သျှမ်းပြည်တောင်ပိုင်း မိုင်းကိုင်မြို့နယ် ဟိုခဲကျေးရွာအုပ်စု နမ့်အွန်ကျေးရွာအနီး သျှမ်းတပ် (၂) တပ် တိုက်ပွဲကြောင့် စစ်ရှောင် (၁၂၀၀) ခန့် ထွက်ပြေးလာရပြီး အရေးပေါ် စားနပ်ရိက္ခာလိုအပ်နေကြောင်း စုံစမ်းသိရှိရသည်။

ယနေ့ စက်တင်ဘာ (၁၄) ရက် မနက် (၈) နာရီခန့်က စတင်ပြီး နှစ်ဖက် တိုက်ပွဲပြင်းထန်သဖြင့် ဒေသခံများသည် ဟိုခဲကျေးရွာအုပ်စု နောင်လျှော်ကျေးရွာရှိ ဘုန်းကြီးကျောင်းသို့ ထွက်ပြေး တိမ်းရှောင်ခဲ့ရကြောင်း စုံစမ်းသိရှိရသည်။

“ခုလောလောဆယ် အရေးပေါ် လိုအပ်တာကတော့ စားနပ်ရိက္ခာတွေ ဆေးဝါးတွေ မိုးကာ တွေ လိုအပ်နေတယ်” ဟု နောင်လျှော်ကျေးရွာ ဒေသခံ တစ်ဦး က သျှမ်းသံတော်ဆင့် ကိုပြောသည်။

ထိုစစ်ရှောင် (၁၂၀၀) ခန့်ထဲတွင် မိခင်နှင့်ကလေး များ၊ ကိုယ်ဝန်သည်များ လေဖြတ်ရောဂါသည်များ လည်း ပါဝင်ကြောင်း သိရှိရသည်။

“ခဏကလည်း လက်နက်သံတွေ ဆက်တိုက်ကြားနေရတုန်းပဲ။ ကျန်းမာရေး စောင့်ရှောင်မှုတွေလည်း လိုအပ်တာပေါ့နော်” ဟု နမ့်အွန်စစ်ရှောင် တစ်ဦး က သျှမ်းသံတော်ဆင့် ကိုပြောသည်။

သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် သျှမ်းပြည်တိုးတက်ရေး ပါတီ၊ သျှမ်းပြည်တပ်မတော် (SSPP/SSA) တို့သည် ပြီးခဲ့သည် ဇွန်လ ကစပြီး ကျေးသီးမြို့နယ် လွိုင်ဟွန်းတိုက်ပွဲကြောင့် စစ်ဘေးရှောင် (၂၀၀၀) ကျော် ရှိခဲ့သည်။