သျှမ်းမြောက် ကျောက်မဲမြို့နယ် မိုင်းငေါ့မြို့စစ်ရှောင်စခန်းရှိ အမျိုးသမီး (၁)ဦး ကိုဗစ်ကူးစက်ခံရပြီးနောက် သေဆုံးသွားကြောင်း စုံစမ်းသိရသည်။
မိုင်းငေါ့မြို့ တာလုံစစ်ရှောင်စခန်းရှိ အသက် (၈၅)နှစ်အရွယ် သက်ကြီး အမျိုးသမီး (၁)ဦးသည် ပြီးခဲ့သည့် သြဂုတ်လ (၂၉)ရက်က ကိုဗစ်ပိုးကူးစက်ခံရပြီးနောက် သေဆုံးသွားကြောင်း သိရသည်။
“ကိုဗစ်လက္ခဏာဖြစ်နေတာ (၁)ပတ်လောက်ရှိပြီ၊ အဲ့ဒီနေ့မှာပဲ အရေးပေါ် စစ်ဆေးကြည့်လိုက်တော့ ကိုဗစ်ပိုးတွေ့တာ၊ ကိုဗစ်ပိုး တွေ့တဲ့နေမှာပဲ ဆုံးသွားတာပါ” ဟု မိုင်းငေါ့မြို့ ကိုဗစ်ကော်မတီမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် စက်တင်ဘာလ (၁)ရက် ယမန်နေ့က မိုင်းငေါ့မြို့မှ နှာခေါင်း၊ အာခေါင် တို့ဖတ် (၁၂၄)ခုအား လားရှိုးသို့ ပို့ဆောင်စစ်ဆေးထားပြီး တာလုံစစ်ရှောင်စခန်းမှ (၉၃)ဦး ပါဝင်ကြောင်း အဆိုပါ တာဝန်ရှိသူ ပြောပြချက်အရ သိရသည်။
တာလုံစစ်ရှောင်စခန်း အပါအဝင် မိုင်းငေါ့မြို့တွင် စစ်ရှောင် (၅၀၀)ဝန်းကျင်ရှိပြီး ကျန်းမာရေးမကောင်းသည့် စစ်ရှောင်များလည်း ရှိနေသည့်အတွင် ၎င်းတို့အတွက် စိုးရိမ်ရကြောင်း စစ်ရှောင်ကူညီသူ တစ်ဦးကပြောသည်။
“မိုင်းငေါ့မှာ စစ်ရှောင်ရောက်ရှိနေတာတွေက များတယ်၊ ခုက နေမကောင်းတဲ့သူတွေလည်း ရှိနေတယ်ဆိုတော့ ပိုပြီး စိုးရိမ်ရတယ်၊ အားလုံးက စုပြီးနေကြရတာဆိုတော့ အရမ်းကို သတိထားပြီး နေကြဖို့ လိုတယ်” ဟု စစ်ရှောင်များကို ကူညီနေသည့် ကျောက်မဲ သျှမ်းစာပေနှင့်ယဉ်ကျေးမှုအသင်း ဥက္ကဌ လုင်းလျန်းဟန်က ပြောသည်။
မိုင်းငေါ့မြို့တွင် အရေးပေါ်လူနာများကိုသာ ကိုဗစ်ချက်ချင်းစစ်ပေးတာဖြစ်ပြီး Quarantine ဝင်နေသည့် သာမန်ပြည်သူများအား တစ်ပါတ် တစ်ရက်သာ နှာခေါင်း၊ အာခေါင်တို့ဖတ်ယူပြီး လားရှိုးကို ပို့ဆောင် စစ်ဆေးပေးနေတာဖြစ်ကြောင်း ဒေသခံများထံမှ စုံစမ်းသိရသည်။
ကျောက်မဲမြို့နယ် မိုင်းငေါ့မြို့သည် Lock down သတ်မှတ်ထားပြီး မြို့အဝင်တွင် နေ့စဉ်စစ်ဆေးမှုများဆောင်ရွက်နေကြောင်း၊ ယမန်နေ့အထိ ကိုဗစ် ကူးစက်ခံရသူ (၃၆)ဦးရှိပြီး သေဆုံးသူ (၁)ဦး ရှိကြောင်း သိရသည်။
Leave a Comments