သျှမ်းပြည်မြောက်ပိုင်း လောက်ကိုင်မြို့တွင် စစ်ကောင်စီလက်အောက်ခံ ယာဉ်ထိန်းရဲအချင်းချင်း ခိုက်ရန်ဖြစ်ပွားရာ ရန်ပွဲကို ဝင်တားသည့်ရဲ သေနတ်ဖြင့် ပစ်သတ်ခံရကြောင်း သတင်း သိရသည်။
ဖြစ်စဉ်မှာ ယမန်နေ့ (စက်တင်ဘာ ၅) ရက် ည ၁၀ နာရီဝန်းကျင်အချိန်တွင် လောက်ကိုင်မြို့ရှိယာဉ်ထိန်းရဲ ရုံးစခန်းအတွင်းတွင် ယာဉ်ထိန်းရဲအချင်းချင်း ခိုက်ရန်ဖြစ်ပွားပြီး ရန်ပွဲကို ဝင်ရောက် တားမြစ်သည့် ရဲတပ် သားတစ်ဦး သေနတ်ဖြင့် ပစ်သတ်ခံရကာ သေဆုံးသွားကြောင်း လောက်ကိုင်မြို့မှ ဒေသခံတစ်ဦးက သျှမ်းသံတော်ဆင့်ကို ပြောသည်။
“သူတို့က မူးနေကြတာ ထင်တယ်၊ စခန်းအတွင်းမှာ တစ်ယောက်နဲ့ တစ်ယောက် အော်ဟစ်ကြိမ်း မောင်းပြီး တော့ သတ်ပုတ်ကြသေးတယ်၊ ပြီးတော့ ခုသေသွားတဲ့ တစ်ယောက်က ဝင်တားတာ ၊ ကုလားကြီးလို့ ခေါ်တဲ့ ရဲက သူ့ခါးက သေနတ်နဲ့ ပစ်လိုက်တာ တစ်ချက်တည်းပဲ ၊ သူကလည်း ပွဲချင်းပြီး သေသွားတယ်” စခန်းနှင့် နီးစပ်သူ လောက်ကိုင်မြို့ ဒေသခံ တစ်ဦးက သျှမ်းသံတော်ဆင့်ကို ပြောသည်။
အခု သေဆုံးသွားသူသည် အသက် ၄၀ အရွယ်ရှိ လောက်ကိုင်မြို့ ယာဉ်ထိန်းရဲတပ်ဖွဲ့မှ ဦးလှမင်းအောင် ဆိုသူ ဖြစ်ပြီး ပြီးခဲ့သည့် ၂၀၁၈ ခုနှစ် အရှေ့ပိုင်းက လောက်ကိုင်တွင် ဖြစ်ပွားခဲ့သည့် တိုက်ပွဲတစ်ခုတွင် လည်း ဦးလှမင်းအောင်က သေနတ်ပစ်ခံခဲ့ရဖူးကြောင်း ၎င်း၏ မိတ်ဆွေဖြစ်သူ ရဲတပ်ဖွဲ့ဝင် တစ်ဦးက လည်း ၎င်း၏ လူမှုကွန်ယက်စာမျက်နှာမှာ ရေးသားဖော်ပြထားကြောင်းလည်း အထက်ပါ ပုဂ္ဂိုလ်က ပြောသည်။
“သူ့ (ဦးလှမင်းအောင်) သူငယ်ချင်းက Facebook မှာ ရေးတင်ထားပုံအရဆိုရင် ဦးလှမင်းအောင်က ပြီးခဲ့တဲ့ ၂၀၁၈ မှာလည်း သေနတ်ပစ်ခံရဖူးတယ်တဲ့၊ ပြီးတော့ ဦးလှမင်းအောင်ကို သေနတ်နဲ့ မသေနိုင်တော့ဘူးလို့ တောင် ပြောကြတယ်တဲ့” ဟု အထက်ပါ ပုဂ္ဂိုလ်က ပြန်လည်ပြောပြထားပါသည်။
စစ်ကောင်စီ လက်အောက်ခံ ယာဉ်ထိန်းရဲ အချင်းချင်း ခိုက်ရန်ဖြစ်ပွားသည့် ရန်ပွဲကို ဝင်တားပြီး သေဆုံး သွားရသည့် ဦးလှမင်းအောင်၏ ရုပ်အလောင်းကို လောက်ကိုင်မြို့ အခြေစိုက် ဂရုဏာဟဒယ လူမှုကူညီရေး အသင်းက သယ်ဆောင်ကာ သုဿန်တွင် မီးရှို့သင်္ဂြိလ်ပေးခဲ့ကြောင်းလည်း သိရသည်။
Leave a Comments