သျှမ်းပြည်မြောက်ပိုင်း တန့်ယန်းမြို့နယ် မိုင်းပတ်ကျေးရွာအုပ်စု၊ မန်းလွယ်ကျေးရွာတွင် ပြည်သူများ ကိုဗစ်-၁၉ ပိုးစစ်ဆေးရာတွင် ပြည်သူ့စစ်နှင့် ရဲများက လာရောက်စောင့်ကြည့် စစ်ဆေးကြောင်း စုံစမ်းသိရှိရသည်။
ထိုသို့တန့်ယန်းမြို့ ကြက်ခြေနီအဖွဲ့နှင့်အတူ ပြည်သူ့စစ် နှင့် ရဲများ လာရောက်ပြီး စစ်ဆေးရာတွင် ပြည်သူများက ကြောက်လန့်မှုကြောင့်၊ ပိုးတွေ့ရှိပါက ပိုက်ဆံပေးကုသခံရသောကြောင့် စစ်ဆေးမှု ခံယူနေလျက်မရှိကြောင်း မန်းလွယ်ကျေးရွာ ဒေသခံအမျိုးသမီးတဦးက သျှမ်းသံတော်ဆင့်ကိုပြောသည်။
“ တန့်ယန်းကြက်ခြေနီအသင်းနဲ့ ပြည်သူ့စစ်တွေကလိုက်လာစောင့်ကြည့်တာ။ စစ်ပြီးရင် သူတို့က ခေါ်သွားတော့ ပိုက်ဆံပေးရတယ်။ ကျမတို့ ပိုက်ဆံမရှိတော့ ကျမတို့လည်း မစစ်ချင်ဘူး။ ဒီနေ့လည်းလာတယ်လို့ပြောတယ်။ အကုန်လုံးကိုယ့်အိမ်မှာသော့ခတ်ပြီးနေနေကြတယ်။ မထွက်ရဲဘူး။” ဟု မန်းလွယ်ဒေသခံ အမျိုးသမီးတဦးက ပြောသည်။
အလားတူ လွန်ခဲ့သည့် ဩဂုတ် ၂၆ ရက်နေ့ကလည်း ကြက်ခြေနီအဖွဲ့နှင့် ပြည်သူစစ်များက တစ်ခေါက်လာရောက် စစ်ဆေးပေးခဲ့ကြောင်းသိရသည်။
ထိုသို့ ကိုဗစ်- ၁၉ ပိုးတွေ့ရှိပါက တန့်ယန်းမြို့ ဆေးရုံသို့ခေါ်ဆောင်သွားပြီး ဆေးကုသမှုစရိတ် မြင့်သောကြောင့် ပြည်သူများက သွားရောက်စစ်ဆေးမှုမရှိကြောင်းသိရသည်။
“ ကျမတို့လည်း ဘာမှ မဖြစ်ဘူးလေ။ သူတို့တွေက အဓ္ဓမ လာစစ်ဆေးတာ။ ပြီးတော့ ဒီနေ့ လူဘယ်နှယောက် ပိုးတွေ့ရမယ်လို့လဲ ပြောတယ်။ ပိုးတွေ့တဲ့သူတွေကို ဆေးရုံခေါ်သွားပြီး ပိုက်ဆံပေးရတယ်။ ကျမတို့ စားဝတ်နေရေး အတွက်တောင် အဆင်မပြေဘူးလေ။ အဲကြောင့် မစစ်ချင်တော့ဘူး။ ဖြစ်ရင်လဲ ဆေးရုံမှာ တစ်ရက်ကို (၁၅၀၀၀) ခွဲနဲ့ ဆေးကုသရမယ်ပြောတယ်” ဟု အထက်ပါ အမျိုးသမီးက ပြောသည်။
ထိုသို့ ဩဂုတ်လ (၂၆) ရက်နေ့ ကိုဗစ်ပိုးသွားရောက်စစ်ဆေးသည့် ပြည်သူ ၂၆ ဦးရှိပြီး (၃) ဦးထပ်မံပိုးတွေ့ရှိကြောင်း သိရသည်။
လွန်ခဲ့သည့် ဩဂုတ် ၂၄ ရက်နေ့တွင် တန့်ယန်းမြို့ ကိုဗစ် -၁၉ ကြက်ခြေနီ အသင်း က မန်းလွယ်ကျေးရွာတွင် ရောက်ရှိလာပြီး ကျောင်းထိုင်ဆရာတော် ကိုဗစ် – ၁၉ ပိုးလာရောက်စစ်ဆေး ပေးပြီး ပိုးတွေ့ရှိသောကြောင့် တပ်ဆေးရုံတွင် ခေါ်ဆောင်သွားခဲ့ကြောင်းသိရသည်။
ကျောင်းထိုင်ဆရာတော်ကို ဆေးရုံခေါ်သွားပြီး ကျေးရွာရှိ ပြည်သူများက ပိုက်ဆံစုပြီး ဆရာတော် ဆေးကုသ စရိတ်အတွက် (၁၅) သိန်း ပေးဆောင်ခဲ့ရကြောင်း ဒေသခံများပြောပြချက်အရသိရသည်။
“ ၂၆ ရက်နေ့က ထင်တယ်။ ဒီရွာမှာလာစစ်ဆေးပေးတာ။ ပြည်သူ့စစ်နဲ့ ရဲတွေလည်းပါလာတယ်။ စတွေ့တာကတော့ ကျောင်းထိုင်ဆရာတော်မှာကိုဗစ် ပိုးတွေ့လို့ဆိုပြီးလာခေါ်သွားတယ်။ ဆရာတော်ကို တပ်ဆေးရုံထဲခေါ်သွားတယ်။ ကျနော်တို့ တက်နိုင်သလောက်လှူပေးတာ။ စုစုပေါင်း (၁၅) သိန်းလောက်ရှိမယ်ထင်တယ် ” ဟု မန်းလွယ်ကျေးရွာ ဒေသခံတဦးက သျှမ်းသံတော်ဆင့်ကိုပြောသည်။
ထိုသို့ ငွေကြေးကိစ္စနှင့်ပတ်သတ်ပြီးတော့ တန့်ယန်းမြို့ ကြက်ခြေနီအသင်းက “ မဟုတ်ပါဘူး။ အဲလိုတွေတောင်း တာတော့မရှိပါဘူး။ နေဖို့ စားဖို့ သောက်ဖို့တော့ကုန်ကျတာတော့ရှိတာပေါ့။ ရွာကလာပြီး မြို့ပေါ်မှာဆွေမျိုးတွေမရှိရင်လဲ ကုန်ကျစရိတ်တွေကတော့ရှိတာပေါ့။ ငွေကြေးတောင်းနေတာတော့မရှိဘူး။ မရှိတဲ့သူတွေကိုတောင် ကျနော်တို့ အလှူရှင်ရှာပေးသေးတယ်” ဟု ဆိုသည်။
မန်းလွယ်ကျေးရွာတွင် ကိုဗစ် -၁၉ ပိုးတွေ့လူနာ ကျောင်းထိုင်ဆရာတော် အပါဝင် (၄) ဦးရှိကြောင်းသိရသည်။
“ မန်းလွယ်ကျေးရွာမှာက ကျောင်းထိုင်ဆရာတော်ပါရင် (၄) ဦးရှိတယ်။ မန်းလွယ်ရွာသားက (၁) ယောက်ပဲရတယ်။ ပိုးတွေ့လူနာ (၂) ယောက်ကထွက်ပြေးသွားတာ။ ဆရာတော်လည်း တပ်ဆေးရုံမနေချင်လို့ဆိုပြီး ပြည်သူ့ဆေးရုံ ထဲပြောင်း ပေးလိုက်ပြီ” ဟု တန့်ယန်းမြို့ ကြက်ခြေနီအဖွဲ့က သျှမ်းသံတော်ဆင့်ကိုပြောသည်။
မန်းလွယ်ကျေးရွာတွင် ဒေသခံပြည်သူ (၂၀၀) ကျော်ရှိပြီး ကိုဗစ် -၁၉ သွားရောက်စစ်ဆေးသူ (၂၀) ဦးသာရှိကြောင်း၊ ကိုဗစ် ၁၉ စစ်ဆေးပြီးနောက် တန့်ယန်းမြို့ပေါ်သို့ ဆေးသွားကုရာတွင် ကုန်ကျစရိတ် (၁၀) သိန်းပေးရသည်ဟု ဒေသခံများပြောပြချက်အရသိရသည်။
“ (၃) ယောက်ပိုးတွေ့တယ်လို့ပြောတယ်။ ညရောက်တော့သူတို့ကားနဲ့လာခေါ်တယ်။ စစ်တဲ့ချိန်တော့ ဘာမှမပေးရဘူး။ ဆေးရုံသွားရောက်တဲ့အချိန်တော့ ကျနော်တို့လည်းမသိဘူး။ ကျနော်တို့ရွာကပိုးတွေ့ တဲ့တယောက်ကို လာခေါ်သွား တုန်းကတော့ (၁၀) သိန်းလောက်ပေးရတယ်။ ဒါကြောင့်လဲ ဆေးသွားမစစ်ချင်တာလဲပါတယ် ” ဟု မန်းလွယ်ဒေသခံတဦး က ဆိုသည်။
ထိုသို့ ကိုဗစ် -၁၉ ပိုးတွေ့လူနာများကို စစ်ဆေးရာတွင် မန်းလွယ်ကျေးရွာတခုထဲသာ လက်ရောက်စစ်ဆေးပေးပြီး ကျန်သည့် ရွာများကို သွားရောက်စစ်ဆေးပေးခြင်းမရှိကြောင်းသိရသည်။
တန့်ယန်းမြို့ပေါ်တွင် ကိုဗစ်- ၁၉ ပိုးတွေ့လူနာများကို ရပ်ကွက် (၂) သျှမ်းစာပေနှင့် ယဉ်ကျေးမှုကျောင်း၊ “ဝ” စာပေနှင့် ယဉ်ကျေးမှုကျောင်းနှင့် တန့်ယန်းဆေးရုံများတွင်သာ ဆေးကုပေးနေလျက်ရှိကြောင်းသိရသည်။
“ ကျနော်တို့ တန့်ယန်းမှာက ဆေးရုံတွေမှာကုပေးပါတယ်။ တပ်ဆေးရုံကတော့ မကုပေးတာ ကြာနေပြီ။ ပိုက်ဆံကောက်ယူတာ ရှိမရှိတာ့ ကျနော်တို့လည်း သေချာမသိရသေးဘူး။” ဟု တန့်ယန်းမြို့ ရပ်ကွက် အုပ်ချုပ်ရေးမှုးတဦးက ပြောသည်။
