သျှမ်းပြည်မြောက်ပိုင်း ကျောက်မဲမြို့ရှိ ယနေ့ စက်တင်ဘာ (၃) ရက် နေ့လည် (၂) နာရီခွဲ ဝန်းကျင်က ကျောက်မဲမြို့ ဗဟိုဈေး တောင်ဘက်တိုက်တန်းအနီးရှိ ကမ္ဘောဇဘဏ် ဓားပြတိုက်ခံရကြောင်း စုံစမ်းသိရသည်။
ယနေ့ နေ့လည်ပိုင်းတွင် အမျိုးသား တစ်ဦး ကားအဖြူရောင်ဖြင့် ရောက်လာပြီး သေနတ်တိုတစ်လက်ဖြင့် ကမ္ဘောဇဘဏ်ထဲသို့ ဝင်သွားကာ ဓားပြတိုက်သွားခဲ့ကြောင်း ကျောက်မဲဒေသခံများ ပြောပြချက်အရသိရသည်။
“အသေးစိတ် အချက်လက်တော့ ကျနော်တို့လည်း မသိရသေးဘူး။ စစ်ကောင်စီ လက်အောက်ခံ စစ်တပ် နဲ့ ရဲ တွေတော့ ဘဏ်မှာ ရောက်နေပြီ” ဟု ကျောက်မဲဒေသခံ တစ်ဦး ကပြောသည်။
ကျောက်မဲမြို့သည် တိုင်းရင်းသားလက်နက်ကိုင် များပြားသည့် ဒေသဖြစ်ပြီး မကြာခဏ တိုက်ပွဲများ ဖြစ်ပွားသည့် နယ်မြေဒေသလည်း ဖြစ်သည်။
“သူများတွေပြောနေတယ် ငွေလာထုတ်တာကို အငြိမ်မထုတ်ဘူး။ လက်နက်ကိုင်ပြီး ကားယားကားယား နဲ့ ငွေလာထုတ်နေတယ် လို့ ပြောသံကြားနေရတယ်” ဟု ကျောက်မဲဒေသခံ တစ်ဦး ကပြောသည်။
လက်ရှိအချိန်ထိ ငွေမည်မျှပါသွားသည်ကို မသိရှိရသေးပေ။
စစ်တပ်မှ နိုင်ငံတော် အာဏာသိမ်းပြီးနောက် ရခိုင်ပြည်နယ် ၊ ရန်ကုန်တိုင်းဒေသကြီးတွေမှာလည်း ဘဏ်မှာ မကြာခဏ ဓားပြ တိုက်ခိုက်ခဲ့ရကြောင်း သိရှိရသည်။
