သျှမ်းပြည်တောင်ပိုင်း တောင်ကြီးမြို့ သျှမ်းစာပေယဉ်ကျေးမှုမှ ဦးစီးကာ ၂၀၁၇-၂၀၁၈ ပညာသင်နှစ်တွင် တက္ကသိုလ်ဝင်တန်းအောင်မြင်သည့် သျှမ်းတိုင်းရင်းသား ကျောင်းသား/သူများအား ဂုဏ်ပြုပွဲ အခမ်းအနား တရပ်ကျင်းပပြုလုပ်ခဲ့ပါသည်။

ဂျုလိုင် ၁၅ ရက်နေ့က တောင်ကြီး သျှမ်းစာပေယဉ်ကျေးမှု ခန်းမတွင်  တက္ကသိုလ်ဝင်တန်း အောင်မြင်သည့် သျှမ်းတိုင်းရင်းသား ကျောင်းသား/သူ စုစုပေါင်း ၈၀ နှင့် ၆ ဘာသာဂုဏ်ထူးရှင် ၃ ဦးတို့ ကို ဆုများချီးမြှင့်ခဲ့ကြောင်းသိရသည်။

တောင်ကြီးသျှမ်းစာပေ နှင့် ယဉ်ကျေးမှုအသင်း မှ တွဲဖက်အတွင်းရေးမှူးစာရင်းစစ် လုံးစိုင်းနွတ် က “ဘာလို့ ဒီလိုဂုဏ်ပြုပွဲ လုပ်ပေးရတာလဲဆိုတော့ ဒီထက်ပိုပြီး ကြိုးစားမှုရှိလာအောင် ဘာလို့လဲဆိုတော့ ခုမှ ၁၀ တန်းပဲအောင်သေးတာ ရှေ့ဆက်တက်မယ့် တက္ကသိုလ်တွေ ရှိသေးတယ်၊ ဒါကြောင့် သူတို့ အများကြီး ကြိုးစားရအုံးမယ် အဲ့ကြောင့်  ဂုဏ်ပြုရခြင်း ဖြစ်ပါတယ်” ဟု ပြောသည်။

တောင်ကြီးမြို့ပေါ်ရှိ သျှမ်းလူမှုအဖွဲ့အစည်း ၂၈ ဖွဲ့ထဲမှ ဆယ်တန်းအောင် ကျောင်းသား/သူ ၈၀ ဦးကို ဂုဏ်ပြုပေးကြောင်း သိရသည်။

“ကျနော်တို့ တောင်ကြီးမြို့ပေါ်က သျှမ်းလူမှုအဖွဲ့အစည်းအားလုံး ၂၈ ဖွဲ့ထဲက သူတို့ သား/သမီးတွေကို ဂုဏ်ပြုတာပါ ၊ လေးကြိမ်မြောက်ရှိသွားပါပြီ ဒီနှစ်ပါရင် ။ ဆယ်တန်းအောင် ကျောင်းသား/သူ တွေ ဒီနှစ်ပိုများတယ်။ ပြောရမယ်ဆို ကျနော်တို့ သျှမ်းတိုင်းရင်းသား ကျောင်းသား/သူတွေ ပညာရေးပိုင်းကို ပိုပြီးစိတ်ဝင်စားလာကြတယ် ပိုများလာတယ် လို့ ပြောလို့ရတယ်” ဟု တောင်ကြီး သျှမ်းစာပေယဉ်ကျေးမှု ဥက္ကဌ စိုင်းတင် က ပြောသည်။

၆ ဘာသာဂုဏ်ထူးရှင် နန်းမောက်ဟျိုးငင်း က “ မိဘတွေရဲ့ အားပေးမှုတွေကြောင့်၊ ကြိုးစားမှုကြောင့် ဆရာ/ဆရာမတွေ ရဲ့ ဂုဏ်ကျေးဇူးကြောင့် အောင်မြင်ကြောင်း ” ပြောသည်။

“စာ ကို ပုံမှန်ကြည့်တယ် တစ်နေ့စာ တစ်နေ့ ပုံမှန်ကြည့်တယ်၊ ဆေးကျောင်းတက်မယ် ။ ဘာကြောင့် ဆရာဝန်လုပ်ချင်တာလဲဆိုတော့ လူနာတွေကို ဆေးကုပေးရတာ ကုသိုလ်လဲရတယ် ။ မိဘလည်း ဆေးကျောင်းတက်ဖို့ အားပေးတယ် ။ ” ဟု ၄င်းကပြောသည်။

သျှမ်းစာပေယဉ်ကျေးမှုမှ ဦးစီးကျင်းပသည့် တက္ကသိုလ်ဝင်တန်းအောင်မြင်သော ကျောင်းသား/သူ များအား ဆုချီးမြှင့်ခြင်းအခမ်းအနားမှာ လေးကြိမ်မြောက်ရှိသွားကြောင်း သိရသည်။

ယခုနှစ်တွင် ကျောင်းသား/သူ များ ၁၀ တန်းအောင်ချက်ပိုများကြောင်း သိရသည်။

၂၀၁၄ – ၂၀၁၅ ခုနှစ်တွင် တောင်ကြီးမြို့ပေါ်ရှိ သျှမ်းတိုင်းရင်းသား တက္ကသိုလ်ဝင်တန်းအောင်မြင်သည့် ကျောင်းသား/သူ ၄၅ ဦးရှိပြီး ၊ ၂၀၁၅-၂၀၁၆ ပညာသင်နှစ်တွင် ၅၄ ဦး၊ ၂၀၁၆-၂၀၁၇ ပညာသင်နှစ်တွင် ၅၈ ဦး နှင့် ၂၀၁၇-၂၀၁၈ ပညာသင်နှစ်တွင် ၈၀ ဦး ဂုဏ်ပြုရကြောင်း သိရသည်။