သျှမ်းမြောက် သီပေါမြို့နယ် နမ့်လန်ဒေသတွင်း ကိုဗစ်ကူးစက်မှုမြင့်တက်နေသည့်အတွက် ယခု ရက်ပိုင်းအတွင်း Lock down သတ်မှတ်သွားမည်ဖြစ်ကြောင်း သိရသည်။
နမ့်လန်ဒေသတွင် ဒေသခံများ ပူးပေါင်းပါဝင်မှု အားနည်းနေခြင်းကြောင့် ကိုဗစ်ကူးစက်မှု မြင့်တက်နေတာဖြစ်ကြောင်း၊ လာမည့် စက်တင်ဘာလ (၉)ရက်နေ့မှစပြီး Lock down သတ်မှတ်ထားကြောင်း စုံစမ်းသိရသည်။
“ဒီလ (၉)ရက်နေ့ကစပြီး Lock down (၇)ရက် သတ်မှတ်လိုက်တယ်၊ ဒီရက်ပိုင်း ကိုဗစ်ကူးစက်မှုက အရမ်းမြင့်တက်လာတယ်၊ ဒေသခံတွေလည်း စည်းကမ်းလိုက်နာမှု အားနည်းလွန်းတယ်” ဟု နမ့်လန်ဒေသခံ အမျိုးသားတစ်ဦး က သျှမ်းသံတော်ဆင့်ကို ပြောသည်။
နမ့်လန်ဒေသတွင် ယခုလအတွင်း သတ်မှတ်ထားသည့် lock down ကာလအတွင်း နံနက် (၆)နာရီမှ (၁၀)နာရီအထိသာ အပြင်ထွက်ခွင့်ရှိကြောင်း သိရသည်။
ထို့အပြင် နေအိမ်တွင်းသေဆုံးသူထံမှ ကိုဗစ်ရောဂါပိုး တွေ့နေရသည့်အတွက် ဒေသခံများ ပိုပြီး သတိထားသင့်ကြောင်း၊ သတ်မှတ်ထားသည့်စည်းကမ်းများလည်း ပိုမိုလိုက်နာစေလိုကြောင်း ဒေသခံတစ်ဦးက ဆိုသည်။
“ဖြစ်နိုင်ရင် တစ်အိမ်တစ်ယောက်ပဲ ထွက်ကြ၊ သတ်မှတ်ထားတဲ့စည်းကမ်းတွေလိုက်နာကြဖို့လိုတယ်၊ ခုက နေအိမ်တွင်း သေဆုံးတဲ့သူမှာလည်း ကိုဗစ်ပိုး တွေ့နေရတာဆိုတော့ ပိုပြီးသတိထားသင့်တယ်” ဟု အဆိုပါ ဒေသခံ အမျိုးသားတစ်ဦးက ပြောသည်။
ပြီးခဲ့သည့် စက်တင်ဘာလ (၅)ရက်နေ့ညပိုင်းက နမ့်လန်ဒေသ ပင်စင်ရပ်ကွက်တွင် နေအိမ်အတွင်း သေဆုံးသူ သက်ကြီးအမျိုးသမီးတစ်ဦးထံမှ ကိုဗစ်ပိုး စစ်ဆေးတွေ့ရှိခဲ့တာဖြစ်ကြောင်း သိရသည်။
နမ့်လန်ဒေသအပါအဝင် သီပေါမြို့နယ်သည် ပြီးခဲ့သည့် ဇူလိုင်လ (၁၃)ရက်နေ့ကတည်းက Stay at home သတ်မှတ်ခံထားရတာဖြစ်ပြီး သီပေါ မြို့မဈေး၊ ဝက်ဝံပျံကျဈေးနှင့် နမ့်လန်မြို့မဈေးတို့အား စက်တင်ဘာလ (၁၄)ရက်နေ့အထိ ဆက်လက်ပိတ်ထားမည်ဖြစ်ကြောင်း သိရသည်။
သီပေါမြို့နယ်တွင် စက်တင်ဘာလ (၇)ရက် ယနေ့နံနက်ပိုင်းအထိ ကိုဗစ် − ၁၉ ကူးစက်ခံရသူ (၁၂၀၀)ကျော်ရှိနေပြီး နမ့်လန်ဒေသမှ ကူးစက်သူ (၂၅၀)နှင့် သေဆုံးသူ (၂၁)ဦးထိ ရှိနေကြောင်း သိရသည်။
