သျှမ်းပြည်တဝှမ်းတွင် ကိုဗစ် ၁၉ ကူးစက်ခံရမှု များပြားနေသော်လည်း ပြည်သူများတချို့ mask တပ်ဆင်ပြီး အပြင်သွားလာခြင်းမရှိသေးကြောင်း စုံစမ်းသိရှိရသည်။

ကိုဗစ် ကူးစက်မှု မလျော့ကျသေးသည့်အတွက် mask ကို စနစ်တကျတပ်ဆင်ပေးပါရန်အတွက် သျှမ်းမြောက် မူဆယ်မြို့ ပရဟိတ အဖွဲ့က ပြောသည်။

“ ဒီမှာက mask မတပ်ဘဲ သွားလာနေတာက များတယ်။ ကိုဗစ် အရမ်းကျလာတာတော့မဟုတ်သေးဘူး။ အပြင်သွားရင်တော့ mask ကို စနစ်တကျတပ်စေချင်တယ်။ mask မတပ်တဲ့သူက အရမ်းများနေသေးတယ်။” ဟု မူဆယ်မြို့ ပရဟိတ အဖွဲ့က ပြောသည်။

အလာတူ စက်တင်ဘာ ၁ ရက်နေ့မှ စပြီး သျှမ်းရှေ့ တာချီလိတ်မြို့တွင်လည်း ပြည်သူများက ပုံမှန်အတိုင်းသွားလာနေပြီး mask တပ်ပြီး အပြင်သွားလာမှုလည်း များလာကြောင်း သိရသည်။

ထိုအပြင် တာချီလိတ်မြို့ရှိ စားဝတ်နေရေး ခက်ခဲလာသောကြောင့် ပြည်သူများသည် ကိုဗစ် ၁၉ နှင့်အတူ နေထိုင် သွားနိုင်ရန် အတွက်သာ ကြိုးစားနေကြကြောင်းသိရသည်။

“ ကျနော်တို့ ကြည့်ရတာက ပြည်သူတွေက ဒီကိုဗစ် နဲ့ပဲ အတူနေဖို့ကြိုးစားနေကြရတော့တယ်။ စားဝတ်နေရေးအတွက် ခက်ခဲလာတော့ အပြင်ထွက်ရှာရပြီလေ။ အဲကြောင့် သူတို့တွေလည်း ကိုဗစ် နဲ့ အတူနေသွားနိုင်ဖို့ပဲ ကြိုးစား နေကြရတယ်” ဟု တာချီလိတ်မြို့ ပရဟိတအဖွဲ့က ပြောသည်။

အလားတူ သျှမ်းတောင်တောင်ကြီးမြို့တွင်လည်း မနက်ခင် ဈေးဝယ်သည့် အချိန်တွင် ပြည်သူများ အနေဖြင့် ဈေးသွားဝယ်ရာတွင် လူစုဝေးမှုဖြစ်ပွားနေပြီး တချို့ပြည်သူများက mask တပ်ထားခြင်းမရှိကြောင်း သိရသည်။
“ ပုံမှန်ဆို mask မတပ်တာက မရှိသလောက်နည်းပါတယ်။ ဒါမဲ့ မနက်ခင်းပိုင်းဈေးသွားဝယ်တဲ့ အချိန်မှာဆိုရင် တချို့တွေက mask မတပ်တာတွေရှိနေသေးတယ်။ ပြီးတော့ ဈေးနေ့တွေဆိုလည်း လူတွေတော့ များတယ်လေ။ စုဝေးနေတာတွေတော့ ရှိတယ်” ဟု တောင်ကြီးမြို့ ပရဟိတ အသင်း မှ အဖွဲ့ဝင်တစ်ဦး က ပြောသည်။
ထိုသို့ ကိုဗစ် ၁၉ ပြန့်ပွားနေချိန်တွင် ပြည်သူများအနေဖြင့် အပြင်သွားပါက မဖြစ်မနေ mask များကို တပ်ပေးကြရန်အတွက် ထပ်မံပြောဆိုခဲ့သည်။
“ ဖြစ်နိုင်ရင်တော့ ဘယ်သွားသွား mask တပ်စေချင်တယ်။ အပြင်သွားတိုင်း mask တပ်ပေးပါ။ ကိုဗစ်က ကျဆင်းသွားပြီးမဟုတ်ဘူး။ ကူးစက်နေသေးတယ်။ ပြည်သူတွေအားလုံးလည်း ပူးပေါင်းပြီး ဒီကိုဗစ်ကို တိုက်ထုတ်ပေးကြပါ။ စည်းကမ်းရှိပေးကြပါ။” ဟု ပရဟိတ အဖွဲ့များက ပြောသည်။

သျှမ်းပြည်အတွင်း ကိုဗစ်-၁၉ ကြောင့် နေ့စဉ်နဲ့အမျှ သေဆုံးမှု ရှိပြီး၊ မြို့ပေါ်သာမက ကျေးရွာများတွင်လည်း ကိုဗစ်-၁၉ ကူးစက်မှုနှုန်းရှိနေကြောင်း သိရသည်။