သျှမ်းပြည် နှင့် ကယားပြည်( ကရင်နီပြည်) စပ်ရှိ သျှမ်းတောင် ဖယ်ခုံမြို့နယ်အတွင်း တိုက်ပွဲဖြစ်ပွားရာ အာဏာသိမ်း စစ်ကောင်စီ တပ်ဖွဲ့တို့သည် ဘုန်းကြီးကျောင်းနှင့် ရွာသားများကို အကာအကွယ်သဖွယ် ထားရှိ ပြီး PDF များကို တိုက်ခိုက်နေကြောင်း သတင်းသိရသည်။
ယမန်နေ့ စက်တင်ဘာလ ၂ ရက်နေ့ မနက် ၉ နာရီဝန်းကျင်အချိန်မှ စတင်ပြီး သျှမ်းပြည် နှင့် ကယားပြည်( ကရင်နီပြည်) စပ်ရှိ သျှမ်းတောင် ဖယ်ခုံမြို့နယ် ခေါင်အိကျေးရွာအနီးတွင် တိုက်ပွဲဖြစ်ပွားခဲ့ရာ စစ်ကောင်စီ တို့သည် ရွာနှင့် ဘုန်းကြီးကျောင်းများကို အကာအကွယ်ထားသဖွယ်ထားရှိပြီး PDF များနှင့် တိုက်ခိုက် ကြောင်း သိရသည်။
“ခေါင်းအိကျေးရွာအရှေ့ဖက်မှာ တိုက်ပွဲ စဖြစ်တယ်၊ ပြီးတော့ နေ့ခင်းပိုင်းရောက်တော့ သူတို့က ဆုတ်သွား ရတယ်၊ အဲ့ချိန်မှာ ကုန်းဆုံတော်ပေါ်ဘုရားဖက်နေ တစ်ဖွဲ့နေပြီးတော့ သူတို့အချင်းချင်း ပစ်ကူတယ်၊ အဲ့ဖက် မှာ ဘုန်းကြီးကျောင်းနဲ့ ရွာတွေရှိတယ်၊ ဆိုလိုတာက သူတို့က အဲ့အတွေကို အကာအကွယ်ယူတော့ PDF တွေဖက်ကို ဖိပြီးပစ်တာ” ဟု ဖယ်ခုံ ပြည်သူ့ကာကွယ်ရေးတပ်ဖွဲ့နှင့် နီးစပ်သူ တစ်ဦးက သျှမ်းသံတော်ဆင့် ကို ပြောသည်။
ယင်းကဲ့သို့ စစ်ကောင်စီဖက်မှ ရွာများ ဘုန်းကြီးကျောင်းများကို အကာအကွယ်ယူပြီး တိုက်ခိုက်နေသည့် အတွက် ဖယ်ခုံမြို့နယ် အတွင်း ခေါင်အိကျေးရွာနှင့် အနီးပတ်ဝန်းကျင်ရှိ ကျေးရွာများမှ ဒေသခံ ရွာသားများ စစ်ဘေးတိမ်းရှောင်နေရကြောင်းနှင့် စစ်ပွဲပိုမိုပြင်းထန်လာပါက စစ်ရှောင်များအတွက် စားနပ်ရိက္ခာ အခက်အခဲ ရှိနိုင်ကြောင်း ကရင်နီပြည်မှ စစ်ဘေးရှောင်များကို ကူညီပေးနေသည့် အဖွဲ့မှ အသင်းသားတစ်ဦး က သျှမ်းသံတော်ဆင့်ကိုပြောသည်။
“မနေ့က (စက်တင်ဘာလ၂ ရက်) တိုက်ပွဲက ပြင်းထန်နေတော့ ည ၉ နာရီထိ ဒေသခံတွေက စစ်ဘေးကို တိမ်းရှောင်ထွက်ပြေးရတယ်၊ ပြီးတော့ သက်ကြီးရွယ်အိုနဲ့ ကလေးငယ်တွေ စုစုပေါင်းအယောက် ၆၀ ကျော်လောက် ထပ်တိုးလာတယ်၊ ခုစစ်ဘေးရှောင်စခန်းက ရိပ်က္ခာတွေက အများဆုံး ၃ ရက်စာလောက်ပဲ ရှိတော့မယ်၊ တိုက်ပွဲက ပိုပြင်းထန်လာရင်တော့ ဆေးဝါးပစ္စည်းတွေရာ စားနပ်ရိက္ခာတွေကိုရော အရေးကြီး လိုအပ်ပါတယ်” ဟု အထက်ပါ ပုဂ္ဂိုလ်က ပြောသည်။
ယနေ့ စက်တင်ဘာလ ၃ ရက်နေ့ နံနက် ၁၁ နာရီဝန်းကျင်တွင်လည်း ခေါင်အိကျေးရွာ အနီးတိုက်ပွဲတွင် အထိနာခဲ့သည့် စစ်ကောင်စီတပ်ဖွဲ့အတွက် ဖယ်ခုံမြို့ ကုန်ဆုံကျေးရွာ မှ ထိုင်တော်မူ ဘုရားဖက်သို့ ဦးတည်သွားနေသည့် စစ်ကောင်စီတပ်သားများလည်း အင်အား(၁၀၀) ကျော်ရှိနေသည့်အတွက် တိုက်ပွဲ ပိုမို ပြင်းထန်လာနိုင်သည့် အခြေအနေ ရှိကြောင်းလည်း သိရသည်။
