သျှမ်းပြည်တောင်ပိုင်း မိုင်းကိုင်မြို့နယ် တုံလောကျေးရွာအုပ်စုတွင် စစ်ရှောင် (၆၄) ဦး အစားအသောက် နှင့် ဆေးဝါးများ လိုအပ်နေကြောင်း စုံစမ်းသိရှိရသည်။
သြဂုတ် (၁၁) ရက်နေ့က သီပေါမြို့နယ် နမ့်လန်ဒေသအနီးရှိ သျှမ်းတပ် (၂) တပ် တိုက်ပွဲကြောင့် မွေးကင်းစ ရက်သားကလေးအပါအဝင် ဒေသခံ (၃၀၀) ကျော် ထွက်ပြေးတိမ်းရှောင်ခဲ့ရသည်။
သျှမ်းပြည်မြောက်ပိုင်း သီပေါမြို့နယ် နမ့်လန်ဒေသအနီးတွင် သျှမ်းတပ် (၂)တပ် တိုက်ပွဲကြောင့် မိုင်းကိုင်မြို့နယ် တုံလောကျေးရွာအုပ်စုရှိ ပန်လန့်ဘုန်းကြီးကျောင်းသို့ ထွက်ပြေးတိမ်းရှောင်လာသည့် သူများဖြစ်သည်။
ထိုစစ်ရှောင် (၆၄)ဦးသည်ဝမ်စိမ်းကျေးရွာအုပ်စု နောင်ပိန်ရွာ၊ ဝမ်ကျောင်းရွာ ဒေသခံများ ဖြစ်ကြသည်။
“စားနပ်ရိကာတွေ အခင်းတွေ ဆေးဝါးတွေ လိုအပ်နေတယ်။ စောင် တွေ ခြင်ထောင်တွေက အစ မရခဲ့ဘူး။ သူတို့ နေ့တဲ့ နေရာနဲ့ တိုက်ပွဲဖြစ်တဲ့ နေရာက နီးလို့ ထွက်ပြေးနေရတာပါ။ အခုချိန်ထိ စစ်ရေးတင်းမာ နေတုန်းပဲ” ဟု စစ်ရှောင်ကူညီပေးနေသည့် ပရဟိတ တစ်ဦးက သျှမ်းသံတော်ဆင့်ကို ပြောသည်။
သျှမ်းတပ် (၂)တပ် တိုက်ပွဲသည် သြဂုတ် (၁၄)ရက်ထိ ပစ်ခတ်သံကြားနေရပြီး၊ ယနေ့ချိန်ထိ စစ်ရေး တင်းမာနေသဖြင့် စစ်ရှောင်များ နေရပ်မပြန်ရဲသေးကြောင်း ၎င်းက ပြောသည်။
ထို့အပြင် လက်ရှိကာလသည် ကိုဗစ်-၁၉ ကူးစက်ပြန့်နှံမှု မြင့်တက်နေသည့် အတွက် တစ်မြို့ နှင့် တစ်မြို့ သွားလာရန်လည်း ခက်ခဲကြောင်း သိရသည်။
သျှမ်းတပ် (၂) တပ် အချင်းချင်း တိုက်ပွဲကြောင့် ဒေသခံများ ထွက်ပြေးတိမ်းရှောင်ရပြီး၊ အခက်ခဲများစွာ ရင်ဆိုင်နေရကြောင်း တိုက်ပွဲများ ရပ်နားကြရန်လည်း ယနေ့ စစ်ရှောင်လာသည့် ပြည်သူများက ပြောဆိုလိုက်သည်။
သျှမ်းတပ် (၂) တပ်သည် ဇွန်လဆန်းပိုင်းက စတင်ကာ နယ်မြေ အငြင်းပွားမှု ပြဿနာဖြင့် အပြန်အလှန် တိုက်ခိုက်နေကြပြီး ထို တိုက်ပွဲကြောင့် လယ်ယာလုပ်ငန်းကို စွန့်ခွာရပြီး စစ်ရှောင်နေရသဖြင့် နောင်နှစ်စားဝတ်နေရေးအတွက်လည်း စိုးရိမ်နေကြကကြောင်း သိရှိရသည်။
သျှမ်းတပ် (၂) တပ် တိုက်ပွဲမဖြစ်ရန် သျှမ်းသံယာတော်များ၊ သျှမ်းပြည်သူများက အကြိမ်ကြိမ်တိုက်တွန်း ပြောဆိုခဲ့သော်လည်း သျှမ်းတပ် (၂) တပ်သည် နားထောင်ခြင်းမရှိခဲ့ပေ။
Leave a Comments