟု အင်းလေးဒေသခံ အသက် ၃၀ ဝန်းကျင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထိုသို့ ငွေကြေးထောက်ပံ့ရာတွင်လည်း အင်းလေးထဲရှိ ကေလာရွာ၊ ပုလဲဦးရွာ၊ ဟဲယာရွာမ၊ မြောင်းဝကြီးရွာနှင့် ညောင်ဝန်းကျေးရွာ အတွက်သာ ထောက်ပံ့ငွေစာရင်း ပါရှိကြောင်း ဒေသခံများထံမှ သိရသည်။
ပြီးခဲ့သည့် မတ်လ ၂၈ ရက်တွင် လှုပ်ခတ်ခဲ့သော အင်အားပြင်း မန္တလေးငလျင်ကြောင့် အင်းလေးဒေသတွင် နေအိမ် ၄၀၀၀ နီးပါး ပျက်စီးသွားပြီး လူဦးရေ ၄၀ ထက်မနည်း သေဆုံးခဲ့ရသည်။
ထို့အပြင် အင်းလေးဒေသတွင် ရေတက်နေသောကြောင့် ရာသီပေါ်သီးနှံဖြစ်သည့် ပဲ၊ ငရုပ်၊ ဘူးသီး နှင့် ဂေါ်ရခါးသီးများကို မစိုက်ပျိုးနိုင်ကြောင်း၊ ရေကျမှသာ စိုက်ပျိုးရေး လုပ်ကိုင်ရန် အဆင်ပြေမည်ဖြစ်ကြောင်း အင်းလေးဒေသခံ အသက် ၄၀ ဝန်းကျင် အမျိုးသားတစ်ဦးက ပြောသည်။
“အခုက စိုက်ပျိုးရာသီ အချိန်လေ၊ ရေတက်နေတော့ ဘာမှ လုပ်မရဘူး ဝင်ငွေလည်း မရှိဘူး။ ဒီကြားထဲ ပွဲတွေက ဆက်တိုက်လုပ်နေကြတော့ ကူငွေထည့်ဖို့တောင် မနည်း ရုန်းကန်နေရတာ။ အဆင်မပြေပါဘူး၊ စားဖို့တောင် အနိုင်နိုင်နဲ့” ဟု အဆိုပါ ဒေသခံအမျိုးသားက သျှမ်းသံတော်ဆင့်ကို ပြောသည်။
ယမန်နှစ် ၂၀၂၄ ခုနှစ်က အင်းလေးဒေသတွင် ရေကြီးရေလျှံမှု ဖြစ်ပြီး မြေဩဇာဈေးတက်၍ သီးနှံများ စိုက်ပျိုးသူ အနည်းငယ်သာရှိခဲ့ပြီး ဈေးကောင်းမရခဲ့ကြောင်း ၎င်းက ဆက်ပြောသည်။
ငလျင်ဘေးနှင့် ရေဘေးဒဏ် နလန်မထူနိုင်သေးသည့်ကြား အင်းလေး ဖောင်တော်ဦးဘုရားပွဲကို စစ်ကော်မရှင်နှင့် PNO ပြည်သူ့စစ်များက ဦးစီးပြီး ငလျင်ဘေးဒဏ်နှင့် ရေဘေးဒဏ်ခံနေရသည့် ပြည်သူများထံမှ ပိုက်ဆံကောက်ယူကာ စက်တင်ဘာလ ၂၂ ရက်နေ့မှ အောက်တိုဘာလ ၉ ရက်နေ့အထိ စည်ကားသိုက်မြိုက်စွာ ကျင်းပခဲ့သည်။
Leave a Comments