သျှမ်းမြောက် ကျောက်မဲမြို့နယ်တွင် ရောက်ရှိနေသည့် စစ်ရှောင်ပြည်သူများ ကိုဗစ်ကူးစက်ခံရမှု မြင့်တက်နေကြောင်း သိရသည်။
ကျောက်မဲမြို့ မန်ခါစစ်ရှောင်စခန်းနှင့် နမ့်စော့စစ်ရှောင်စခန်းတွင် ပြီးခဲ့သည့် စက်တင်ဘာလ (၉)ရက်နေ့က ကိုဗစ်ပိုး ကူးစက်ခံရသူ (၃၄)ဦးထိ တွေ့ရှိခဲ့တာဖြစ်ကြောင်း ဒေသခံများထံမှ သိရသည်။
“မနေ့က (၂၄)ယောက်ထိ ကိုဗစ်ပိုး တွေ့ခဲ့တယ်၊ နေမကောင်းတာလည်း မရှိဘူး၊ ချောင်းဆိုးတာလည်းမရှိဘူး၊ ဒါပေမယ့် ကိုဗစ်ပိုးတွေ့ခဲ့တာ၊ ဒီမှာရှိတဲ့သူအားလုံးကို စစ်ဆေးတာပါ” ဟု နမ့်ဆော့စစ်ရှောင်စခန်းမှ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အဆိုပါစစ်ရှောင်စခန်းတွင် ပြီးခဲ့သည့် ရက်ပိုင်းက စစ်ရှောင်(၂)ဦး ကိုဗစ်ပိုး တွေ့ရှိခဲ့ရပြီး ယမန်နေ့က (၂၄)ဦးထိ ထပ်မံတွေ့ရှိခဲ့ရတာဖြစ်ကြောင်း၊ ထို့အပြင် မန်ခါစစ်ရှောင်စခန်းတွင်လည်း ကိုဗစ်ကူးစက်ခံရသူ (၁၀)ဦး ထပ်မံတွေ့ရှိခဲ့ကြောင်း သိရသည်။
ကျောက်မဲမြို့ မိုင်းတင်းကျေးရွာအုပ်စုအတွင်း နမ့်ဆော့၊ တာလုံ၊ ပိန်းခါးနှင့် နားမွန်းစစ်ရှောင် စခန်းတို့ရှိနေပြီး ကျန်ရှိသည့် စစ်ရှောင်စခန်းများကိုလည်း ထပ်မံစစ်ဆေးသွားဖို့ရှိကြောင်း သိရသည်။
“မိုင်းတင်းကျေးရွာအုပ်စုထဲမှာကို စစ်ရှောင်စခန်းက (၄)ခုထိ ရှိတယ်၊ တခြားစခန်းကို အခြေနေ သွားကြည့်ရဦးမယ်၊ ကျန်းမာရေးမကောင်းတဲ့သူတွေရှိရင်တော့ ထပ်စစ်ဆေးကြည့်ရမယ်၊ ခုက ကိုဗစ်ကာကွယ်ရေးသုံးပစ္စည်းတွေ လိုအပ်နေတယ်” ဟု ကျောက်မဲစစ်ရှောင်ကူညီသူ အမျိုးသမီး တစ်ဦးက ပြောသည်။
ကျောက်မဲမြို့နယ် မိုင်းငေါ့မြို့ရှိ တာလုံစစ်ရှောင်စခန်းတွင်လည်း ပြီးခဲ့သည့်ရက်ပိုင်းက ကိုဗစ် ကူးစက်ခံရသူ (၁၂)ဦး တွေ့ရှိခဲ့ရကြောင်း ဒေသခံများထံမှ သိရသည်။
ကျောက်မဲမြို့နယ်တွင် စက်တင်ဘာ (၉)ရက် ယမန်နေ့အထိ ကိုဗစ်ကူးစက်ခံရသည့် စစ်ဘေးရှောင်ပြည်သူ (၅၇)ဦးထိ တွေ့ရှိခဲ့ရပြီး တချို့စစ်ရှောင်စခန်းတွင် ကျန်းမာရေးမကောင်းသည့် စစ်ရှောင်များလည်း ရှိနေကြောင်း စုံစမ်းသိရသည်။
ကျောက်မဲမြို့နယ်တွင် တိုင်းရင်းသားလက်နက်ကိုင်များဖြစ်သည့် RCSS/SSA နှင့် SSPP/SSA ၊ TNLA တို့ တိုက်ပွဲဖြစ်ပွားမှုကြောင့် ပြီးခဲ့သည့် ဇူလိုင်လနှင့်သြဂုတ်လတွင် စစ်ရှောင်ထွက်ပြေးရသူ ထောင်ချီရှိခဲ့ကြောင်း သိရသည်။
