သျှမ်းပြည်တောင်ပိုင်း ဆီဆိုင်မြို့နယ်အတွင်း ကိုဗစ်-၁၉ စည်းကမ်းလိုက်နာမှု အားနည်းသဖြင့် ရောဂါကူးစက်သူ လျော့နည်းသွားမှု မရှိကြောင်း စုံစမ်းသိရှိရသည်။
ဆီဆိုင်မြို့နယ်က ပြည်သူများသည် ကိုဗစ်-၁၉ စည်းကမ်းလိုက်နာမှု အားနည်းခြင်း၊ ပိုးတွေ့လူနာ နေ့တိုင်း တိုးလာခြင်း၊ အပြင်ထွက်လျှင် နှာခေါင်းစည်း တပ်မှု အားနည်းသည့်အတွက် လူနာတိုးလာခြင်းဖြစ်ကြောင်း သိရှိရသည်။
“ပိုတိုးလာတယ်။ စည်းကမ်းလိုက်နာမှု အားနည်းတယ်။ပိုးတွေ့တဲ့သူတွေ နေ့တိုင်း တောက်လျောက် တွေ့နေတယ်” ဟု ဆီဆိုင်ဒေသခံ ပရဟိတ တစ်ဦး ကပြောသည်။
ဆီဆိုင်မြို့နယ်ရှိ ကိုဗစ်-၁၉ အတည်ပြု လူနာများထဲမှ ကျန်းမာရေး ကောင်းမွန်တဲ့သည့် လူနာများကို ဆီဆိုင် အထက ကျောင်းမှာ ကုသမှု ထားထားကြောင်း ဆီဆိုင်ဒေသခံ များထံမှ စုံစမ်းသိရှိရသည်။
“အထကမှာ ထားတဲ့သူတွေက ပိုးတွေ့ ကျန်းမာတဲ့သူတွေပဲ။ ကျန်းမာရေး ဆရာမ တစ်ယောက် ထားပေးထားပါတယ်။ အဲ့လူနာတွေထဲက ရောဂါအခြေနေဆိုးလာရင် ဥပမာ အောက်စီဂျင် လိုအပ်တဲ့သူတွေကို ဆေးရုံကို ရွေ့ပါတယ်” ဟု ဆီဆိုင် ပရဟိတ တစ်ဦး ကပြောသည်။
ဆီဆိုင်မြို့နယ် ပြည်သူ့ဆေးရုံသည် ကုတင် (၅၀) ခန့်သည့် ဆေးရုံသာဖြစ်သည့်အတွက် တခြားသော ရောဂါသည်များလည်း ရှိနေသည့်အတွက် အထက ကျောင်းမှာ ထားရခြင်း ဖြစ်ကြောင်း သိရှိရသည်။
“ဆေးရုံက သေးသေးလေး ကုတင် (၅၀) ခန့်ပဲဖြစ်တယ်။ လူနာက (၃၀၀) နီးပါးရှိတယ်။ ဆေးရုံဘယ်ဆန့်ပါ့မလဲ။ ပြီးရင် အခြား ရောဂါသည်တွေလည်း ရှိသေးတယ်” ဟု ဆီဆိုင် ဒေသခံ အမျိုးသား တစ်ဦး ကပြောသည်။
ယနေ့ စက်တင်ဘာ (၉) ရက်နေ့ထိ ဆီဆိုင်မြို့နယ်မှာ ကိုဗစ်-၁၉ အတည်ပြုသူ စုစုပေါင်း (၅၁၆) ဦး၊ ဆေးရုံဆင်းခွင့်ရသူ (၂၂၇) ဦး ၊ သေဆုံးသူ (၁၃) ဦး နှင့် လက်ရှိကုသမှု ခံယူသူ (၁၇၆) ဦးရှိကြောင်း သိရှိရသည်။
Leave a Comments