သျှမ်းမြောက် ကျောက်မဲမြို့နယ် မိုင်းတင်းကျေးရွာအုပ်စုရှိ ဝမ်လုံစစ်ရှောင်စခန်းသို့ ရောက်ရှိနေသည့် စစ်ရှောင်ကိုယ်ဝန်သည်တစ်ဦး မီးဖွားခဲ့ကြောင်း စုံစမ်းသိရသည်။
ကျောက်မဲမြို့ မိုင်းတင်းကျေးရွာအုပ်စုတွင် ကိုယ်ဝန်လစေ့ဖြင့် စစ်ရှောင်ရောက်လာတာဖြစ်ပြီး ထိုစစ်ရှောင်စခန်းတွင် သြဂုတ် (၂၆)ရက်တွင် မီးဖွားခဲ့ကြောင်းသိရသည်။
“ရောက်လာတာ (၁၀)ရက်လောက်ရှိပြီ၊ ကိုယ်ဝန်အရင့်အမာနဲ့ စစ်ရှောင်ရောက်လာတာပါ၊ ပန်ကွမ်ကျေးရွာသူပါ၊ ခု ကလေးရော မိခင်ရော ကျန်းကျန်းမာမာပဲ” ဟု မိုင်းတင်းစစ်ရှောင်စခန်းမှ တာဝန်ရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်ရှောင်အမျိုးသမီးမှာ ကျောက်မဲမြို့နယ် ပန်ကွမ်ကျေးရွာမှ အသက် (၂၈)နှစ်အရွယ် နန်းဖြူဖြူဝင်းဖြစ်ပြီး ပြီးခဲ့သည့် သြဂုတ်လ (၂၆)ရက် ကြာသပတေးနေ့က ထိုစစ်ရှောင်စခန်းတွင် မီးဖွားခဲ့ရတာဖြစ်ကြောင်း သိရသည်။
ထိုအမျိုးသမီးအား ပန်ကွမ်ကျေးရွာမှ စစ်ရှောင်ထွက်ပြေးလာသည့် ကျန်းမာရေးဆရာမ က မွေးဖွားပေးခဲ့တာဖြစ်ကြောင်း၊ ကလေးမှာ အမျိုးသမီးဖြစ်ကြောင်းသိရသည်။
မိုင်းတင်းစစ်ရှောင်စခန်းတွင် စစ်ရှောင် (၁၂၀)ကျော်ရှိနေပြီး စားနပ်ရိက္ခာများ ခက်ခဲနေကြောင်း သိရသည်။
ထို့အပြင် သြဂုတ်လ (၂၉)ရက် ယမန်နေ့က ကျောက်မဲမြို့နယ်မောက်ငါးစန့် ကျေးရွာအနီး တိုင်းရင်းသားလက်နက်ကိုင်များဖြစ်သည့် RCSS/SSA နှင့် SSPP/SSA ၊ TNLA တပ်တို့ တိုက်ပွဲထပ်မံဖြစ်ပွားခဲ့ပြီး စစ်ရှောင်ထွက်ပြေးလာရသူများ ရှိခဲ့ကြောင်း စစ်ရှောင်ကူညီသူများထံမှ သိရသည်။
Leave a Comments