သျှမ်းပြည်မြောက်ပိုင်း မူဆယ်ခရိုင်ရှိ မုံးကိုးမြို့နယ်တွင် စစ်ကောင်စီတို့၏ အင်အားတိုးချဲ့ ထိုးစစ်ဆင်မှု ဆက်လက်ပြင်းထန်နေသည့် အတွက် စစ်ဘေးရှောင်နေသည့် ဒေသခံများသည် စားနပ်ရိက္ခာအတွက် ခက်ခဲနေကြောင်း သတင်းသိရသည်။

ယမန်နေ့ ၁၆ ရက်နေ့ ညအချိန်တွင် မုံးကိုးမြို့သို့ စစ်ကူရန်အတွက် လာသည့် စစ်ယာဉ်တန်းမှ စစ်ကောင်စီ တပ်သားတို့သည် ဘောလုံးကွင်းအတွင်းသို့ စခန်းချနားနေပြီး သောက်စားမူးကာ ကြိမ်းမောင်း ပြောဆိုမှုများရှိနေကြောင်း မုံးကိုးမြို့ခံ ပြည်သူတစ်ဦးက သျှမ်းသံတော်ဆင့်ကို ပြောသည်။

“မနေ့က ၆ နာရီဝန်းကျင်လောက်မှာ ဘောလုံးကွင်းထဲက စစ်သားတွေက သောက်စားပြီးမူးနေကြတယ်၊ မူးတာက တော်တော်မူးနေပုံပဲ၊ ဆဲနေသံတွေကြားရတယ်၊ သူတို့က စစ်ကားချည်းလာတာ မဟုတ်ဘူး၊ တင့်ကားပါတယ်၊ နောက်ဖွင့် Vego ကားနဲ့လည်း စစ်သားတွေကို သယ်လာတာ၊ တင့်ကားကတော့ တပ်ထဲမှာ ထားတယ်လို့ ကြားတယ်၊ ဘောလုံးကွင်းမှာမတွေ့ဘူး” ဟု ၎င်းက ပြောသည်။

လက်ရှိတွင် မိုးကိုးမြို့နယ်အတွင်း ပန်ဆိုင်း၊ ကြူကုတ်မြို့တို့တွင် စစ်ကောင်စီတပ် နှင့် ကိုးကန့်တပ်မတော် MNDAAတို့သည် သြဂုတ်လ ၃ ရက်မှ စတင်ကာ နေ့တိုင်းနီးပါး တိုက်ပွဲ ဖြစ်ပွားနေသည်။

ထိုတိုက်ပွဲ ကြောင့် ဒေသခံများလည်း ထွက်ပြေးတိမ်းရှောင်နေရပြီး လက်ရှိတွင် စစ်ဘေးရှောင်များအတွက် စားနပ်ရိက္ခာများလိုအပ်နေကြောင်းလည်း အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။

“အခုဆို တိုက်ပွဲ ကာလလည်း ကြာလာပြီလေ၊ တချို့စစ်ဘေးရှောင်တွေကဆို လာတုန်းက ဘာမှမယူခဲ့ရ တာတွေရှိတယ်၊ ခုလည်း စစ်ဘေးရှောင်တွေက များလာတော့ စားဖို့သောက်ဖို့ ခက်ခဲလာပါပြီ၊ ဆေးဝါးတွေ လည်း လိုအပ်ပါတယ်၊ တတ်နိုင်သလောက် အလှူရှင်တွေကိုတော့ ချိတ်ကြည့်နေပါတယ်၊ ဒါပေမဲ့ လုံလောက်တဲ့ ပမာဏ မရနိုင်သေးပါဘူး” ဟု အထက်ပါ ပုဂ္ဂိုလ်က ပြောသည်။

စစ်ကောင်စီတပ်တို့သည် ဖောင်းဆိုင်မြို့ရှိ ဖောင်းဆိုင်ဆုတောင်းတောင်အနီးရှိ MNDAA တပ်စခန်းကို နှစ်ကြိမ်တိုင်တိုင် လာရောက်တိုက်ခိုက်ရန်လည်း အနိုင်မရသဖြင့် လက်ရှိတိုးချို့လာသော စစ်အင် အားများသည် ယင်းနေရာသို့ ချီတက်တိုက်ခိုက်ရန် ဖြစ်နိုင်ကြောင်းလည်း ဒေသခံများက သုံးသပ်နေကြ သည်။

မုံးကိုးမြို့နယ် ဖောင်းဆိုင်ဘက်တွင် စစ်ကောင်စီ နှင့် MNDAA တို့သည် နှစ်လကျော်သည် အထိ တိုက်ပွဲအရှိန် ပြင်းထန်ခဲ့ပြီး စစ်ကောင်စီဘက်က အကျအဆုံးများခဲ့သည့် အပြင် အဆိုပါ တိုက်ပွဲများကြောင့် ဒေသခံ ၂၀၀၀ ကျော်မှာ မြို့ပေါ်နှင့် တရုတ်နယ်စပ်မျဉ်းပေါ်သို့ မိုးကာတဲဖြင့် ခိုလှုံနေကြကြောင်းလည်း သိရသည်။