သျှမ်းမြောက် ကျောက်မဲမြို့တွင် ကိုဗစ်ကူးစက်မှုကို ထိန်းချုပ်နိုင်ရန် ဆေးရုံမှာ လာရောက်ကုသကြဖို့ ကျောက်မဲ ပြည်သူ့ဆေးရုံမှ ဆေးရုံအုပ်က တိုက်တွန်းထားသည်။
ကျောက်မဲတွင် ကိုဗစ်ကူးစက်မှု မြင့်တက်နေဆဲ ဖြစ်ပြီး နေအိမ်တွင်း ကုသနေမှုများကြောင့် ကိုဗစ်ပိုး ပျံ့နှံ့မှု၊ သေဆုံးမှုများ ရှိနေကြောင်း သိရသည်။
“ဆေးရုံမှာ ကျန်းမာရေးဝန်ထမ်းနည်းပေမယ့် ကြက်ခြေနီအဖွဲ့ကိုလည်း အကူညီတောင်းပြီး ဆေးရုံလာတက် နေတဲ့သူ တွေကို ကြည့်ကြပ်ပေးနေတယ်၊ အဲ့တော့ နေအိမ်မှာ ကြိတ်ကုတာထက် ဆေးရုံဆေးခန်းမှာ လာကုသင့်တယ်” ဟု ကျောက်မဲခရိုင်ပြည်သူ့ဆေးရုံမှ ဆေးရုံအုပ်က တိုက်တွန်းလိုက်သည်။
ကျောက်မဲပြည်သူ့ဆေးရုံတွင် ကျန်းမာရေးဝန်ထမ်း(၈)ဦးရှိပြီး ကြက်ခြေနီအဖွဲ့မှ (၃)ဦးကိုလည်း ခေါ်ယူထားကြောင်း၊ ကိုဗစ်လူနာများအပြင် အခြားရောဂါဖြင့်ဆေးရုံတက်ရောက်နေသူများလည်း ရှိပြီး လူနာ (၁၅၀)ခန့်အား ကြည့်ကြပ်ပေးနေတာဖြစ်ကြောင်း သိရသည်။
“လူနာတွေကို (၂)ပိုင်းခွဲထားတယ်၊ သာမန်ဖျားနာတဲ့လူနာတွေကိုတော့ နေ့တိုင်း သွားပြီး စစ်ဆေးတာတွေ မလုပ်ပေးနိုင်ဘူး၊ အရေးပေါ်လူနာတွေ၊ အောက်ဆီဂျင်ရှူနေရတဲ့ လူနာတွေကိုတော့ ဦးစားပေးအနေနဲ့ စောင့်ရှောက်ပေးနေတယ်” ဟု ဆေးရုံအုပ်က ပြောသည်။
ထိုဆေးရုံတွင် အောက်ဆီဂျင်ရှူနေရသည့် လူနာ (၃၀)ဦးခန့်ရှိနေပြီး တစ်နေ့လျှင် အောက်ဆီဂျင်အိုး (၉၀)လုံးခန့်ထိ အသုံးပြုနေရသည့်အတွက် အောက်ဆီဂျင်အခက်ခဲတော့ ရှိနေကြောင်း ၎င်းက ဆိုသည်။
ထို့အပြင် သြဂုတ်လ (၂၅)ရက် ယနေ့မနက်ပိုင်းမှ စတင်ပြီး ဆေးရုံတွင်းရှိ မျက်စိဆောင်တွင် ရုံးပိတ်ရက်မှလွဲပြီး နေ့စဉ် Task Kit ဖြင့် ကိုဗစ် စစ်ဆေးပေးနေပြီဖြစ်ကြောင်း သိရသည်။
ကျောက်မဲတွင် ယမန်နေ့အထိ ကိုဗစ်အတည်ပြုလူနာ (၈၀၀)နီးပါး ရှိနေပြီး သေဆုံးသူ (၄၀)ကျော်ရှိနေကြောင်း သိရသည်။
Leave a Comments