သျှမ်းမြောက် ကျောက်မဲမြို့အတွင်း စားနပ်ရိက္ခာ ဝေပေးသည့်နေရာတွင် ရဲနှင့် ရပ်ကွက်အုပ်ချုပ်ရေးမှူးတို့က လာရောက်တားဆီး လူစုခွဲခဲ့ကြောင်း သိရသည်။
ကျောက်မဲမြို့တွင် ကိုဗစ် − ၁၉ ရောဂါပျံ့နှံ့နေမှုကြောင့် စားနပ်ရိက္ခာခက်ခဲနေသူများကို စေတနာရှင်တို့က လှူဒါန်းပေးနေတာဖြစ်ပြီး ရဲနှင့်ရပ်ကွက်အုပ်ချုပ်ရေးမှူးတို့က လာရောက်လူစုခွဲခဲ့ကြောင်း ဒေသခံများထံမှ သိရသည်။
“အရင် CP မီးပွိုင့်နားလေးမှာ အိမ်တစ်အိမ်က စားနပ်ရိက္ခာတွေ ဝေပေးတာ၊ လူစုလူဝေးဖြစ်နေတယ်ဆိုပြီး ရဲနဲ့ ရပ်ကွက်အုပ်ချုပ်ရေးမှူးက လာပြီး တားတယ်၊ လူစုခွဲလိုက်တာပေါ့” ဟု အဆိုပါနေရာအနီး နေထိုင်သည့် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
သြဂုတ်လ (၂၂)ရက် ယမန်နေ့ မနက် (၈)နာရီဝန်းကျင်တွင် စားနပ်ရိက္ခာများကို ဝေပေးခဲ့တာဖြစ်ပြီး လာရောက်တန်းစီသူ (၁၀၀)ကျော်ခန့်ပင် ရှိကြောင်း၊ ထို့ကြောင့် ကိုဗစ်ရောဂါပိုပျံ့မှာကို စိုးရိမ်မိကြောင်း ဒေသခံများထံမှ သိရသည်။
“ခုချိန်က အလုပ်အကိုင် မဖြစ်တော့ စားဝတ်နေရေးက ခက်ခဲကြတယ်၊ အစားအသောက် ဝေတဲ့နေရာမှာ လာရောက်တန်းစီတဲ့သူတွေ (၁၀၀)ကျော်လောက်ရှိမယ်၊ အဲ့တာကြောင့် ကိုဗစ်ရောဂါကို စိုးရိမ်မိတယ်” ဟု အဆိုပါ ဒေသခံက ဆိုသည်။
ကျောက်မဲမြို့တွင် ယခင်ရက်များတွင်လည်း အစားအသောက် ခက်ခဲနေသူများအတွက် စေတနာရှင်တို့မှ အစားအသောက် မျှဝေကူညီပေးခြင်းများ ပြုလုပ်ပေးလေ့ရှိကြောင်း၊ သို့သော် ယမန်နေ့ လာရောက်တန်းစီသူ မရှိဖူးသေးကြောင်း ဒေသခံများထံမှ စုံစမ်းသိရသည်။
ထို့အပြင် ပြီးခဲ့သည့် ရက်ပိုင်းအတွင်း တိုင်းရင်းသားလက်နက်ကိုင်တိုက်ပွဲကြောင့် ကျောက်မဲမြို့ပေါ်သို့ စစ်ရှောင်ထွက်ပြေးလာသူ (၁၀၀)ကျော် ရှိနေပြီး စားနပ်ရိက္ခာများ ခက်ခဲနေကြကြောင်း သိရသည်။
သျှမ်းမြောက် ကျောက်မဲမြို့တွင် ယမန်နေ့အထိ ကိုဗစ်အတည်ပြုလူနာ (၇၀၀)ကျော်ရှိနေပြီး သေဆုံးသူ(၄၀)ကျော် ရှိနေကြောင်း သိရသည်။
