ကျောင်း ပညာဆက်လက်သင်ကြားရန်အခွင့်အလမ်းနည်းပါးသော ကျေးလက်ဒေသခံ အမျိုးသမီးများအား မိမိခြေပေါ် ရပ်တည်နိုင်ရေးအတွက် အသက်မွေးဝမ်းကျောင်းလုပ်ငန်း တခုခုတတ်မြောက်စေရန်ရည်ရွယ်ကာ သျှမ်းအသင်းအဖွဲ့အချို့စုပေါင်းကာ တောင်ကြီးမြို့တွင် သင်ကြားပေးနေသည်ဟုသိရသည်။

အဆိုပါသင်တန်းကို တိုင်းရင်းသားငြိမ်းချမ်းရေး အရင်းအမြစ် စီမံချက် EPRP နှင့် We Are Tai အဖွဲ့တို့ ပူးပေါင်းကာ ဇွန်လ ၁ ရက်နေ့မှ သြဂုတ်လ ၃၁ ရက်နေ့အထိ ဖွင့်လှစ်သင်ကြားပေးနေခြင်းဖြစ် ကြောင်း၊ ယခု သင်တန်းတွင် ဆရာမ ၃ ဦး သင်တန်းသူ ၁၇ ဦး ရှိကြောင်းသိရသည်။

ဇွန်ထဲမှာ အခြေခံအဖြစ် ညအိပ်ဝတ်စုံလေးတွေ ၊ ဘောင်းဘီလေးတွေ၊ ရင်စေ့ ရိုးရိုးအကျီလေးတွေချုပ်တဲ့ နည်းသင်ပေးတယ်။ ဇူလိုင်လမှာတော့ တိုင်းရင်းသူဝတ်စုံလေးတွေချုပ်တဲ့နည်းပေါ့ သင်ပေးရပါတယ်။ ပအို၀်း၊ တောင်ရိုး၊ ဓနု၊ သျှမ်း အမျိုးသမီးရိုးရာဝတ်စုံချုပ်နည်းသင်ပေးမယ်။ နောက်ဆုံးသြဂုတ်လထဲမှာတော့ မြန်မာ အမျိုးသမီးဝတ် ထိုင်မသိမ်းတွေ၊ ဘော်ကြယ်စီတာတွေချုပ်တဲ့နည်းသင်ပေးမယ်။ – ဟု သျှမ်းစာပေယဉ်ကျေးမှုမှ ဆရာမ နန်းနွန်းမိုက သျှမ်းသံတော်ဆင့်အားပြောပြသည်။

ယခုသင်တန်းသည် ဒုတိယအကြိမ် အမျိုးသမီးစွမ်းရည်မြှင့်တင်ရေးသင်တန်းဖြစ်ပြီး – သျှမ်းပြည်တောင်ပိုင်း ပင်လောင်းမြို့၊ ဟဲဟိုးမြို့၊ ဆီဆိုင်မြို့၊ ညောင်ရွှေမြို့၊ တီကျစ်တိုက်နယ် က အပြင် သျှမ်းပြည်မြောက်ပိုင်း မှ ကျောက်မဲမြို့၊ သိန္နီမြို့၊ နမ္မတူမြို့တို့မှ သျှမ်း ၊ တောင်ရိုး၊ ဓနု ၊ ပအိုဝ်း ၊ အင်း တိုင်းရင်းသူ များ ဖြစ်ကြောင်း သိရသည်။
ပထမအကြိမ်သင်တန်းကို ယမန်နှစ်က ကျင်းပရာတွင် သင်တန်းသူ ၁၄ ဦးရှိကြောင်း သိရသည်။