သျှမ်းပြည် နှင့် ကယားပြည်( ကရင်နီပြည်) စပ်ရှိ သျှမ်းတောင် ဖယ်ခုံမြို့နယ် ကုန်ဆုံကျေးရွာတွင် နေထိုင် သော ဒေသခံ တောင်သူလင်မယား (၂)ဦးကို စစ်ကောင်စီက လူသားဒိုင်းကာ အဖြစ် ဖမ်းဆီး ခေါ်ဆောင်သွားကြောင်း သတင်းသိရသည်။

ဖြစ်စဉ်မှာ ယနေ့( စက်တင်ဘာ ၄)ရက် မနက် ၈ နာရီခွဲဝန်းကျင်တွင် ဖယ်ခုံမြို့နယ်၊ ကုန်းဆုံကျေးရွာအုပ်စု၊ ရွှေပြည်အေးရွာရှိ ဒေသခံတောင်သူ ဦးမောင်ကျီးနှင့် ဇနီးဒေါ်ဝင်းကြည်ကို ၎င်းတို့၏ တောင်ယာစိုက်ခင်းအနီးတွင် စစ်ကောင်စီတပ်ဖွဲ့ဝင်များက လာရောက်ဖမ်းဆီးပြီး လူသားဒိုင်းလမ်းပြအဖြစ်ခေါ်ဆောင်သွားကြောင်း ဒေသခံ တစ်ဦးက သျှမ်းသံတော်ဆင့်ကို ပြောသည်။

“သူတို့ ယာခင်းအနီးမှာလာဖမ်းသွားတာပါ၊ စစ်သားတွေက စစ်ကြောင်းထွက်လာချိန် ဦးမောင်ကြီးတို့ကို တွေ့တော့ ဖမ်းခေါ်သွား၊ လမ်းကြောင်းလည်း မကျွမ်းတော့ ဒေသခံတွေကို သူတို့ အကြမ်းဖက် ဖမ်းဆီးပြီ လေ၊ ဒီလို လမ်းပြဖို့ခေါ်တာတွေက ခဏခဏ ဖြစ်တယ်၊ အခုဆို ရွာသွားတွေက ထွက်ပြေးကြကုန်ပြီ” ဟု အထက်ပါ ပုဂ္ဂိူလ်က ပြောသည်။

စစ်ကောင်စီတပ်ဖွဲ့တို့သည် ကုန်ဆုံကျေးရွာတွင် စခန်းချ တပ်ဆွဲထားနေသည်မှာ နှစ်ပတ်ခန့် ရှိနေပြီး ယနေ့မှာတော့ ခေါင်အိကျေးရွာဖက်သို့ ဦးတည်ကာ စစ်ကြောင်းချီတက်သွားကြောင်းလည်း အဆိုပါ ဒေသခံ က သျှမ်းသံတော်ဆင့်ကို ပြောသည်။

“သူတို့ ရွာထဲမှာ စခန်းချနေတာ နှစ်ပတ်လောက်ရှိပြီ၊ မနေ့က ဒီကုန်ဆုံတောင်ပေါ်ကနေ ဘုန်းကြီးကျောင်း ကို အကာအကွယ်ယူပြီးတော့ ရွာထဲနဲ့ PDF တွေကို ရမ်းသမ်းပစ်သေးတယ်၊ ကူပစ်တာပေါ့နော်၊ ပြီးတော့ တစ်ရာကျော်လောက်တော့ စစ်ကြောင်းထွက် သွားတယ်၊ ဒီနေ့လည်း တစ်ရာကျော်ကျော်ပဲ စစ်ကြောင်း ထွက်သွားတာ၊ ခေါင်အိကျေးရွာဖက်ကို စစ်ကူသွား တယ်၊ အဲ့ရွာမှာ PDF နဲ့တိုက်ပွဲ ဖြစ်နေတယ်လေ” ဟု ၎င်းက ပြောပါသည်။

စစ်ကောင်စီတို့သည် ပြီးခဲ့သည့် စက်တင်ဘာလ ၁ ရက်နေ့မှ ယနေ့ ယခုချိန်ထိ ဒေသခံ ပြည်သူ့ကာကွယ်ရေး တပ်ဖွဲ့နှင့် KNDF တို့ကို ထိုးစစ်ဆင်တိုက်ခိုက်နေလျက်ရှိကြောင်းသိရသည်။

၎င်းတို့ထိုးစစ်ဆင်သည့် လမ်းကြောင်းတစ် လျှောက် ရှိ ကျေးရွာများကို ဝင်ရောက်ဖျက်စီးခြင်း အပြစ်မဲ့ ဒေသခံပြည်သူများကို ဖမ်းဆီးကာ လူသား ဒိုင်းလမ်းပြ များအဖြစ် အသုံးချနေခြင်းစသည့် စစ်ရာဇဝတ်မှုများ ကျူးလွန်လျှက်ရှိကြောင်းလည်း သိရသည်။