သျှမ်းတောင် မိုင်းရှူးမြို့နယ်တွင် ပြီးခဲ့သည့် ရက်ပိုင်းတွင် တိုင်းရင်းသားလက်နက်ကိုင်တပ်ဖွဲ့သည့် မြို့ပေါ်အထိ တပ်သားသစ်စုဆောင်းမှုများ ပြုလုပ်ခဲ့ကြောင်း စုံစမ်းသိရသည်။
ပြီးခဲ့သည့် စက်တင်ဘာ (၁၂)ရက် မနက်ပိုင်းက မိုင်းရှူးမြို့ ရပ်ကွက် (၄)အတွင်းရှိ ဒေသခံ(၂၆)ဦးအား သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) မှ တပ်သားသစ် ကောက်ယူစုဆောင်းကြောင်း ဒေသခံများထံမှ သိရသည်။
“အဲ့ဒီနေ့ မနက်အစောပိုင်းက ရပ်ကွက် (၄)ထဲမှာရှိတဲ့ ဒေသခံ (၂၆)ယောက်ကို ခေါ်သွားတယ်လို့ ကြားတယ်၊ အဲ့ထဲမှာ အသက် (၇၀)အရွယ် နားမကောင်းတဲ့ သက်ကြီးတစ်ဦးလည်း ပါသွားတယ်” ဟု မိုင်းရှူးဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
ထိုနေ့တွင် နံနက် (၄)နာရီဝန်းကျင် တစ်ကြိမ်နှင့် (၆)နာရီခွဲဝန်းကျင် တစ်ကြိမ် တစ်ရက်တည်း နှစ်ကြိမ် တပ်သားသစ် ကောက်ယူ စုဆောင်းခဲ့တာဖြစ်ကြောင်း သိရသည်။
ယခင်က ကျေးရွာများအတွင်းသာ တပ်သားသစ်စုဆောင်းမှု ပြုလုပ်ခဲ့ပြီး ယခုရက်ပိုင်းတွင် မြို့ရပ်ကွက်အထိ ဝင်ရောက် တပ်သားသစ်ကောက်ယူမှုပြုလုပ်ခဲ့သည့်အတွက် ဒေသခံများ ထိတ်လန့်ကြောက်ရွံ့ကာ ထွက်ပြေးတိမ်းရှောင် နေရ ကြောင်း ဒေသခံများထံမှ သိရသည်။
ထို့အပြင် တပ်သားသစ်ကောက်ယူပြီးနောက် သျှမ်းတပ်အချင်းချင်း ပြန်လည်တိုက်ခိုက်နေတာကိုလည်း မလိုလားကြောင်း ဒေသခံတစ်ဦးက ဆိုသည်။
“အရင်ကတော့ တပ်သားလုပ်ဖို့ စိတ်ကူးတွေ ရှိခဲ့တယ်၊ ခုက သျှမ်းတပ်အချင်းချင်း ပြန်တိုက်နေကြတာ မို့လို့ တပ်သားသွားလုပ်ဖို့ စိတ်ကို မဝင်စားတော့ဘူး၊ သျှမ်းတပ်အချင်းချင်းတိုက်ခိုက်နေကြတာ တွေလည်း မလုပ်စေချင်ဘူး” ဟု မိုင်းရှူးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုဒေသအတွင်း တပ်သားသစ်ကောက်ယူနေမှုနှင့် ပတ်သက်ပြီး သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) ၏ ပြောရေးဆိုခွင့်ရှိသူထံ ဆက်သွယ်ခဲ့သော်လည်း လက်ခံဖြေကြားခြင်း မရှိခဲ့ပါ။
မိုင်းရှူးမြို့နယ်တွင် ပြီးခဲ့သည့် ဇူလိုင်လအတွင်းမှာလည်း SSPP/SSA မှ တပ်သားသစ် ကောက်ယူစုဆောင်းမှုကြောင့် ကျေးရွာနေဒေသခံများ ထွက်ပြေးတိမ်းရှောင်ခဲ့ရကြောင်း သိရသည်။
