သျှမ်းပြည် မြောက်ပိုင်း လားရှိုးမြို့နယ် အတွင်း ခိုးဆိုးလုယက်မှု နှင့် ဓါးပြတိုက်ယူမှုများ များပြားလာသောကြောင့် ပြည်သူများက မိမိတို့ အသက်အိုးအိမ် လုံခြုံရေး အတွက် စိုးရိမ်နေကြောင်း သိရသည်။
ယနေ့ သြဂုတ်လ ၁၃ ရက်နေ့ နံနက် ၅ နာရီ ဝန်းကျင် ခန့်က လားရှိုးမြို့စျေးကြီးအနီးရှိ စျေးဆိုင် ဖွင့်လှစ်ရောင်းချရန်အတွက် သွားသည့် အမျိုးသမီးတစ်ဉီးသည် လားရှိုးမြို့မ စျေးကြီးအရောက်တွင် ဓါးထောက်ပြီး ဆိုင်ကယ်လုခံရကြောင်း သတင်းသိရသည်။
“သူတို့ဆိုင်လေးကလည်း လားရှိုးမြို့မစျေးနားမှာပဲ၊ နေ့တိုင်းလည်း သူတို့ ညီအစ်မ နှစ်ယောက်သွား ဖွင့်တယ်၊ ဒီမနက်ရောက်တော့ ဓါးထောက်ပြီး ဆိုင်ကယ်လုခံရတယ်တဲ့၊ ဒီလိုဖြစ်သွားတဲ့အတွက် စိတ်မကောင်းပါဘူး၊ လားရှိုးမှာက ဒီလို လုယက်မှုတွေ များသာထက်ပိုများလာပြီ” ဟု အဆိုပါ ဓါးထောက်ပြီး ဆိုင်ကယ်လုခံရ သည့် အမျိုးသမီးနှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် သြဂုတ် ၁၁ ရက်ကလည်း လားရှိုးမြို့ ရပ်ကွက် ၁၂ အတွင်း ဖွင့်လှစ်ထားသည့် ဖုန်းအရောင်း ဆိုင်တစ်ဆိုင် ဖောက်ထွင်းခံရပြီး အနည်းဆုံး ဖုန်းအသစ် စက်စက် ၈ လုံးခန့်ပါသွားခဲ့ကြောင်းလည်း သိရ သည်။
ထို့အတူ သြဂုတ်လ ၉ ရက်နေ့ နံနက် ၃ နာရီ အချိန် လားရှိုးမြို့ ရပ်ကွက် ၇ ရှိ နေအိမ်ဝန်းထဲ ရပ်ထားသည့် အိမ်စီးကား တစ်စီး ခိုးခံရကြောင်း ကားပိုင်ရှင်ဖြစ်သူ က သျှမ်းသံတော်ဆင့်ကို ပြောသည်။
“ကားကအိမ်ဝန်းထဲ သေချာသော့ခတ်ပြီးတော့ ရပ်ထားတာ၊ ဘယ်လိုလုပ်ပြီး ခိုးယူသွားလည်း ဆိုတာ မပြော တတ်အောင်ပဲ၊ သူခိုးတွေက လားရှိုးမြို့တွင်းတော်တော်သောင်းကျန်း နေတယ်၊မူးယစ်ဆေးတွေ လည်းတအား ပေါများနေတယ်” ဟု အခိုးခံရသည့် ကားပိုင်ရှင် ဖြစ်သူအမျိုးသမီးက သျှမ်းသံတော်ဆင့်ကို ပြောသည်။
စစ်တပ်မှ နိုင်ငံတော် အာဏာသိမ်းယူပြီးနောက်ပိုင်း လားရှိုးမြို့အတွင်းတွင် ကိုဗစ်-၁၉ တတိယလှိုင်း ပိုးတွေ့ လူနာမြင့်တက်မှုဒဏ်များအပြင် နိုင်ငံရေးအခြေအနေ မတည်ငြိမ်မှုကြောင့် မကြာခဏ လုယက်မှု၊ ခိုးမှုများ လည်း ရင်ဆိုင်နေရသည့် အတွက် ပြည်သူများက စိုးရိမ်ထိတ်လန့်နေကြကြောင်း သိရသည်။
