မြန်မာ – တရုတ် နယ်စပ်ရှိ သျှမ်းပြည်မြောက်ပိုင်း နမ့်ခမ်းမြို့နယ် ဟတ်ဟင်ကျေးရွာ အနီး တရုတ်ဘက်မှ နယ်မြေခြံစည်းရိုးခတ်မှု သည် မြန်မာဘက်ခြမ်း စည်းကျော်ပြီးလာရောက်ကာထားသဖြင့် ဒေသခံ ပြည်သူများ သွားရောက်ဖျက်ဆီးခဲ့ကြောင်း စုံစမ်းသိရှိရသည်။
တရုတ်ဘက်ခြမ်းမှ စည်းကျော်ပြီး လာခတ်သည့် ခြံစည်းရိုးကို ယမန်နေ့ (စက်တင်ဘာ ၁၂) ရက် ညနေ (၆) နာရီ တွင် ဒေသခံ ပြည်သူ (၁၀၀) ခန့် သွားရောက် ဖျက်ဆီးခဲ့ကြောင်း သိရှိရသည်။
“တရုတ်ဘက်က ခြံစည်းရိုး (၂) ထပ် လာကာထားတယ်။ ပထမ တစ်ခါ လာကာတုန်းကတော့ သူတို့ ဘက်ခြမ်းပဲ။ ဒီဒုတိယ တစ်ကြိမ်လည်းပဲ စည်းကျော်လာတယ်” ဟု ဟတ်ဟင်ကျေးရွာ မှ ဒေသခံ တစ်ဦး က သျှမ်းသံတော်ဆင့် ကိုပြောသည်။
တရုတ်ဘက်ခြမ်းမှ ခြံစည်းရိုးမခတ်ခင်ကာလတွင် ဒေသခံ အချင်းချင်း ညှိနှိုင်းဆွေးနွေးမှုများရှိပြီး ထိုကာလသည် တရုတ်ဘက်က ဒေသခံများ သဘောတူကြောင်း စုံစမ်းသိရှိရသည်။
“တစ်ခါတားဖူးတယ်။ သူတို့ ခြံစည်းရိုးမလုပ်ခင်တုန်းက သူတို့လည်း သဘောတူတယ်။ပြောတဲ့အတိုင်း မလိုက်လုပ်တော့ ကျနော်တို့လည်း သွားရောက်ဖျက်ဆီးခဲ့တယ်။ ကျနော်တို့ ဘိုးဘွားပိုင် မြေတွေ ဖြစ်တဲ့အတွက်သွားဖျက်လိုက်တာပါ။” ဟု ဟတ်ဟင်ကျေးရွာ မှ ဒေသခံ တစ်ဦး ကပြောသည်။
မြန်မာ – တရုတ် နယ်စပ်မျဉ်းမှာ ရှိသည့် ကျေးရွာအုပ်စုများသည် ယခုလို မကြာခဏ တရုတ်ဘက်ခြမ်းမှ စည်းကျော်ပြီး ခြံစည်းရိုးများ လာရောက်ခတ်ထားသည်ကို ဒေသခံများလည်း သွားရောက် ဖျက်ဆီးခဲ့ရ ကြောင်းသိရသည်။
Leave a Comments