သျှမ်းပြည်တောင်ပိုင်း ပင်လုံမြို့တွင် ကိုဗစ်- ၁၉ ကာကွယ်ဆေးလာရောက်ထိုးသူ များပြားသောကြောင့် ဆေးလုံလောက်မှု မရှိကြောင်း စုံစမ်းသိရှိရသည်။
ထိုသို့ ဆေးလုံလောက်မှုမရှိသောကြောင့် ပြည်သူများက လွိုင်လင်မြို့နယ် သွားရောက်တောင်းထိုးကြရာတွင် ထိုးခွင့်မရကြောင်း ပင်လုံဒေသခံများက ပြောပြသည်။
“ အမှန်က မှတ်ပုံတင်ရှိရုံနဲ့တင် ကာကွယ်ဆေးထိုးလို့ရတယ်။ အခုက ကျနော်တို့ ပင်လုံမှာ ကာကွယ်ဆေးကုန်လို့ လွိုင်လင်မှာသွားထိုးတာ။ လွိုင်လင်က လူမဟုတ်ရင် သူတို့က မထိုးပေးဘူး။ ကျနော်တို့ ဒေသက မထိုးပေးဘူးလားလို့ပြောတယ်။ တကယ်ဆို လွိုင်လင်က မြို့နယ်ဖြစ်တာကြောင့် မိုင်ပွန်၊ ပင်လုံက လာတဲ့သူတွေ မှတ်ပုံတင်ပါရင် ထိုးလိုရသင့်တယ်” ဟု လွိုင်လင်မြို့တွင် ကာကွယ်ဆေးသွားရောက်တောင်းထိုးခဲ့သည့် အမျိုးသားတဦးက ပြောသည်။
ပင်လုံမြို့တွင် ယနေ့ စက်တင်ဘာ (၂၁) ရက်က ကိုဗစ် ၁၉ ပိုးတွေ့လူနာ ၆ ဦးတွေ့ရှိခဲ့ရပြီး၊ ထိုသို့ ကူးစက်မှု မရှိအောင် ပြည်သူများက စိုးရိမ်သောကြောင့် ကာကွယ်ဆေးကို သွားရောက်ထိုးနှံခဲ့ကြောင်းသိရသည်။
“ ပင်လုံမှာက ဒီနေ့ဆေးကုန်သွားပြီး။ ပြည်သူတွေအားလုံးက မထိုးရသေးဘူး။ အဲကြောင့် လွိုင်လင်မှာသွားတောင်းထိုး ကြတယ်။ အဲတာကို လွိုင်လင်က မထိုးပေးဘူး။ လွိုင်လင်မှာလည်း ထိုးတဲ့သူက သိပ်မရှိဘူး။ ကျမတို့လည်း ကိုဗစ် ကူးမှာကြောက်တယ်လေ။ ဒါကြောင့် သွားထိုးကြတာ” ဟု ပင်လုံမြို့ ဒေသခံ အမျိုးသမီးတဦးက ပြောသည်။
ပင်လုံမြို့တွင် တရက်ကို ကိုဗစ်- ၁၉ ကာကွယ်ဆေး အလုံး (၄၀၀) ထိုးပေးကြောင်း သိရသည်။
မြန်မာနိုင်ငံတဝှမ်းတွင် ကိုဗစ် ၁၉ တတိယလှိုင်းကြောင့် ပြည်သူများ ထောင်ချီသေဆုံးခဲ့ရကြောင်း သိရသည်။
