သျှမ်းပြည် တောင်ပိုင်း အောင်ပန်းမြို့တွင် CDM လုပ်ဆောင်ထားခြင်းမရှိသည့် မီးရထားဝန်ထမ်း (၁)ဦး ဓားဖြင့် အချက်ပေါင်းများစွာ ထိုးခံရကြောင်း သတင်းရရှိသည်။

ယမန်နေ့ (သြဂုတ် ၂၄)ရက် ညနေ (၄)နာရီဝန်းကျင်တွင် အောင်ပန်းမြို့ မှ ကုန်းလွင်ကျေးရွာသို့ သွားသည့် မီးရထားလမ်းဘေးရှိ ပြောင်းစိုက်ခင်းအနီးတွင် ဓားဖြင့်အချက်ပေါင်းများစွာ ထိုးခံထားရသည့် မီးရထားဝန်ထမ်း တစ်ဦး ၏ ရုပ်အလောင်းကို တေ့ွရှိပြီး၊ တစ်ဦးမှာ ပျောက်ဆုံးနေကြောင်း သိရသည်။

“မနေ့က ညနေပိုင်း ၄ နာရီဝန်းကျင်မှာ ပြောင်းဖူးခင်းထဲ အသတ်ခံရတဲ့ အလောင်းတစ်လောင်းတွေ့တယ်၊ သူ့ရဲ့ ပါးစပ်ကိုတိတ်တွေနဲ့ ပိတ်ထားပြီးတော့ ဓါးနဲ့ထိုးတဲ့အချက်ပေါင်း ၃၆ ချက်လောက်ရှိမယ်။ သူနဲ့ အတူနေ နောက်ထပ် ဝန်ထမ်းတစ်ဦးကတော့ ပျောက်နေတယ်၊ သေသလား ရှင်သလား မပြောတတ်ဘူး” ဟု အောင်ပန်းမြို့နေ တစ်ကိုယ်တော် ပရဟိတ လုပ်ကိုင်နေသူ ကိုသူရိန်ထွန်းက သျှမ်းသံတော်ဆင့်ကို ပြောသည်။

အဆိုပါ မီးရထားဝန်ထမ်းနှစ်ဦး အနက် ဓါးချက် ၃၆ ချက်ဖြင့် အသတ်ခံလိုက်ရသည့် ဝန်ထမ်းတစ်ဦးသည် အရင်တွင် ပိုက်ဆံ ၃၆ သိန်း ခိုးဖူးသူ ဖြစ်ကြောင်းနှင့် CDM လုပ်ဆောင် ထားသူ မဟုတ်ကြောင်းလည်း ကိုသူရိန်ထွန်းက ပြောသည်။

“ဓါးချက်တွေနဲ့ အလောင်းပြန်ရတဲ့ တစ်ယောက်က အရင်က သူများ ပိုက်ဆံ ၃၆ သိန်းတိတိ ခိုးဖူးတဲ့သူပါ၊ သူတို့ကို PDF ကသတ်လိုက်တယ် ဆိုတာကတော့ ယုတ္တိမရှိဘူး၊ CDM မလုပ်ထားပေမယ့် နိုင်ငံရေး အကြောင်းကို အဲ့လောက်ထိ သိရှိနားလည်တဲ့ သူတွေ မဟုတ်ဘူး၊ ဒါပေမဲ့ ဘာကြောင့် ဘယ်သူက လာသတ် သွားလဲ ဆိုတာ ကျနော်လည်း မသိဘူး” ဟု ကိုသူရိန်ထွန်းက ပြောသည်။

စစ်တပ်မှ နိုင်ငံတော် အာဏာသိမ်းယူပြီးနောက် အောင်ပန်းမြို့တွင် ခိုးဆိုးလုယက်မှုနှင့် ရိုက်နှက်မှုများအပြင် အခုလို သတ်ဖြတ်မှုများလည်း ရှိလာကြောင်း၊ လူငယ်များစွာကလည်း စစ်ကောင်စီ လက်အောက်ခံ စစ်သားနှင့် ရဲသားတို့၏ ဖမ်းဆီးခံရမှုများ ရှိနေကြောင်းလည်း သတင်းသိရသည်။