သျှမ်းမြောက် ကျောက်မဲမြို့နယ် မိုင်းငေါ့မြို့ရှိ စစ်ရှောင်စခန်းတွင် ယနေ့( စက်တင်ဘာလ ၃)ရက် မနက်ပိုင်းတွင် ကိုယ်ဝန်သည် တစ်ဦး မီးဖွားခဲ့ကြောင်း သတင်းရရှိသည်။
ပြီးခဲ့သည့် (၂)လဝန်းကျင်ကတည်းက မိုင်းငေါ့မြို့ တာလုံရပ်ကွက် တာလုံစစ်ရှောင်စခန်းတွင် ရောက်ရှိလာသည့် ကိုယ်ဝန်သည်ဖြစ်ပြီး ယနေ့ နံနက် (၆)နာရီတွင် အဆိုပါစစ်ရှောင်စခန်း၌ မီးဖွားခဲ့တာဖြစ်ကြောင်း သိရသည်။
“စစ်ရှောင်တွေနေတဲ့ တာလုံကျောင်း ဓမ္မာရုံရဲ့ ဘေးမှာ သူ့အတွက် သီးသန့် တဲထိုးပေးထားတယ်၊ အဲ့ထဲမှာပဲ မီးဖွားတယ်၊ ရောက်နေတာတော့ (၂)လလောက်ရှိပြီ” ဟု မိုင်းငေါ့စစ်ရှောင်များကို ကူညီနေသည့် စိုင်းထွန်းတင် က သျှမ်းသံတော်ဆင့်ကို ပြောသည်။
ထိုကိုယ်ဝန်သည်အား မိုင်းငေါ့ ကျန်းမာရေးဌာနမှ ကျန်းမာရေးဆရာမ မွေးဖွားပေးခဲ့တာဖြစ်ပြီး ကလေးမှာ ယောက်ျားလေးဖြစ်ကြောင်း၊ ဟိန်းဝိုးဒေသခံ စိုင်းကျော်ဝင်းနှင့် နန်းဝင်းကြည်တို့၏ သားလေးဖြစ်ကြောင်း သိရသည်။
မိုင်းငေါ့ တာလုံစစ်ရှောင်စခန်းတွင် ကိုဗစ်ကူးစက်သူ (၁၂)ဦး ရှိနေသည့်အတွက် မွေးကင်းစကလေးငယ်နှင့် မိခင်အတွက် အခက်ခဲဖြစ်နေကြောင်း စစ်ရှောင်ကူညီသူထံမှ သိရသည်။
“ခုက စစ်ရှောင်စခန်းမှာ ကိုဗစ်ကူးစက်သူ ရှိလို့ အဝင်အထွက် ကန့်သတ်ထားတော့ သူတို့အတွက် ပိုပြီးခက်ခဲသွားတယ်၊ ကလေးရော မိခင်ရော အသုံးပြုဖို့ ပစ္စည်းတွေ လုံလောက်မှုမရှိဘူး” ဟု မိုင်းငေါ့ဒေသခံ အမျိုးသားတစ်ဦးက ပြောသည်။
မိုင်းငေါ့ တာလုံစစ်ရှောင်စခန်းတွင် စစ်ရှောင်(၁၀၀)ကျော်ရှိနေပြီး ကိုယ်ဝန်သည် (၄)ဦးရှိနေကြောင်း၊ စက်တင်ဘာ (၁)ရက် (ယနေ့) မိုင်းငေါ့မှ ကိုဗစ်ပိုးတွေ့လူနာများထဲတွင် ကိုဝန်သည် (၂)ဦးလည်း ပါဝင်ကြောင်း သိရသည်။
ပြီးခဲ့သည့် သြဂုတ်လ (၂၆)ရက်နေ့တွင်လည်း ကျောက်မဲမြို့ မိုင်းတင်းကျေးရွာအုပ်စု ဝမ်လုံစစ်ရှောင်စခန်းတွင် ရောက်ရှိနေသည့် ပန်ကွမ်ကျေးရွာမှ စစ်ရှောင်ကိုယ်ဝန်သည်တစ်ဦး မီးဖွားခဲ့ကြောင်း စုံစမ်းသိရသည်။
