ကရင်နီပြည် လွိုင်ကော်မြို့နယ်တွင် ယနေ့ စက်တင်ဘာလ ၉ ရက်နေ့ ၃ နာရီ ဝန်းကျင် အချိန်တွင် စစ်ကောင်စီမှ လက်နက်ကြီး လက်နက်များစွာတို့ဖြင့် ရမ်းသမ်းပစ်ခတ်နေကြောင်း သတင်းသိရသည်။
ယနေ့ စက်တင်ဘာလ ၉ ရက်နေ့ မွန်းလွဲပိုင်း ၃ နာရီအချိန်တွင် လွိုင်ကော်မြို့နယ်ရှိ ဒေါပိုးစီကျေးရွာတွင် စစ်ကောင်စီတို့သည် ဦးတည်ချက်မရှိပဲ လက်နက်ကြီး လက်နက်ငယ်တို့ဖြင့် ရမ်းသမ်းပစ်ခတ်နေသည့် ပစ်ခတ်သံများ ဆူညံစွာ ကြေားနေရကြောင်း ကရင်နီဌာနေမှ ဒေသခံ သတင်းအရင်းအမြစ်တစ်ဦးက သျှမ်းသံတော်ဆင့်ကို ပြောသည်။
“စစ်ကောင်စီတွေက ရွာထဲမှာ တပ်စွဲထားတာ တစ်ပတ်လောက်ရှိနေပြီဗျ၊ ဒေါပိုးစီးကျေးရွာမှာပေါ့၊ ပြီးတော့ ပြည်သူပိုင် ကြက်တွေ ဘဲတွေကိုလည်း သတ်ဖြတ်စားသောက်ကြသေးတယ်၊ ဒီနေ့တော့ ၃ နာရီဝန်းကျင် ကနေ စပြီး သေနတ်သံတွေ စကြားရတယ်၊ ဘယ်အဖွဲ့နဲ့ ပစ်နေမှန်းလည်း မသိဘူး၊ ရမ်းသမ်းပြီး ပစ်နေတာ” ဟု ကရင်နီဌာနေမှ ဒေသခံ သတင်းအရင်းအမြစ် တစ်ဦးက သျှမ်းသံတော်ဆင့်ကို ပြောသည်။
ဒေါပိုးစီကျေးရွာသည် လွိုင်ကော်-ဒီးမော့ဆို ကားလမ်းပေါ်တွင် တည်ရှိပြီး လွိုင်ကော်မြို့နှင့် စံပြ ၆ မိုင်ကျေးရွာ အကြားတွင် တည်ရှိနေကြောင်းလည်း သိရသည်။
လက်ရှိတွင် ဖြစ်ပွားနေသည့် ပစ်ခတ်မှုများမတိုင်ခင် နာရီပိုင်းအလိုတွင် လွိုင်ကော်မြို့မှ ဒီမော့ဆို့ဖက်သို့ ဦးတည်သွားနေသည့် စစ်သား အင်အား ၁၀၀ ခန့်ကလည်း ၆ မိုင် စံပြကျေးရွာအနီးမှာ တွေ့မြင်ရကြောင်း လည်း မျက်မြင်တွေ့ရှိရသည့် ပြည်သူတစ်ဦးက သျှမ်းသံတော်ဆင့်ကို ပြောသည်။
လက်ရှိအချိန်တွင် ဒေါပိုးစီကျေးရွာအတွင်း အကြမ်းဖက်စစ်ကောင်စီ အင်အား ၂၀၀ ခန့် တပ်စွဲထားပြီး မည်သည့်အဖွဲ့နှင့် ပစ်ခတ်နေသည်ကို မသိရှိရသေးကြောင်းလည်း ကရင်နီသတင်းရင်းမြစ် PKPF က ဖော်ပြထားသည်။
Leave a Comments