ကျောက်မဲ မိုင်းတင်းအုပ်စု စစ်ရှောင် (၃၄) ဦး ကိုဗစ် ထပ်မံကူးခံရ

0

သျှမ်းမြောက် ကျောက်မဲမြို့နယ် မိုင်းတင်းကျေးရွာအုပ်စုအတွင်းရှိ စစ်ရှောင် (၃၄)ဦးထံမှ ယနေ့ (စက်တင်ဘာလ ၁၇ရက်)တွင် ကိုဗစ်ပိုး ထပ်မံတွေ့ရှိခဲ့ရကြောင်း သတင်းရရှိသည်။

ကျောက်မဲမြို့နယ် မိုင်းတင်းကျေးရွာအုပ်စု ပြိန်းခါးနှင့် နားမွန်းစစ်ရှောင်စခန်းတွင် လာရောက်ခိုလှုံ နေသည့် စစ်ရှောင်များထံမှ ကိုဗစ်ပိုးတွေ့ရှိခဲ့ရတာဖြစ်ကြောင်း စစ်ရှောင်ကူညီသူများထံမှ သိရသည်။

“ပြိန်းခါးစစ်ရှောင်စခန်းကနေ (၂၉)ယောက် ပိုးတွေ့တယ်၊ နားမွန်းကတော့ (၅)ယောက်ပါ၊ ကျန်းမာရေးဆိုးရွားတဲ့သူတွေ မရှိဘူး၊ နောက်ပြီး ဘယ်မှာထားမယ်ဆိုတာလည်း သေခြာမသိရသေးဘူး” ဟု စစ်ရှောင်ကူညီနေသည့် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထိုစစ်ရှောင်စခန်းမှ စစ်ရှောင်များ၏ နှာခေါင်း၊ အာခေါင်တို့ဖတ်တို့အား ပြီးခဲ့သည့် စက်တင်ဘာလ (၁၅)ရက်နေ့တွင် လားရှိုးတို့ ပိုဆောင်စစ်ဆေးခဲ့တာဖြစ်ပြီး ယနေ့တွင် အဖြေသိရှိခဲ့ရတာဖြစ်ကြောင်း စစ်ရှောင်ကူညီသူများထံမှ သိရသည်။

ကျောက်မဲမြို့နယ်တွင် ပြီးခဲ့သည့် (၂)လကျော်ကတည်းက တိုင်းရင်းသားလက်နက်ကိုင်များဖြစ်သည့် RCSS/SSA နှင့် SSPP/SSA ၊ TNLA တို့ တိုက်ပွဲ ပြင်းထန်ခဲ့မှုကြောင့် စစ်ရှောင်(၂၅၀၀)ကျော်ထိရှိနေပြီး မြို့ပေါ်ရှိဆွေမျိုးအိမ်တွင် သွားရောက်ခိုလှုံနေသူများလည်း ရှိနေကြောင်း သိရသည်။

ထိုစစ်ရှောင်များထဲမှ ကိုဗစ်ပိုး ကူးစက်ခံရသူ (၂၀၀)ကျော်ရှိနေပြီး မိုးကာနှင့် စားနပ်ရိက္ခာများ ခက်ခဲမှုရှိနေကြောင်း စစ်ရှောင်ကူညီသူများထံမှ သိရသည်။

ကျောက်မဲမြို့နယ်တွင် ယနေ့(စက်တင်ဘာလ ၁၇ ရက်)အထိ ကိုဗစ် − ၁၉ ရောဂါကူးစက်ခံရသူ (၁၂၀၀)ကျော်ရှိနေပြီး သေဆုံးသူ (၇၀)ဝန်းကျင်ထိ ရှိနေကြောင်း သိရှိရသည်။

Leave a Comments