သျှမ်းပြည် တောင်ပိုင်း တောင်ကြီးမြို့တွင် နိုင်ငံရေးလှုပ်ရှားမှုနှင့် စစ်အာဏာရှင်လှုပ်ရှားမှုများတွင် ပါဝင်ခြင်း မရှိသည့် လူငယ် တစ်ဦးကို အာဏာသိမ်း စစ်ကောင်စီမှ ရိုက်နှက် ဖမ်းဆီးခေါ်ဆောင်သွားကြောင်း သတင်းသိရသည်။
မြေပြင်တွင် နိုင်ငံရေး လှုပ်ရှားမှု မရှိရုံသာမက ဆိုရှယ်မီဒီယာအွန်လိုင်းပေါ်မှာလည်း နိုင်ငံရေးနှင့် ပက်သက် သော အကြောင်းအရာ တင်ခြင်းများလည်း မရှိသည့် တောင်ကြီးမြို့ ချမ်းသာရပ်ကွက် နယ်မြေ (၈) နေ မောင်ဇော်ဇော်ဝင်း အမည်ရှိ လူငယ်ကို ယမန်နေ့ (စက်တင်ဘာ ၇ )ရက် ည ၁၁ ကျော်အချိန်တွင် စစ်ကောင်စီတို့က အိမ်ခန်းထဲထိ ဝင်ရောက်ဖမ်းဆီးခေါ်ဆောင် သွားကြောင်း ဒေသခံ တစ်ဦးက သျှမ်းသံတော်ဆင့်ကို ပြောသည်။
“သူ (မောင်ဇော်ဇော်ဝင်း)က သာမာန်ပြည်သူတစ်ဦးပါပဲ၊ သူ့မှာ နိုင်ငံရေးလှုပ်ရှားမှုလည်း မရှိပါဘူး၊ ပြီး တော့ ဆိုရှယ်မီဒီယာမှာလည်း ဘာမှမတင်တာ ၄ လ လောက်ရှိနေပြီတဲ့၊ စစ်ကောင်စီတွေက နေအိမ်ဝင်းတံ ခါးကို ဖျက်ပြီးဝင်တယ်၊ တချို့က အုတ်တံတိုင်းကို ကျော်ပြီးဝင်တယ် အင်အား ၂၀ ကျော်နဲ့ လာဖမ်းသွား တယ်” ဟု တောင်ကြီးမြို့နေ ဒေသခံတစ်ဦးက သျှမ်းသံတော်ဆင့်ကို ပြောသည်။
မောင်ဇော်ဇော်ဝင်းသည် ချမ်းသာရပ်ကွက်တွင် မိဘများနှင့် အတူနေထိုင်သည့် ကုမ္ပဏီ ဝန်ထမ်းတစ်ဦး ဖြစ်ပြီး စစ်ကောင်စီတို့မှ နာမည်စာရင်းဖြင့် လာရောက်ရှာဖွေကာ အကြောင်းရင်းကို ပြောပြချင်း မရှိဘဲ ဖမ်းဆီးခေါ်ဆောင်သွားကြောင်း နီးစပ်သူတစ်ဦးက သျှမ်းသံတော်ဆင့်ကို ပြောသည်။
“မောင်ဇော်ဇော်ဝင်းဆိုတာ ဘယ်တစ်ယောက်လဲဆိုပြီးတော့ အိမ်ထဲဝင်လာတာ၊ ပြီးတော့ မဆိုင်တဲ့သူတွေ အပြင်အကုန်ထွက်ဆိုပြီး သေနတ်ကြီးနဲ့ ချိန်ပြီးပြောတာ၊ ဘာကြောင့်ဖမ်းလဲဆိုတာကို အိမ်သားတစ်ဦး မေးတော့ စစ်သားတစ်ယောက်က ပါးရိုက်ပြီး ခြေထောက်နဲ့ ဆောင့်ကန်လိုက်သေးတယ်” ဟု အထက်ပါ ပုဂ္ဂိုလ် ပြောသည်။
လက်ရှိတွင် မောင်ဇော်ဇော်ဝင်းကို ဘာကြောင့် ဖမ်းခေါ်သွားသည်ကို မသိရှိရသည့်အပြင် မည်သည့်နေရာသို့ ဖမ်းဆီးထားကြောင်းလည်းမသိရကြောင်း၊ မိသားစုဝင်များ အလွန်စိုးရိမ်ပူပန်နေကြောင်းလည်း သိရသည်။
စစ်ကောင်စီတို့သည် နိုင်ငံတော် အာဏာကို သိမ်းယူပြီးနောက် အာဏာရှင် ပြုတ်ချရေး ဆန္ဒပြတောင်းဆိုသူ များ အပါအဝင် နိုင်ငံရေးနှင့်ပက်သက်ဆက်နွယ်မှုမရှိသည့် သျှမ်းပြည်အတွင်းမှလူငယ်လူရွယ်များစုစုပေါင်း ၅၀၀ နီးပါးတို့သည် အကြောင်းပြချက်မရှိဘဲ စစ်ကောင်စီတို့၏ မတရား ဖမ်းဆီးခေါ်ဆောင်မှုကို ခံထားရ ပါသည်။
Leave a Comments