သျှမ်းပြည်မြောက်ပိုင်း မူဆယ်မြို့နယ် ပန်ဆိုင်းမြို့အနီး တရုတ်နယ်စပ်မျဉ်းပေါ်တွင် ရောက်ရှိနေသည့် စစ်ရှောင် (၂၀၀) ကျော်အတွက် မိုးကာ နှင့် ဆေးဝါးများ အရေးပေါ် လိုအပ်နေကြောင်း စုံစမ်းသိရှိရသည်။
သြဂုတ် (၂)ရက် တွင် စစ်ကောင်စီတပ် နှင့် ကိုးကန့်တပ်( MNDAA)တို့ တိုက်ပွဲဖြစ်ပြီး စစ်ကောင်စီဘက်မှ အရပ်သားနေထိုင်သည့်ကျေးရွာထဲ လက်နက်ကြီး ပစ်ခတ်မှုကြောင့် ဒေသခံ(၂၀၀)ကျော်ထွက်ပြေး တိမ်းရှောင်ကာ တရုတ်နယ်စပ်မျဉ်း ပန်ဆိုင်းမြို့ တွင် ရောက်ရှိနေရခြင်းဖြစ်သည်။
“ မနေ့ ( သြဂုတ် ၁၂) ရက်နေ့က သွားတွေ့ထားတာကတော့ အမိုးအကာတွေ လိုအပ်တယ်။ မိုးကာတွေနဲ့ ကွပ်ပျစ်ဆောက်ပြီး နေကြရတယ်။ တစ်ချို့မိုးကာ အဆင်မပြေတော့ မိုးပြန်ယိုတာတွေ ဒီလို မိုးဆက်တိုက်ရွာတဲ့ချိန်ဆို တော်တော် ဒုက္ခရောက်တယ်” လို့သွားရောက်ကူညီပေးသည့် ပရဟိတ အမျိုးသမီး တစ်ဦး က သျှမ်းသံတော်ဆင့်ကို ပြောသည်။
ထိုစစ်ရှောင် (၂၀၀)ကျော်နေထိုင်သည့် နေရာသည် မိုးသည်းထန်ရွာကာ ရေကြီးလာသည့်အတွက် ရေလွတ်ရာသို့ပြောင်းရွှေ့နေထိုင်ရကြောင်း လည်း သိရသည်။
လက်ရှိကာလသည် မိုးရာသီဖြစ်ကာရာသီတုတ်ကွေး ဖြစ်ပွားမှု အများဆုံးကာလ ဖြစ်သကဲ့သို့ ကိုဗစ်လည်း မြင့်တက်နေသဖြင့် ဆေးဝါးနှင့် နှာခေါင်းစည်းများလိုအပ်နေကြောင်း လည်း သွားရောက်ကူညီသူများက ပြောပြသည်။
“ဆေးဝါးတွေလည်း လိုအပ်တယ်။ ခုချိန် ကိုဗစ် ကတော်တော်ဆိုးတော့ ကိုဗစ် ကို ကာကွယ်ဖို့ ဘာမှအဆင်မပြေဘူး နှာခေါင်းစည်းတောင် မှ မဝယ်သုံးနိုင်တဲ့အခြေနေရှိတယ်။ တစ်ချို့ မီးနေသည်တွေပါတယ်။ သက်ကြီးပိုင်းတွေပါတယ်” ဟု ပရဟိတ အမျိုးသမီး တစ်ဦးကပြောသည်။
ယခုရက်ပိုင်း စစ်ရှောင် (၂၀၀)ကျော်အတွက် အနီးတဝှိက်ရှိ အလှူရှင်များက စားသောက်ရေး အပိုင်းကို ကူညီဖြေရှင်းပေးနေကြောင်း သိရသည်။
သြဂုတ် လဆန်းပိုင်းမှ စတင်ပြီး စစ်ကောင်စီတပ် နှင့် မြောက်ပိုင်းမဟာမိတ်တပ်တို့ကြား တိုက်ပွဲများ မကြာခဏဖြစ်ပွားခဲ့သပြီ်း တိုက်ပွဲကြောင့် မူဆယ်ခရိုင် ကြူကုတ် – ပန်ဆိုင်း မြို့နယ်ခွဲ ဖောင်းဆိုင် ကျေးရွာအုပ်စု ဖိုင်ကောင်းကျေးရွာအတွင်း စစ်ကောင်စီက လက်နက်ကြီးဖြင့် ပစ်ခတ်ကာ ဒေသခံ (၃၀၀) ကျော် တောတောင်ထဲ တိမ်းရှောင်နေရကြောင်း သိရသည်။
မူဆယ်ခရိုင်အတွင်း မြောက်ပိုင်းမဟာမိတ် တပ်ဖွဲ့ဝင်များ ဖြစ်ကြသည့် ကချင်လွတ်လပ်ရေး တပ်မတော် (KIA)၊ မြန်မာအမျိုးသားဒီမိုကရက်တစ် မဟာမိတ်တပ်မတော် (MNDAA)၊ တအာင်းအမျိုးသား လွတ်မြောက် ရေးတပ်မတော် (TNLA) တပ်များနှင့် စစ်ကောင်စီတပ်တို့ကြား တိုက်ပွဲများ မကြာခဏ ဖြစ်ပွားခဲ့သည်။
