သျှမ်းပြည်မြောက်ပိုင်း မိုင်းရယ်မြို့တွင် ကိုဗစ်-၁၉ အတည်ပြုလူနာ တိုးများလာသော်လည်း သက်ဆိုင်ရာ တာဝန်ရှိသူများက ပြည်သူကျန်းမာရေးအတွက် စီမံကွပ်ကဲမှုများ မရှိကြောင်း စုံစမ်းသိရသည်။

လက်ရှိမိုင်းရယ်မြို့တွင် ကိုဗစ် – ၁၉ ရောဂါပိုး စစ်ဆေးတွေ့ရှိသူ အတည်ပြု လူနာ ( ၁၃၄) ဦးရှိလာပြီ ဖြစ်သော်လည်း မြို့နယ်မှ သက်ဆိုင်ရာ တာဝန်ရှိသူများနှင့် ကိုဗစ်ကော်မတီ ဌာနမှ တာဝန်ရှိသူများတို့က ရောဂါကာကွယ် ထိန်းချုပ်ရေးအတွက် စီမံလုပ်ဆောင်မှုများ မရှိကြောင်း မိုင်းရယ်မြို့မှ ဟိတဓရ ပရဟိတ အသင်းဝင်တစ်ဦးက သျှမ်းသံတော်ဆင့်ကို ပြောသည်။

“သက်ဆိုင်ရာ တာဝန်ရှိသူတွေရဲ့ ပေါ့လျှော့မှုကြောင့် ရောဂါပိုးတွေက ဒီလောက်ထိ တိုးလာရတာပေါ့၊ မိုင်းရယ်မှာ ကိုဗစ် ရောဂါ ကာကွယ်ကုသထိန်းချုပ်ရေးကော်မတီဆိုတာ ရှိတယ်၊ ကော်မတီသာ ဖွဲ့လိုက် တာပါ ဘာလုပ်ဆောင်မှု ရှိတာ မဟုတ်ဘူး” ဟုအထက်ပါ ပုဂ္ဂိုလ်က ပြောသည်။

လားရှိုး-မိုင်းရှူး ဆက်သွယ်ထားသည့် ကားလမ်းမကြီးပေါ်ရှိ ကြားခံမြို့ တစ်မြို့ ဖြစ်သည့် မိုင်းရယ်မြို့သည် လားရှိုးမြို့မှ သာမက အခြားသော မြို့ရွာများမှ လာသည့် ခရီးသွားပြည်သူများ၊ ကားသမားများလည်းရှိနေ သောကြောင့် ရောဂါကူးစက်မှု များလာကြောင်း မိုင်းရယ်မြို့ အမှတ် ၁ ရပ်ကွက်နေ ဒေါ်နန်းခမ်းက သျှမ်းသံတော်ဆင့်ကို ပြောသည်။

“ကျမတို့ မြို့မှာ အရင်က ကိုဗစ် ပထမလှိုင်းနဲ့ ဒုတိယလှိုင်းမှာ ပိုးတွေ့လူနာမရှိပါဘူး၊ အေးဆေးသွားလာနေ ထိုင်လို့ ရကြသေးတယ်၊ ဒါပေမဲ့ ဒီ တတိယလှိုင်းမှာတော့ ပိုးတွေ့လူနာ တစ်ရာကျော်လာပြီ၊ ဒါက မြို့အဝင် အထွက်များတာရယ်နဲ့ စစ်ဆေးမှုတွေ မပြုလုပ်လို့ ဖြစ်တယ်လို့ ယူဆမိတယ်” ဟု ဒေါ်နန်းခမ်းက ပြောသည်။

ယမန်နေ့ သြဂုတ်လ ၂၆ ရက်နေ့မှာ ဟိုယပရိယတ္တိစာသင်တိုက်မှ ကျောင်းထိုင်ဆရာတော်နှင့် ကိုရင်ကြီး ခြောက်ပါးတို့တွင် ကိုဗစ် – ၁၉ စစ်ဆေးတွေ့ရှိရပြီး လက်ရှိတွင် ပိုးတွေ့လူနာ ၁၃၇ ဦးနှင့် ကိုဏ် – ၁၉ ရောဂါပိုးကြောင့် သေဆုံးရသူ ၃ ဦးထက်မနည်း ရှိနေကြောင်းလည်း သိရသည်။

“ဒီလို မြို့သေးသေးလေးမှာ ကိုဗစ်ပိုး ၁၀၀ ကျော်ထိ တွေ့ရှိတာ ပြောရရင်များတဲ့ ပမာဏပဲ။ ပြီးတော့ သက်ဆိုင်ရာ ကော်မတီကလည်း စီမံကွပ်ကဲမှုမရှိဘူး၊ မြို့အဝင်ထွက်မှာလည်း စစ်ဆေးတာမျိုး မရှိသလောက် ဖြစ်နေတယ်၊ ပြည်သူတွေကလည်း ကြောက်ရကောင်းမှန်းမသိတော့ မက်မတပ်ဘဲနဲ့ အပြင်ကို သွားလာနေတာမျိုးရှိတယ်” ဟု မိုင်းရယ်မြို့မှ ပရိဟိတသမား တစ်ဦးကလည်း သျှမ်းသံတော်ဆင့်ကို ပြောသည်။

မိုင်းရယ်မြို့တွင် ပိုးတွေ့လူနာများပြားလာသည့်အတွက် သက်ဆိုင်ရာ တာဝန်ရှိသူများက ရောဂါကို ကာကွယ်ထိန်းချုပ်သည့် စီမံလုပ်ဆောင်မှုများ ရှိသင့်ကြောင်းနှင့် အုပ်ချုပ်ရေးတာဝန်ရှိသူများကလည်း ပြည်သူများ ကျန်းမာရေး စည်းကမ်းချက်များနှင့် သွားလာကြရန် စေခိုင်းညွှန်ကြားသင့်ကြောင်း ၎င်းက ပြောပါသည်။