သျှမ်းပြည်အရှေ့ပိုင်း ကျိုင်းတုံမြို့နယ် မိုင်းလန်းကျေးရွာအုပ်စုတွင် ဈေးဝယ်ကဒ်ကို ပိုက်ဆံပေးပြီး ဝယ်ယူနေရကြောင်း စုံစမ်းသိရှိရသည်။
ထိုဈေးဝယ်ကဒ်ကို ၅၀၀ ကျပ်ဖြင့်လည်းကောင်း၊ ပလတ်စတစ်လောင်းပါက ၁ထောင်ကျပ်ဖြင့် ပေးဝယ်နေရကြောင်း သိရသည်။
“ ဟုတ်တယ်။ သူတို့အုပ်ချုပ်ရေးမှုက အဲလိုတောင်းတာ။ ရိုးရိုးပဲဆိုရင် ၅၀၀ ကျပ်တဲ့။ ပလတ်စတစ်ပါလောင်းယူမယ်ဆို ၁ ထောင်ကျပ်တောင်းတယ်။ ပြည်သူတွေ ဒုက္ခ ရောက်နေတဲ့အချိန်မှာ အဲ့လို မလုပ်သင့်ဘူး” ဟု ကျိုင်းတုံမြို့ ဒေသခံအမျိုးသားတဦးကပြောသည်။
ထိုသို့ ဈေးဝယ်ကဒ်ကို ကျိုင်းတုံမြို့ မိုင်းလန်းကျေးရွာအုပ်စု တခုထဲတွင်သာ ဝယ်ယူရပြီး ကျန်သည့် ကျေးရွာအုပ်စုများ၊ မြို့ပေါ်တွင် မဝယ်ယူရကြောင်း သိရသည်။
“ သူတို့အဲ့ကျေးရွာအုပ်စုပဲတောင်းတယ်။ ကျန်တဲ့ အုပ်စုတော့မကြားမိဘူး။ ကျနော်တို့ဆို ဈေးဝယ်ကဒ်ကို အကောင်းစားရသေးတယ်။ ပလတ်စတစ်ပါတခါထဲလောင်းထားပေးတယ်။ ပိုက်ဆံလည်းမကုန်ရဘူး” ဟု ကျိုင်းတုံမြို့ဒေသခံတဦးက ပြောသည်။
ထိုအပြင် ကျိုင်းတုံမြို့တွင် Stay at homeအဖြစ် သတ်မှတ်ထားသော်လည်း ကိုဗစ် ၁၉ ပိုးတွေ့လူနာကို တရက်တည်း အများအပြားတွေ့ရှိနေရသေးကြောင်း သိရသည်။
ပိုးတွေ့လူနာများပြားလာရခြင်းသည် Stay at home အဖြစ်သတ်မှတ်ထားပြီး ပြည်သူတချို့က ဈေးဝယ်ကဒ်ဖြင့် ခိုးထွက်မှုရှိသောကြောင့် ပိုးတွေ့လူနာ များလာကြောင်း ဒေသခံတဦးက ပြောသည်။
“ သူတို့တွေက Stay at home လို့တာသတ်မှတ်ထားတာ။ အပြင်ထွက်နေကြတဲ့သူတွေလဲရှိတယ်လေ။ လော့ဒေါင်းမချလိုက်ဘူး။ တစ်ချို့က ဈေးသွားရောင်းရတယ်။ တချို့က ဈေးဝယ်ကဒ်နဲ့ အပြင်ထွက်လည်း ကြတာလည်းရှိတယ်။ အဲကြောင့်ကိုဗစ် ပိုးက ပြန့်နေတာ ” ဟု ကျိုင်းတုံမြို့ဒေသခံအမျိုးသားတဦးက ပြောသည်။
ကျိုင်းတုံမြို့တွင် ယမန့်နေ ဩဂုတ် ၂၂ တရက်တည်း ကိုဗစ် ၁၉ ပိုးတွေ့လူနာ (၅၈) ဦးတွေ့ရှိပြီး သေဆုံးသူ (၃) ဦးရှိကြောင်းသိရသည်။
