သျှမ်းမြောက် ကျောက်မဲမြို့ မန်ခါစစ်ရှောင်စခန်းမှ ကိုဗစ်ကူးစက်ခံရသူ (၁၀၀)ကျော်ထိ ရှိလာကြောင်း သတင်းရရှိသည်။
ကျောက်မဲ မန်ခါစစ်ရှောင်စခန်းတွင် ပန်ဟုန်၊ လွယ်ကုန်ကျေးရွာတို့မှ စစ်ရှောင် (၂၆၀)ကျော် ရောက်ရှိခိုလှုံနေတာဖြစ်ပြီး ပြီးခဲ့သည့် စက်တင်ဘာ (၁၂)ရက် ယမန်နေ့က ကိုဗစ်ပိုးကူးစက်ခံရသူ ထပ်မံတွေ့ရှိခဲ့ကြောင်း ဒေသခံများထံမှ သိရသည်။
“မန်ခါစစ်ရှောင်စခန်းမှာ ကိုဗစ်ကူးစက်ခံရတာက (၁၀၀)ဝန်းကျင်ထိ ရှိသွားပြီ၊ စခန်းက တစ်ဝက်ကျော်လောက်ကို ကိုဗစ်ကူးစက်ခံထားရတာ၊ ခု စစ်ရှောင်စခန်းနားက စာသင်ကျောင်းမှာ သီးသန့်ထားပြီး ကုသနေတယ်” ဟု ကျောက်မဲ သျှမ်းစာပေနှင့်ယဉ်ကျေးမှုအသင်း ဥက္ကဌ လုင်းလျန်းဟန် က သျှမ်းသံတော်ဆင့်ကို ပြောသည်။
အဆိုပါ စစ်ရှောင်စခန်းတွင် ပြီးခဲ့သည့်ရက်ပိုင်းက ကိုဗစ်ကူးစက်ခံရသူ (၁၉)ဦး တွေ့ရှိခဲ့ရပြီး မိုင်းတင်းကျေးရွာအုပ်စု နမ့်ဆော့စစ်ရှောင်စခန်းတွင်လည်း ကိုဗစ်ကူးစက်ခံရသူ (၂၄)ဦး တွေ့ရှိခဲ့ရကြောင်း သိရသည်။
ထို့အပြင် ကျောက်မဲတွင် ပြီးခဲ့သည့် စက်တင်ဘာ (၁၂)ရက် ယမန်နေ့က ကိုဗစ်ကူးစက်ခံရသူ (၁၂၀)ကျော်ရှိခဲ့ပြီး စစ်ရှောင်ထဲမှ အများဆုံးတွေ့ရှိခဲ့တာဖြစ်ကြောင်း ဒေသခံများထံမှ သိရသည်။
“စစ်ရှောင်စခန်းမှာက အားလုံး စုပြီး နေရတာဆိုတော့ ကိုဗစ်ကူးရင်လည်း အစုလိုက် အပြုံလိုက်ဖြစ်သွားတယ်၊ ရွာမှာနေတော့ ဗုံးသံ၊ သေနတ်သံတွေကြောက်လို့ စစ်ရှောင်ပြေးလာရတယ်၊ ခုက ကိုဗစ်ကူးစက်ခံရတော့ တော်တော်ခက်ခဲနေပြီ” ဟု စစ်ရှောင်များကို ကူညီနေသည့် ကျောက်မဲဒေသခံအမျိုးသားတစ်ဦးက ပြောသည်။
ကိုဗစ်ကူးစက်ခံရသည့် စစ်ဘေးရှောင်များအား ကျောက်မဲခရိုင်ဆေးရုံကြီး၊ မိုးလုံလေလုံခန်းမနှင့် စစ်ဘေးရှောင်စခန်းအနီး စာသင်ကျောင်းတို့တွင် သီးသန့်ထားရှိထားကြောင်း သိရသည်။
ကျောက်မဲမြို့နယ်တွင် စက်တင်ဘာ (၁၂)ရက် ယမန်နေ့အထိ ကိုဗစ်ကူးစက်ခံရသူ (၁၁၁၃)ဦးရှိပြီး ဆေးရုံဆင်းသူ (၇၄၆)ဦးနှင့် သေဆုံး (၆၂)ဦး ရှိနေကြောင်း သိရသည်။
