သျှမ်းမြောက် ကျောက်မဲမြို့နယ်တွင် ယခုလအတွင်း မိုင်းနင်းမိကာ ဒဏ်ရာရရှိထားသည့် အမျိုးသား တစ်ဦး ကိုယ့်ကိုယ်ကိုယ်အဆုံးစီရင် သွားကြောင်း သတင်းရရှိသည်။
ထိုအမျိုးသားသည် ကျောက်မဲမြို့ ပန်လင်ကျေးရွာတွင် ပြီးခဲ့သည့် သြဂုတ်လ (၁၃)ရက်နေ့က မိုင်းနင်းမိကာ ဒဏ်ရာရရှိထားသူဖြစ်ပြီး ပန်လင်ရွာဘုန်းကြီးကျောင်းတွင် ကိုယ့်ကိုယ်ကိုယ်အဆုံးစီရင်သွားကြောင်း ဒေသခံထံမှ သိရသည်။
“ရွာဘုန်းကြီးကျောင်းရဲ့ အောက်ထပ်မှာ ကြိုးဆွဲချသေဆုံးနေတာ၊ ဘယ်ချိန်ကတည်းက သေနေတာလဲတော့ မသိဘူး၊ မနက်ပိုင်း ကိုရင်တွေ ထပြီး ကျောင်းပေါ်သွားတဲ့အချိန်မှာ တွေ့တာ” ဟု ပန်လင်ကျေးရွာ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကိုယ့်ကိုယ်ကိုယ် အဆုံးစီရင်သူသည် အသက် (၃၁)နှစ်ရှိ မိုင်းအိုက်ညီဖြစ်ပြီး သြဂုတ်လ (၂၄)ရက် မနက်ပိုင်းတွင် အဆုံးစီရင်ခဲ့ကြောင်း ၎င်းသည် ယခုလအတွင်း လက်ဖက်ခြံအနီး မှိုသွားရှာစဉ် မိုင်းနင်းမိကာ မျက်လုံးနှင့် ဝမ်းဗိုက်တို့တွင် မိုင်းစထိမှန် ဒဏ်ရာ ရခဲ့သူဖြစ်ကြောင်း သိရသည်။
ထို့အပြင် လတ်တလောတွင် အလုပ်အကိုင်အဆင်မပြေခြင်းနှင့် ယခင်က မူးယစ်ဆေးဝါး သုံးစွဲဖူးသူဖြစ်ကြောင်း ဒေသခံများထံမှ သိရသည်။
“သူက အလုပ် သိပ်အဆင်မပြေဘူးလို့ကြားတယ်၊ ကြုံရာကျဘမ်းပဲ လုပ်နေတာ၊ ဒီလထဲ မိုင်းထိဒဏ်ရာရထားတော့ အလုပ်မလုပ်နိုင်ဘူး၊ အရင်က မူးယစ်ဆေးလည်း သုံးဖူးတယ်”ဟု ပန်လင်ကျေးရွာမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
မိုင်းအိုက်ညီ တွင် အမျိုးသမီးနှင့် ကလေးငယ် (၂)ဦးရှိပြီး ၎င်းမိသားစုအတွက် စားနပ်ရိက္ခာတစ်ချို့ကို ကျေးရွာမှ ကူညီထောက်ပံ့ပေးခဲ့ကြောင်း သိရသည်။
ထိုဒေသတွင် တိုင်းရင်းသားလက်နက်ကိုင်တပ်များ တိုက်ပွဲဆက်လက်ဖြစ်ပွားနေကြောင်း၊ အဆိုပါတိုက်ပွဲကြောင့် ပန်လင်ကျေးရွာမှ မိုင်းထိဒဏ်ရာရထားသူတို့သည် မြို့ပေါ်ရှိ ဆေးရုံဆေးခန်းသို့ လာရောက်ကုသနိုင်ခြင်းမရှိပဲ ကျေးရွာတွင်သာ ဆေးကုသနေတာဖြစ်ကြောင်း ကြားသိရသည်။
“ရွာအနီး တိုင်းရင်းသားလက်နက်ကိုင်တပ်တွေ တိုက်ပွဲဖြစ်နေလို့ ရွာအဝင်အထွက်လမ်းတွေ ပိတ်ထားရတယ်၊ မိုင်းနင်းမိတဲ့သူတွေလည်း မြို့ပေါ်ကို လာပြီး ဆေးမကုနိုင်ဘူး၊ ရွာက ကျန်းမာရေးဝန်ထမ်းတွေနဲ့ပဲ ကုသနေရတာ” ဟု ပန်လင်ကျေးရွာ ဒေသခံအမျိုးသားတစ်ဦးက ပြောသည်။
ပန်လင်ကျေးရွာတွင် မိုင်းနင်းမိကာ ဒဏ်ရာရထားသူ (၃)ဦးထိ ရှိနေပြီး ထိုကျေးရွာတွင်သာ ဆေးကုသနေတာဖြစ်ကြောင်း သိရသည်။
ထို့အပြင် ကျောက်မဲမြို့နယ်တွင် (၂)လအတွင်း မိုင်းနင်းမိကာ ဒဏ်ရာရရှိသူ အမျိုးသား (၅)ဦး၊ အမျိုးသမီး (၁)ဦး စုစုပေါင်း (၆)ဦးထိရှိခဲ့ပြီး အမျိုးသား (၁)ဦးမှာ မိုင်းနင်းမိသည့်နေရာတွင် သေဆုံးခဲ့ကြောင်း စုံစမ်းသိရသည်။
