သျှမ်းပြည်တဝှမ်း ရှိ ကိုဗစ် ၁၉ စစ်ဆေးရေးဂိတ်နေရာများတွင် စစ်ကောင်စီ တပ်သားများက သေနတ်ကိုင်ပြီး ဂိတ်စောင့်နေကြောင်း စုံစမ်းသိရှိရသည်။
မြန်မာနိုင်ငံတွင် ကိုဗစ် ၁၉ တတိယလှိုင်းပြန့်ပွားမှုကြောင့် မြို့ဝင်၊မြို့ထွက် ကိုဗစ် -၁၉ စစ်ဆေးရေးဂိတ်များ ပြန်ဖွင့်ခဲ့သော်လည်း စစ်ကောင်စီ တပ်သားများက သေနတ်ဖြင့် စောင့်နေလျက်ရှိကြောင်း သိရသည်။
“ စစ်ဆေးရေးဂိတ်မှာက စစ်တပ်တွေစောင့်နေတယ်။ သူတို့က အဲနေရာပဲ စောင့်နေတာမဟုတ်ဘူး။ ရပ်ကွက်တွေထဲလည်စောင့်တယ်။ ရပ်ကွက်တွေ ကျူးကျော်မှုရှိလာရင်လည်း ဒဏ်ခတ်ငွေတွေတောင်းတယ်။ သေနတ်တွေနဲ့စောင့်နေကြတယ်။ ” ဟု လာရှိုးမြို့ ဒေသခံအမျိုးသားတဦးက ပြောသည်။
စစ်တပ်က စောင့်ဆိုင်းမှုသည် သွားလာရာအတွက် လွယ်ကူသော်လည်း စိတ်ကြောက်လန့်မှုတော့ရှိကြောင်း ပင်လုံမြို့ ဒေသခံ တဦးက ပြောသည်။
“ သူတို့က တက္ကသိုလ်ရှေ့မှာစောင့်တာ။ သွားလာရတာအေးဆေးပါတယ်။ ဘာမှတော့မဖြစ်ပါဘူး။ ဒါမဲ့ ဟိုအရင်လိုမဟုတ်ဘူးပေါ့။ လန့်တော့လန့်တာပေါ့” ဟု ပင်လုံမြို့ ဒေသခံ အမျိုးသား တဦးကလည်း ပြောသည်။
ယခင်က NLD အစိုးရလက်ထက်တွင် ပရဟိတများ၊ စေတနာလူမှုကူညီးရေးအဖွဲ့များက ကိုဗစ် ၁၉ စစ်ဆေးရေးဂိတ်တွင် စောင့်ပေးနေလျက်ရှိပြီး ယခု စစ်အာဏာသိမ်းယူပြီးနောက်ပိုင်းတွင် စစ်တပ်များကသာ လာရောက်စောင့်နေကြောင်း သိရသည်။
“ အရင်ကတော့ ပရဟိတ အဖွဲ့တွေရှိတယ်လေ။ အခုကတော့ စစ်တပ်ကပဲစောင့်နေတာ။ သူတို့ဘယ်လိုစောင့်ကြပ်နေလဲ တော့ ကျနော်တို့လည်း အသေးစိတ်မသိရဘူး။ အသွားအလာတွေကတော့ ပုံမှန်ပါပဲ။ သွားလာလို့ရပါတယ်” ဟု တောင်ကြီးမြို့က ပရဟိတ အဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
ယခင်က ကိုဗစ် ၁၉ ဒုတိယလှိုင်းတွင် တစ်နေရာနှင့် တနေရာသွားရာတွင် ရပ်ကွက်ထောက်ခံစာဖြင့် သွားလာကြရကြောင်း သိရသည်။ ထိုသို့ သွားလာရာတွင် မဖြစ်မနေသွားလာနေရသူများသာ သွားခွင့်ပေးလျက်ရှိကြောင်းသိရသည်။
