ကျောက်မဲမြို့နယ် ကျေးရွာထဲ တပ်ပေါင်းစု နေထိုင် ပြည်သူများ ထွက်ပြေးတိမ်းရှောင်နေရ

0

သျှမ်းပြည်မြောက်ပိုင်း ကျောက်မဲမြို့နယ် လွယ်ကုန် ကျေးရွာအုပ်စုထဲတွင် တပ်ပေါင်းစုဖြစ်သည့် TNLA နှင့် SSPP/SSA တို့ သွားရောက်နေထိုင်နေ သဖြင့် ပြည်သူများ ထွက်ပြေးတိမ်းရှောင်နေရကြောင်း စုံစမ်းသိရှိသည်။

ထိုတပ်သားများ သွားရောက်နေထိုင်နေသောကြောင့် ပြည်သူများ တချို့ ကြောက်လန့်ပြီး ကျောက်မဲမြို့ဘက်သို့ ထွက်ပြေးတိမ်းရှောင်ခဲ့ကြောင်း သိရသည်။

“ သူတို့ရွာထဲနေနေတယ်။ ရွာထဲမှာတော့ လူတွေသိပ်မရှိတော့ဘူး။ လူကြီးပိုင်းတွေနဲ့ တစ်ချို့လူတွေပဲ ရွာထဲမှာ ကျန်နေတယ်။ အများစုကတော့ ကျောက်မဲဘက်ကို ထွက်ပြေးလာခဲ့ကြပြီ။ တိုက်ပွဲဖြစ်မှာလည်း ကြောက်တော့ ထွက်ပြေးသွားကြတာပါ” ဟု လွယ်ကုံကျေးရွာက ဒေသခံတဦးက ပြောသည်။

ထို တပ်ပေါင်းစုတပ်သားများသည် ပြည်သူများ၏ နေအိမ်ထဲတွင် သွားရောက်နေထိုင်မှုရှိကြောင်း၊ ထိုသို့နေထိုင်ရာတွင် လူမရှိသောနေအိမ်ထဲတွင် ပြည်သူများ၏ ဆန်၊ဆီ၊ဆားများကိုပါ ယူသုံးနေလျက်ရှိကြောင်းသိရသည်။

“ သူတို့ ပစ္စည်းတွေတော့ ယူသုံးတယ်။ အခုက ဘုန်းကြီးကျောင်းနဲ့ စာသင်ကျောင်းတွေမှာ သွားနေကြတယ်။ လူမရှိတဲ့ အိမ်တွေမှာဆိုရင် သူတို့ဝင်နေတယ်။ အဲအိမ်ထဲကရှိတဲ့ အစားစားတွေလည်း သူတို့ယူသုံးတာရှိတယ်။” ဟု လွယ်ကုန်ဒေသခံတဦးကပြောသည်။

စက်တင်ဘာလကစပြီး လွယ်ကုန်းကျေးရွာဖက်တွင် တိုက်ပွဲဖြစ်ပွားမှု မရှိသော်လည်း စစ်ရေးတင်းမာ နေကြောင်း သိရသည်။

လက်ရှိတွင် တပ်သားများ ရွာတွင်းထဲတွင်လာရောက်နေထိုင်သောကြောင့် ပြည်သူများ လယ်ယာများ၊ စိုက်ပျိုးရေးလုပ်ငန်များကို မလုပ်ရသောကြောင့် နောက်နှစ်များအတွက်စိတ်ပူနေလျက်ရှိကြောင်းသိရသည်။

“ အခုချိန်ဆို လက်ဖက်သွားခူးနေရပြီ။ လက်ဖက်လည်း အခုဆို ခူးချိန်ကျော်သွားပြီး။ သွားမခူးရတော့ အလကားဖြစ်တာပေါ့။ ကျမတို့ဆို ဒီနှစ်ဘာစိုက်ပျိုးရေးမှ သိပ်မလုပ်ရဘူး။ နောက်နှစ်တွေအတွက် စားဝတ်နေရေးက စိတ်ပူနေရပြီ” ကျောက်မဲဖက်က စစ်ရှောင်လာသည့် အမျိုးသမီးက ပြောသည်။

ထိုကိစ္စနှင့်ပတ်သက်ပြီး TNLA ပြောခွင့်ရ မိုင်းအိုက်ကျော်နှင့် SSPP ပြောခွင့်ရ စိုင်းဖုန်းဟန်တို့ကို သျှမ်းသံတော်ကနေ ဆက်သွယ်ခဲ့သော်လည်း ဆက်သွယ်၍မရပါ။

ကျောက်မဲမြို့နယ်တွင် တိုင်းရင်းသားလက်နက်ကိုင် အချင်းချင်း (RCSS) နှင့် တပ်ပေါင်းစု (SSPP/ TNLA) တို့က တိုက်ပွဲကြောင့် ပြည်သူများ (၂၅၀၀) ကျော် စစ်ဘေးရှောင်နေရကြောင်း သိရသည်။

Leave a Comments