သျှမ်းပြည်မြောက်ပိုင်း ကျောက်မဲမြို့ ယမန့်နေ့ (စက်တင်ဘာ ၂၀) ညနေ ၆နာရီ ဝန်းကျင်တွင် စစ်တပ်ပိုင် Mytel တာဝါတိုင်းဖျက်ဆီးခံရကြောင်း စုံစမ်းသိရှိရသည်။

ကျောက်မဲမြို့တွင် လွယ်ခွန်တောင် နှင့် ကျွဲကုန်းကျေးရွာရှိ Mytel တာဝါတိုင်း (၂) ခုလုံးဖောက်ခွဲဖျက်ဆီးခံရပြီး ပစ္စည်းတချို့ ပျက်စီးသွားကြောင်း ကျောက်မဲမြို့ဒေသခံတစ်ဦး က သျှမ်းသံတော်ဆင့်ကို ပြောသည်။

“ မနေ့က အသံအကျယ်ကြီးကြားလိုက်တယ်။ ဒီနေ့ မနက်မှ သိရတယ်။ (၂) ချက်လောက်ကြားရတယ်။ Mytel တာဝါတိုင်က ဖျက်ဆီးခံရတာ ဟုတ်တယ်။ သူတို့ ပစ္စည်းတချို့ကတော့ ပျက်စီးသွားတယ်” ဟု ကျောက်မဲမြို့ ဒေသခံအမျိုးသားတဦးက ပြောသည်။

ထို Mytel တာဝါတိုင်ဖျက်ဆီးခံရပြီးနောက်ပိုင်း ကျောက်မဲမြို့တွင် Mytel Wifi အင်တာနက်လိုင်း ပြတ်တောင်းသွားကြောင်း သိရသည်။

“ မနေ့က Mytel ဖုန်းလိုင်တွေ၊ အင်တာနက်၊ ဝိုင်ဖိုင်တွေ ပျက်သွားတယ်လို့တော့ ပြောတယ်။ ဖုန်းဆက်ရင်လည်း လိုင်းမကောင်းဖြစ်တယ်တဲ့။ အင်တာနက်လည်း သုံးလို့ သိပ်အဆင်မပြေတော့ဘူး။ တစ်ခြားကဒ်တွေနဲ့ ဝယ်သုံးနေကြရတယ်” ဟု ၎င်း က ပြောသည်။

ထို Mytel တာဝါတိုင်းကို မည်သည် အဖွဲ့စည်းက လာရောက်ဖျက်ဆီးသည်ကို မသိရှိရသေးပါ။

ကျောက်မဲမြို့တွင် တိုင်းရင်းသား လက်နက်ကိုင် ဖြစ်သည့် သျှမ်းပြည်ပြန်လည်လွတ်မြောက်ရေးကောင်စီ၊ သျှမ်းပြည်တပ်မတော် (RCSS/SSA) ၊ တပ်ပေါင်းစု တအောင်း( ပလောင်း) အမျိုးသားလွတ်မြောက်ရေးတပ်မတော်(TNLA ) နှင့် သျှမ်းပြည်တိုးတက်ရေးပါတီ( SSPP/SSA)တို့ သွားလာလှုပ်ရှားသည့် ဒေသဖြစ်သည့်အပြင် ပြည်သူ့ကာကွယ်ရေးတပ်(PDF)များလည်းရှိကြောင်းသိရသည်။