သျှမ်းပြည်တောင်ပိုင်း ပင်လုံမြို့တွင် ဈေးသွားဈေးလာသူများ mask (နှာခေါင်းစည်း) မတပ်ဘဲ သွားလာသူများကို ကျပ်ငွေ (၅၀၀) ဒဏ်ရိုက် အရေးယူကြောင်းစုံစမ်းသိရှိရသည်။
ပင်လုံမြို့တွင် ကိုဗစ် ၁၉ တဖန်ပြန်တိုးလာသောကြောင့် ယမန့်နေ (စက်တင်ဘာ ၃ ရက်) မှစပြီး အပြင်သွားလာသူများ Mask မတပ်ပါက ငွေရိုက်ဒဏ်ယူခဲ့ကြောင်းသိရသည်။
“ ကျနော်တို့မကောက်ခင်က အရင်ကတည်းက ဆော်ဪပါတယ်။ မနက်တိုင်း ဈေးတွေမှာဆော်ဪပေးတယ်။ ခုက စကားနားမထောင်ကြဘူး။ ဒီလို ငွေဒဏ်ရိုက်တာက ထိရောက်မယ်ထင်လို့ ကျနော်တို့ကောက်ခဲ့တာ။ အခုက ပင်လုံကိုဗစ် လူနာနည်းနည်းပြန်တိုးလာတယ်” ဟု ပင်လုံမြို့ ကိုဗစ် ၁၉ ရောဂါလူနာများကို ကူညီပေးနေသည့် ပရဟိတ အဖွဲ့ဝင်တဦးက သျှမ်းသံတော်ဆင့်ကိုပြောသည်။
ထိုသို့ ငွေကောက်ခံယူပြီး ဒဏ်ခတ်ခြင်းသည် ယခင်ကတည်းက လုပ်ဆောင်ခဲ့သင့်ကြောင်း ပင်လုံမြို့ အမည်မဖော်လိုသည့် ဒေသခံတဦးက ပြောသည်။
“ ကောင်းတယ်။ ဒီလိုကောက်တာ။ ၅၀၀ ကောက်တာနည်းသေးတယ်။ ၅ထောင်လောက်ကောက်ရမှာ။ ဒီလောက်ရောဂါ ဖြစ်နေတာ သူတို့တွေက ခုချိန်ထိ mask မတပ်ကြသေးဘူး။ ကျမတို့ကတော့ သဘောကျတယ်ဒီလိုလုပ်တာ။” ဟု ဒေသခံတဦးက ပြောသည်။
ပင်လုံမြို့တွင် ယမန့်နေ့ စက်တင်ဘာ ၃ ရက်နေ့တွင် ကိုဗစ်-၁၉ ပိုးတွေ့လူနာ (၆) ဦးတွေ့ရှိခဲ့ကြောင်းသိရသည်။
ထို့အပြင် ပင်လုံမြို့တွင် ယခုရက်ပိုင်း ပိုးတွေ့လူနာ ပြန်တိုးလာကြောင်း ပင်လုံမြို့ ပရဟိတ အဖွဲ့က သိရသည်။
လွိုင်လင်မြို့နယ်တွင် ကိုဗစ် ၁၉ တတိယလှိုင်းအစတွင် ပိုးတွေ့လူနာ (၂၀၀) ကျော်ထိရှိပြီး လက်ရှိဆေးရုံတွင်ကုသနေသူ (၃၀) ကျော်နှင့် သေဆုံးသူ (၈) ဦးရှိကြောင်းသိရသည်။
