သျှမ်းမြောက် ကျောက်မဲမြို့ မန်ခါဘုန်းကြီးကျောင်းစစ်ရှောင်စခန်းတွင် စက်တင်ဘာလ (၆)ရက် ယမန်နေ့က ကိုဗစ်ပိုး ကူးစက်ခံရသူ (၁၁)ဦး တွေ့ရှိခဲ့ကြောင်း စုံစမ်းသိရသည်။

ထိုစစ်ရှောင်များသည် မန်ခါစစ်ရှောင်စခန်းသို့ သြဂုတ်လကုန်ပိုင်းတွင် ရောက်ရှိလာသူများဖြစ်ပြီး၊ စစ်ရှောင် တွင် (၂၆၀)ကျော်ရှိပြီး ကျန်ရှိသည့် စစ်ဘေးရှောင်များအား ယနေ့တွင် ကိုဗစ်စစ်ဆေးသွားမှာဖြစ်ကြောင်း သိရသည်။

“မနေ့က မန်ခါစစ်ရှောင်စခန်းကနေ (၁၁)ယောက် ကိုဗစ်ပိုးတွေ့ခဲ့တာပါ၊ သူတို့ကို ဆေးရုံမှာ ခေါ်ထားပြီး ဆေးကုသပေးနေပြီ၊ ဒီနေ့ ကျန်တဲ့သူတွေ၊ အတည်ပြုလူနာနဲ့ ထိတွေ့တဲ့သူတွေကို သွားစစ်ဆေးပေးဖို့ရှိတယ်” ဟု ကျောက်မဲခရိုင်ဆေးရုံအုပ်က သျှမ်းသံတော်ဆင့်ကို ပြောသည်။

အဆိုပါ စစ်ရှောင်စခန်းတွင် ပန်ဟုန်း၊ လွယ်ကုန်ကျေးရွာဒေသခံများ ရောက်ရှိခိုလှုံနေတာဖြစ်ပြီး ပြီးခဲ့သည့် သြဂုတ်လကုန်ပိုင်းက ပန်စလော့စစ်ရှောင်စခန်းမှ မန်ခါဘုန်းကြီးကျောင်းစစ်ရှောင်စခန်းသို့ ပြောင်းရွှေ့လာခဲ့သူများလည်း ရှိကြောင်း သိရသည်။

“အဆောင်တစ်ခုမှာ နေမကောင်းတဲ့သူ များတယ်လို့ ကြားတယ်၊ ဆေးဝါးတွေလည်း မလုံလောက်ဘူး၊ မနေ့က သူတို့တွေအတွက် ဆေးဝါးတွေ ထောက်ပံ့ပေးခဲ့ရသေးတယ်” ဟု စစ်ရှောင်များကို သွားရောက်ကူညီသည့် အမျိုးသမီးတစ်ဦးက ပြောသည်။

ကျောက်မဲမြို့နယ် မိုင်းငေါ့မြို့တွင်လည်း ပြီးခဲ့သည့် ရက်ပိုင်းက စစ်ရှောင်စခန်းတစ်ခုမှ ကိုဗစ်ပိုး ကူးစက်ခံရသူ (၁၂)ထိ တွေ့ရှိခဲ့ရပြီး (၁)ဦး သေဆုံးခဲ့ကြောင်း သိရသည်။

ကျောက်မဲမြို့နယ်တွင် စက်တင်ဘာလ (၆)ရက် ယမန်နေ့အထိ ကိုဗစ်ကူးစက်ခံရသူ (၉၀၀)ကျော် ရှိနေပြီး ဆေးရုံဆင်းခွင့်ရသူ (၆၀၀)ကျော်နှင့် သေဆုံးသူ (၆၀)ဦး ရှိကြောင်း သိရသည်။

ကျောက်မဲမြို့နယ်တွင် တိုင်းရင်းသားလက်နက်ကိုင်များဖြစ်သည့် RCSS/SSA နှင့် SSPP/SSA ၊ TNLA တို့ ပြီးခဲ့သည့် ဇူလိုင်လနှင့် သြဂုတ်လတို့တွင် တိုက်ပွဲပြင်းထန်ခဲ့မှုကြောင့် စစ်ရှောင်ထွက်ပြေးနေရသည့် ဒေသခံ (၂၅၀၀)ကျော်ထိ ရှိနေပြီး စားနပ်ရိက္ခာများ ခက်ခဲနေဆဲဖြစ်ကြောင်း စစ်ရှောင်ကူညီသူများ ထံမှ သိရသည်။