သျှမ်းမြောက် လာရှိုးမြို့တွင် စက်တင်ဘာလ (၂၀)ရက် ယမန့်နေ့ မွန်းလွဲ (၄)နာရီဝန်းကျင်က မိုးသည်းထန်စွာရွာသွန်းမှုကြောင့် လူတစ်ဦး ရေချောင်းအတွင်း မျောပါသေဆုံးခဲ့ပြီး နေအိမ်ပျက်စီးမှုလည်း ရှိခဲ့ကြောင်း သတင်းရရှိသည်။
လားရှိုးမြို့ ရပ်ကွက်(၆)၊ နယ်မြေ (၄)အတွင်း ချောင်းထဲတွင် ယမန်နေ့ မွန်းလွဲ (၄)နာရီဝန်းကျင် က မိုးသည်းထန်စွာရွာသွန်းပြီး ရေစီးနှင့်အတူ အမျိုးသားအလောင်းတလောင်း မျှောပါသေဆုံးခဲ့ကြောင်း ဒေသခံများထံမှ သိရသည်။
“ရေထဲ မျောလာတဲ့သူက ဘယ်နားနေလဲ မသိဘူး၊ ရပ်ကွက် (၆)ထဲကတော့ မဟုတ်ဘူး၊ သူက စိတ်သိပ်မနှံ့ဘူး၊ ချောင်းထဲကို ခုန်ချတာ လို့တော့ တစ်ချို့ကပြောတယ်၊ ကျွန်တော်တော့ သေခြား မသိဘူး” ဟု ရက်ကွက် (၆)ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လားရှိုးမြို့တွင် ပြီးခဲ့သည့် ၂၀၁၈ ခုနှစ် ဇူလိုင်လအတွင်း အိမ်စီးကားတစ်စီး ရေစီးနှင့်အတူ မျှောပါသွားခဲ့ ပြီး ယာဉ်ပေါ်ပါသူ သေဆုံးခဲ့ဖူးကြောင်း သိရှိရသည်။
ထို့အပြင် ယမန်နေ့က မိုးသည်းထန်စွာရွာသွန်းမှုကြောင့် လားရှိုးမြို့ အထက်မန်အိုင်ကျေးရွာရှိ နေအိမ်တစ်အိမ် အုတ်တံတိုင်းပြိုပိပြီး ပျက်စီးခဲ့ရကြောင်း၊ လူထိခိုက်မှု မရှိကြောင်း ဒေသခံများထံမှ သိရသည်။
“မိုးက အရမ်းသည်းပြီး ခြံထဲထိရေဝင်တာပေါ့၊ ပြီးတော့ အုတ်တံတိုင်းနားမှာ ရေသွားစုပြီး အုတ်တံတိုင်း ပြိုကျသွားတာ၊ အိမ်ပေါ်ကို ပိကျသွားတယ်၊ အိမ်ကလည်း ထံရံအိမ်ပဲ၊ လူထိခိုက်တာတော့မရှိပေမယ့် အိမ်တော့ တော်တော်ပျက်စီးသွားတယ်” ဟု ဒေသခံ အမျိုးသားတစ်ဦးက ပြောသည်။
လားရှိုးမြို့တွင် ယခင်က မိုးသည်းထန်စွာ ရွာသွန်းသော်လည်း ရေကြီးရေလျှံမှု ဖြစ်ပေါ်လေ့ မရှိကြောင်း သို့သော် လွန်ခဲ့သည့် (၃)နှစ်ဝန်းကျင်မှ စပြီး ချောင်းရေလျှံမှုများ မကြာခဏ ဖြစ်ပေါ်နေကြောင်း ဒေသခံများထံမှ သိရသည်။
Leave a Comments